Oil traders refusing to buy Russian diesel after Trump-Putin deal: ட்ரம்ப்-புடின் ஒப்பந்தத்திற்குப் பிறகு ரஷ்ய டீசலை வாங்க எண்ணெய் வர்த்தகர்கள் மறுப்பு.
அமெரிக்காவிற்கு ரஷ்ய டீசலை ஏற்றிச் சென்ற குறைந்தது மூன்று கப்பல்கள் தங்கள் பாதையை மாற்றிக்கொண்டதால், அமெரிக்க ஜனாதிபதி டொனால்ட் ட்ரம்ப் மற்றும் ரஷ்ய ஜனாதிபதி விளாடிமிர் புடின் இடையே அக்டோபரில் செய்துகொண்ட ஒப்பந்தத்தின் மீது சந்தேகம் எழுந்துள்ளது.
நான்கு கப்பல்கள்
ரஷ்யா தனது டீசல் இருப்புகளை அமெரிக்க மற்றும் உலகச் சந்தைகளுக்கு வழங்கலாம் என்று ட்ரம்ப் ஒப்புக்கொண்டு ஏறக்குறைய ஒரு மாதம் ஆகியும், நடைமுறையில் உள்ள தடைகளை மீறி இதுவரை ஒரு சொட்டு டீசல் கூட அமெரிக்காவை வந்தடையவில்லை.
இதற்கிடையில், ஈரான் விவகாரத்தில் அமெரிக்கா-இஸ்ரேல் போர் தொடங்கியதிலிருந்து அமெரிக்காவில் டீசல் விலை கிட்டத்தட்ட இருமடங்காக உயர்ந்துள்ளது.
இந்த ஒப்பந்தம் மேற்கொள்ளப்பட்டதிலிருந்து, ரஷ்யா டீசல் நிரப்பப்பட்ட மொத்தம் நான்கு கப்பல்களை அனுப்பியுள்ளது. ரஷ்யாவின் தாலிஸ்மேன் என்ற எண்ணெய் கப்பலும், சியரா லியோனில் பதிவு செய்யப்பட்ட லெருவோ என்ற கப்பலும், அமெரிக்காவின் கிழக்குக் கடற்கரையை நோக்கி கடந்த மாதம் பால்டிக் துறைமுகமான பிரிமோர்ஸ்கிலிருந்து புறப்பட்டன.
ஆனால், தற்போது வெளியாகியுள்ள தரவுகளின் அடிப்படையில், ஒன்று பிரேசிலை நோக்கியும், மற்றொன்று மத்தியதரைக் கடலை நோக்கியும் பயணிக்கின்றன.
வட அட்லாண்டிக் பெருங்கடலில் இருக்கும் மூன்றாவது கப்பல், தனது இலக்கை நியூயார்க்கிலிருந்து மாற்றி, அடுத்தகட்ட உத்தரவுகளுக்காகக் காத்திருக்கும் நிலைக்கு மாறியுள்ளது; இதனால் அது எங்கு சரக்கை இறக்கும் என்பது இன்னும் முடிவாகவில்லை.
அக்டோபர் மாத இறுதியில் ரஷ்யாவின் பிரிமோர்ஸ்க் துறைமுகத்தில் சரக்கு ஏற்றப்பட்ட, செஷல்ஸ் நாட்டிற்குச் சொந்தமான மற்றும் தடைசெய்யப்பட்ட 'பீஸ்ட்' என்ற எண்ணெய் கப்பல், அமெரிக்காவை நோக்கிப் புறப்பட்டு, தற்போது அட்லாண்டிக் பெருங்கடலில் காணப்படுவதாக தெரிய வருகிறது.
அமெரிக்காவில் இடைக்காலத் தேர்தல் நெருக்கடியை எதிர்கொள்ளும் பொருட்டு, முன்னெடுக்கப்பட்ட இந்த ஒப்பந்தமானது ட்ரம்பின் வெறும் வெற்றுக் கூச்சலாகவே பார்க்கப்படுகிறது.
