கண் சொட்டு மருந்து பயன்படுத்திய 14 பேர் பார்வையிழப்பு, 4 பேர் உயிரிழப்பு: பதறவைத்துள்ள ஒரு செய்தி

அமெரிக்காவில் கண்களில் சொட்டு மருந்து போட்டுக்கொண்ட 4 பேர் உயிரிழந்துள்ளார்கள். மேலும், 14 பேர் பார்வையிழந்துள்ளதுடன், 4 பேருடைய கண்கள் அகற்றப்பட்டுள்ளன.

பதறவைத்துள்ள செய்தி

அமெரிக்காவில், கண்களில் ஒரு குறிப்பிட்ட சொட்டு மருந்தைப் போட்டுக்கொண்ட 81 பேர் இதுவரை பாதிக்கப்பட்டுள்ளதாக சுகாதாரத்துறை அதிகாரிகள் தெரிவித்துள்ளார்கள்.

Artificial Tears என்னும் கண் மருந்தின் 10 பிராண்ட்கள், குறிப்பாகச் சொன்னால், EzriCare Artificial Tears என்னும் கண் மருந்துதான் அதிக அளவில் பிரச்சினையை உருவாக்கியுள்ளது.

இந்த மருந்தைப் பயன்படுத்திய 4 பேர் உயிரிழந்துள்ளார்கள். 14 பேர் பார்வையிழந்துள்ளதுடன், 4 பேருடைய கண்கள் அறுவை சிகிச்சை மூலம் அகற்றப்பட்டுள்ளன என்னும் பதறவைக்கும் தகவல் வெளியாகியுள்ளது.

என்ன காரணம்?

இந்த பிரச்சினைக்கு காரணமாக அமைந்துள்ளது சூடோமோனாஸ் (Pseudomonas aeruginosa) என்னும் ஒரு கிருமியாகும்.

ஆனால், இந்த கிருமியை மட்டும் முழுமையாக குறை சொல்லிவிடமுடியாது. ஏனென்றால், இந்தக் கிருமி மண்ணிலும் தண்ணீரிலும், ஏன் நமது குளியலறையில் கூட காணப்படும் ஒரு சாதாரண கிருமியாகும்.  

ஆனால், குளியலறையில் இருக்கும் இந்த சாதாரண கிருமி நம் உடலுக்குள் நுழைந்துவிட்டால் பிரச்சினைகளை உருவாக்கிவிடுகிறது.

அதைவிட முக்கியமான விடயம் என்னவென்றால், இந்த பிரச்சினைக்கு மனிதர்களாகிய நாமும்தான் காரணம்.

அதாவது, எந்த சின்ன பிரச்சினை ஏற்பட்டாலும் உடனே அருகிலுள்ள மருது கடைக்கு ஓடி ஒரு ஆன்டிபயாடிக் மாத்திரையை வாங்கி போட்டுக்கொள்வது. அப்படி கண்ட கண்ட ஆன்டிபயாடிக்குகளை உட்கொள்வதால் என்ன ஆகும் என்றால், சாதாரணமாக இருக்கும் கிருமிகள் கூட, அந்த ஆன்டிபயாடிக்குகளை எதிர்க்கும் கிருமிகளாக காலப்போக்கில் ஆகிவிடும். அப்புறம் அந்தக் கிருமியை நீங்கள் எந்த ஆன்டிபயாடிக்காலும் கொல்ல முடியாது.

இப்படிப்பட்ட கிருமிகளை ஆன்டிபயாடிக்குகளுக்கு அடங்காத கிருமிகள் என்கிறோம். ஆக, ஆன்டிபயாடிக்குகளுக்கு அடங்காத கிருமிகளை எந்த ஆன்டிபயாடிக்குகளைக் கொண்டு கொல்வது?

இதுதான் பிரச்சினை!

தற்போது உலக நாடுகள் பலவற்றில், இப்படி ஆன்டிபயாடிக்குகளுக்கு அடங்காத கிருமிகள் பரவி பல உயிர்களை பலிவாங்கி வருகின்றன.

அவ்வகையான பாதிப்புகளில் ஒன்றுதான் இப்போது அமெரிக்காவில் பரவிவரும் இந்த கண் பிரச்சினை என்பது குறிப்பிடத்தக்கது.