சினிமாவில் நடிக்கப்போ... அரசியலில் தலையிடாதே: இளவரசர் ஹரியின் மனைவி மேகனை வெளுத்துவாங்கும் அரசியல்வாதிகள்

சர்ச்சைக்கு மறுபெயர் என பெயரெடுத்த மேகனை, அதாவது, பிரித்தானிய இளவரசர் ஹரியின் மனைவியை அமெரிக்க அரசியல்வாதிகள் வெளுத்துவாங்குகிறார்கள்.

நீ சினிமாவில் தொடர்ந்து நடிக்கலாம், தேவையில்லாமல் அமெரிக்க அரசியலில் தலையிடாதே என்றெல்லாம் திட்டும் அளவுக்கு மேகன் என்ன செய்துள்ளார் தெரியுமா?

அமெரிக்க சபாநாயகரான Nancy Pelosi மற்றும் Sen. Majority Leader என்னும் பொறுப்பு வகிக்கும் Chuck Schumer ஆகியோருக்கு கடிதம் ஒன்றை எழுதியுள்ளார் மேகன்.

அதில், சிறு வயதில் தான் பட்ட கஷ்டங்கள் குறித்து விவரித்துள்ள மேகன், பெற்றோருக்கு ஊதியத்துடன் கூடிய விடுப்பு கொடுப்பது குறித்த விடயம் ஒன்றை வலியுறுத்தி கடிதம் ஒன்றை எழுதியுள்ளார்.

ஆனால், ஏற்கனவே அமெரிக்க அதிபரான ஜோ பைடன் இது குறித்த ஒரு திட்டத்தை அறிவித்துள்ளார். அடுத்த 10 ஆண்டுகளுக்குள் புதிதாக குழந்தை பெற்றெடுத்த பெற்றோர், உடல் நலமில்லாத ஒரு குடும்ப உறுப்பினரைக் கவனித்துக்கொள்ளும் நிலையிலிருக்கும் ஒருவர், பாலியல் மற்றும் குடும்ப வன்முறையால் பாதிப்புக்குள்ளாவோர், அன்பிற்குரியவர் ஒருவரை இழந்தவர்கள் என பலதரப்பினருக்கு, ஊதியத்துடன் கூடிய 12 வார விடுப்பு வழங்கும் திட்டம் அமுல்படுத்தப்படும் என பைடன் அறிவித்துள்ளார்.

இப்போது அதே விடயத்தைக் குறித்துதான் மேகனும் கடிதம் எழுதியுள்ளார். ஆனால், அவர் எழுதியுள்ள கடிதத்தில், 'the office of the Duke and Duchess of Sussex' என்று கொடுக்கப்பட்டுள்ளது. அதாவது தனது பிரித்தானிய பதவியை பயன்படுத்தி அந்த கடிதத்தை அவர் எழுதியுள்ளார்.

இந்த கடிதம் அமெரிக்க அரசியல்வாதிகளை கொந்தளிக்கச் செய்துள்ளது. மேகன் தேவையில்லாமல் அமெரிக்க அரசியலில் தலையிடுவதாக அவர்கள் குற்றம் சாட்டுகிறார்கள்.  

Rep. Jason Smith என்னும் அரசியல்வாதி கூறும்போது, மேகன் இப்படி தேவையில்லாமல் அமெரிக்க அரசியலில் ஈடுபடுவதைப் பார்த்தால், குறிப்பாக மேகன், Duchess of Sussex என்ற பெயரில் இந்த கடிதத்தை எழுதியுள்ளதால், ராஜ குடும்பம் ஏன் அவர் மற்றும் ஹரியின் பட்டங்களை அதிகாரப்பூர்வமாக பறிக்கக்கூடாது என்ற கேள்விதான் என் மனதில் எழுகிறது என்று கூறியுள்ளார்.

Rep. Lisa McClain என்பவரோ, அமெரிக்க மக்களுடன் எந்த தொடர்பும் இல்லாமல் இருக்கும் மேகன், அரசியல் செய்வதை விட்டுவிட்டு, பேசாமல் மீண்டும் நடிக்கப்போகலாமே என்கிறார்.

மேகன் தனது கடிதத்தில், தான் சிறு வயதில் கஷ்டப்பட்டதாக குறிப்பிட்டிருக்க, ராஜ குடும்ப நிபுணர்களோ, அதற்குப் பின் அவர் பணக்காரரான தன் தந்தையுடன் வாழ்ந்ததையும், அதிக கட்டணம் செலுத்தும் ஒரு பள்ளி, மற்றும் கல்லூரிகளில் படித்ததையும், இப்போதும் பெரும் செல்வந்தர்களுடன் விருந்துகளில் பங்கேற்பதையும் சுட்டிக்காட்டுகிறார்கள். 

மேகனின் இந்த செயல்கள் அவர் அமெரிக்க அரசியலில் பங்கேற்க எடுக்கும் முயற்சிகளாக பார்க்கப்படுகின்றன. கடந்த அமெரிக்க தேர்தலின்போதும், ஹரியும் மேகனும் அரசியல் பேசி, முன்னாள் அமெரிக்க அதிபர் ட்ரம்ப் முதலானோரிடம் குட்டு வாங்கியது குறிப்பிடத்தக்கது.