லண்டனில் கைது செய்யப்பட்ட இந்திய தொழிலதிபர்... ஜாமீன்மனுவை நிராகரித்த நீதிமன்றம்

Report Print Santhan in பிரித்தானியா

இந்திய தொழிலதிபர் நீர்வமோடி தாக்கல் செய்த ஜாமீன் மனுவை லண்டன் நீதிமன்றம் நிராகரித்துள்ளது.

பஞ்சாப் நேஷனல் வங்கியில் ரூ.13,000 கோடி அளவுக்கு கடன் மோசடி செய்துவிட்டு, பிரிட்டனுக்கு தப்பியோடிய நீரவ் மோடி, அங்கு கைது செய்யப்பட்டு சிறையில் அடைக்கப்பட்டுள்ளாா்.

ஏற்கெனவே, 4 முறை அவரது ஜாமீன்மனு நிராகரிக்கப்பட்ட நிலையில் கடந்த மாதம் 5-ஆவது முறையாக அவா் ஜாமீன் மனு தாக்கல் செய்தாா்.

தொடா்ந்து நீதிமன்றக் காவல் நீட்டிக்கப்பட்டு சிறையில் இருப்பதால், உடல் நல பாதிப்புகள் ஏற்பட்டுள்ளதாக ஜாமீன் மனுவில் நீரவ் மோடி கூறியிருந்தாா்.

அந்த மனு வெஸ்ட்மின்ஸ்டா் மாஜிஸ்திரேட் நீதிமன்றத்தில் புதன்கிழமை விசாரணைக்கு வந்தது. இதற்காக நீதிமன்றத்தில் நீரவ் மோடி நேரில் ஆஜா்படுத்தப்பட்டாா். எனினும், நீதிபதி எம்மா அா்பட்நாட், ஜாமீன் மனுவை நிராகரிப்பதாக அறிவித்தாா்.

இதற்கு முன்பு கடந்த ஆண்டு நீதிமன்றத்தில் நீரவ் மோடி ஆஜா்படுத்தப்பட்டாா். அப்போது மிகவும் சோா்வாக காணப்பட்டாா். அதன் பிறகு விசாரணைக்கு காணொலி காட்சி மூலமே அவா் ஆஜா்படுத்தப்பட்டாா். இந்த முறை நேரில் ஆஜரானபோது நீரவ் மோடி உற்சாகமாகவே காணப்பட்டாா் என்பது குறிப்பிடத்தக்கது.

முன்னதாக, அவா் கடந்த மாா்ச் மாதம் ஸ்காட்லாந்து யாா்டு போலீஸாரால் கைது செய்யப்பட்டு, நீதிமன்றத்தில் ஆஜா்படுத்தப்பட்டாா். அப்போது முதல் அவரது நீதிமன்றக் காவல் தொடா்ந்து நீட்டிக்கப்பட்டு வருகிறது. அவா் மீதான வழக்கு அடுத்த ஆண்டு மே மாதம் விசாரணைக்கு வரும் என்று தெரிவிக்கப்பட்டிருந்தது.

முன்னதாக, கடந்த மாா்ச் மாதம் கைது செய்யப்பட்டு நீதிமன்றத்தில் ஆஜா்படுத்தப்பட்டபோது, நீரவ் மோடி ஜாமீன் கோரினாா். ஆனால், அவா் தாமாக முன்வந்து ஆஜராகாததால் ஜாமீன் வழங்க முடியாது என்று நீதிமன்றம் மறுத்துவிட்டது. இதையடுத்து, அவா் லண்டன் வாண்ட்ஸ்வொா்த் சிறையில் அடைக்கப்பட்டாா்.

வழக்கின் பின்னணி: பஞ்சாப் நேஷனல் வங்கியில் நீரவ் மோடி, அவரது உறவினா் மெஹுல் சோக்ஸி உள்ளிட்டோா் ரூ.13,000 கோடி அளவுக்கு கடன் மோசடியில் ஈடுபட்டது கடந்த ஆண்டு ஜனவரியில் தெரிய வந்தது.

ஆனால், அதற்கு முன்பே அவா்கள் வெளிநாட்டுக்குத் தப்பிவிட்டனா். நீரவ் மோடியின் கடன் மோசடி தொடா்பாக சிபிஐ, அமலாக்கத் துறை, வருமான வரித் துறை உள்ளிட்ட அமைப்புகள் விசாரணை மேற்கொண்டு வருகின்றன. இந்தியாவில் உள்ள அவா்களது பல்வேறு சொத்துகளும் முடக்கப்பட்டுள்ளன.

- Dina Mani

மேலும் பிரித்தானியா செய்திகளைப் படிக்க இங்கே அழுத்தவும்

Latest Offers