நடிகர் புனித் ராஜ்குமாருக்கு சிகிச்சை அளித்த டாக்டருக்கு இப்படி ஒரு நிலைமையா? கொதிக்கும் ரசிகர்கள்

மறைந்த நடிகர் புனித் ராஜ்குமாருக்கு சிகிச்சை அளித்த மருத்துவர் ரமணராவிற்கு பொலிஸ் பாதுகாப்பு வழங்கப்பட்டுள்ளது.

கன்னடாவில் முன்னணி நடிகராக வலம் வந்தவர் புனித் ராஜ்குமார்(46). இவருக்கு சமூகவலைத்தளங்களில் தனி ரசிகர்கள் பட்டாளமே உள்ளது. இந்நிலையில் கடந்த மாதம் 29ஆம் திகதி யாரும் எதிர்பாராத வகையில் திடீரென மரணம் அடைந்தார்.

அவரது மரணச் செய்தி இந்திய திரையுலகையே அதிர்ச்சியடைய வைத்தது. அதே சமயத்தில் புனித் ராஜ்குமாரின் மரணத்திற்கு அவரது குடும்ப மருத்துவர் அலட்சியமாக செயல்பட்டதே காரணம் என்று அவரது ரசிகர்கள் பலரும் சமூக வலைதளங்களில் குற்றம் சாட்டினர்.

முன்னதாக புனித்ராஜ்குமார் உடற்பயிற்சிக்கூடத்தில் உடற்பயிற்சி செய்து கொண்டிருந்தபோது திடீரென நெஞ்சு வலி ஏற்பட்டுள்ளது. இதையடுத்து, அவர் தனது மனைவி அஸ்வினியுடன் இணைந்து தங்களது குடும்ப மருத்துவரான ரமணராவை நேரில் சென்று சிகிச்சைக்காக சந்தித்துள்ளார்.

புனித்ராஜ்குமாரை அவர் மேற்கொண்ட பரிசோதனையின்போது புனித்ராஜ்குமாருக்கு ரத்த அழுத்தமும், இதயத்துடிப்பும் சீராக இருந்துள்ளது. ஆனால் புனித்திற்கு தொடர்ந்து வியர்த்துக் கொண்டே இருந்துள்ளது.

உடனடியாக அவருக்கு ஈ.சி.ஜி. பரிசோதனையை மருத்துவர்கள் மேற்கொண்டுள்ளனர். அந்த பரிசோதனயைில் அவருக்கு மாரடைப்பு ஏற்பட்டிருப்பது கண்டறியப்பட்டது.

இதயத்தின் அழுத்தத்தைக் குறைப்பதற்காக காரின் உள்ளேயே அவரை படுத்துக்கொள்ளுமாறு மருத்துவர் ரமணராவ் அறிவுறுத்தியுள்ளார். கார் விக்ரம் மருத்துவமனையை 5 நிமிடங்களில் அடைந்தாலும் புனித்ராஜ்குமார் மருத்துவமனைக்கு செல்லும் வழியிலே பரிதாபமாக உயிரிழந்துள்ளார்.

ஒரு மாரடைப்பு ஏற்பட்ட நபரை முறையாக ஆம்புலன்ஸில் அனுமதித்து சிகிச்சை அளிக்காமல் காரிலே மருத்துவமனைக்கு செல்ல அறிவுறுத்தியதால் தான் புனித்ராஜ்குமார் உயிரிழந்தார் என்று ரசிகர்கள் சமூகவலைதளங்களில் ஆதங்கமாக பதிவிட்டு வருகின்றனர்