அக்டோபர் 9 அன்று புடினுடனான தொலைபேசி உரையாடலைத் தொடர்ந்து ட்ரம்ப் இந்த ஒப்பந்தத்தை முதன்முதலில் அறிவித்தார். ரஷ்யா 300,000 டன்களுக்கும் அதிகமான டீசலை அமெரிக்க மற்றும் உலகச் சந்தைகளுக்கு உடனடியாகக் கிடைக்கச் செய்யும் என்றும் அவர் கூறினார்.
ஏப்ரல் 7ஆம் திகதி வரை
டீசல் விநியோகங்களை முன்னெடுக்கும் நீண்ட தூர பயணங்களுக்கான டேங்கர் கப்பல்கள், ஒரு தடவைக்கு சுமார் 100,000 டன்கள் வரையிலான டீசலை ஏற்றிச் செல்லக்கூடியவை.
நவம்பர் மாதத்தில் மேலும் 500,000 டன்கள் வழங்கப்படும், அதைத் தொடர்ந்து உடனடியாக மேலும் 1 மில்லியன் டன்கள் வழங்கப்படும் என்று ட்ரம்ப் தனது ட்ரூத் சோஷியல் தளத்தில் பெருமையாகப் பதிவிட்டிருந்தார்.
புடினுடன் ட்ரம்ப் செய்துகொண்ட ஒப்பந்தத்தின்படி, ரஷ்ய டீசலை ஏப்ரல் 7ஆம் திகதி வரை விற்கவும், விநியோகம் செய்யவும், இறக்கவும் மற்றும் இறக்குமதி செய்யவும் அனுமதிக்கிறது.
ரஷ்யா-உக்ரைன் போரின் மத்தியில், ரஷ்ய எரிசக்தி ஆலைகளைத் தாக்கியதன் மூலம் டீசல் தட்டுப்பாடு ஏற்பட்டதாக உக்ரைன் மீது ட்ரம்ப் குற்றம் சாட்டியதைத் தொடர்ந்து இந்த ஒப்பந்தம் முன்னெடுக்கப்பட்டது.
இந்த நிலையில், பொதுவாகத் தடைகளுக்கு உள்ளாகும் ரஷ்ய டீசல் விற்பனைக்கு அமெரிக்க நிதியமைச்சகம் தற்காலிகமாக அனுமதி அளித்திருந்தபோதிலும், ரஷ்ய எரிபொருள் இறக்குமதி மீதான நாடாளுமன்றத்தின் தடை நீடிப்பதால், வர்த்தகர்களுக்கு மிகுந்த நிச்சயமற்ற நிலை நிலவுகிறது.
மேலும், இந்த இறக்குமதிகளைக் கையாள்வது, வங்கிகள், துறைமுக அதிகாரிகள் மற்றும் எரிபொருள் விநியோகஸ்தர்களை உரிமையியல் அல்லது குற்றவியல் பொறுப்புகளுக்கும், அத்துடன் எதிர்கால நாடாளுமன்ற விசாரணைகளுக்கும் உள்ளாக்கக்கூடும் என்று நாடாளுமன்ற உறுப்பினர்கள் எச்சரித்துள்ளனர்.
ஆனால், இந்த விலக்கு சட்டப்பூர்வமானது என்று ட்ரம்ப் நிர்வாகம் வாதிடுகிறது; இந்த விவகாரம் குறித்து எந்த நீதிமன்றமும் இதுவரை தீர்ப்பு வழங்கவில்லை.
அமெரிக்க வர்த்தகர்கள் ரஷ்ய டீசலை வாங்க மறுத்தாலும், ட்ரம்ப் அளித்துள்ள விலக்கைப் பயன்படுத்தி வேறு நாடுகள் வாங்க முன்வரலாம் என்றே ரஷ்யா கூறுகிறது.
]]>
