4 ஆண்டுகளாக Autoimmune நோயால் பாதிக்கப்பட்டுள்ளேன் - நடிகர் விஷ்ணு விஷால்

4 ஆண்டுகளாக Autoimmune நோயால் பாதிக்கப்பட்டுள்ளதாக நடிகர் விஷ்ணு விஷால் தெரிவித்துள்ளார்.

விஷ்ணு விஷால்

வெண்ணிலா கபடிகுழு படத்தின் மூலம் தமிழ் சினிமாவில் அறிமுகமான நடிகர் விஷ்ணு விஷால், குள்ளநரி கூட்டம், ஜீவா, கட்டா குஸ்தி உள்ளிட்ட பல்வேறு படங்களில் நடித்துள்ளார்.

தற்போது ஐஸ்வர்யா லக்ஷ்மி உடன் இணைந்து நடித்த கட்டா குஸ்தி - 2 திரைப்படம் வரும் ஜூலை 3 ஆம் திகதி திரைக்கு வர உள்ளது.

இந்நிலையில், தான் கடந்த 4 ஆண்டுகளாக Autoimmune நோயால் பாதிக்கப்பட்டுள்ளதாக விஷ்ணு விஷால் தெரிவித்துள்ளார்.

இது தொடர்பாக அவர் வெளியிட்டுள்ள அறிக்கையில், "முதலில், உங்கள் அன்புக்கும் அக்கறைக்கும் மனமார்ந்த நன்றி. சமீபத்திய என்னுடைய போஸ்ட் அனைத்திலும் நீங்கள் சொன்ன அத்தனை கமெண்ட்ஸ்களையும் நான் பார்த்தேன். 

AI கற்றுக்கொடுத்து மாதம் ரூ.1 கோடி வருமானம் - அசத்தும் 19 வயது இளைஞர்

அது எனக்கு மிகவும் நெகிழ்ச்சியையும் உற்சாகத்தையும் அளித்தது. அதனால் இந்த விஷயத்தை உங்களுடன் நேரடியாக பகிர்ந்து கொள்ள விரும்புகிறேன். 

சமீப காலமாக என் முகம் சோர்வாக இருப்பது போல இருப்பதை பலர் கவனித்திருக்கிறீர்கள். அதற்குக் காரணம், கடந்த 3-4 ஆண்டுகளாக நான் ஒரு Autoimmune நோயால் பாதிக்கப்பட்டு வருகிறேன். அதற்காக மருத்துவர்கள் பரிந்துரைத்த மருந்துகளை இடையிடையே எடுத்துக்கொண்டு வருகிறேன்.

அந்த மருந்துகளின் பக்கவிளைவு தான் அந்த சோர்வு.ஆனால் தற்போது நான் மேற்கொண்டு வரும் இந்த சிகிச்சை என் உடல்நலத்திற்கு மிகவும் அவசியமானது.

அதே சமயம், நீங்கள் காட்டும் அன்பும் ஆதரவும், நான் நம்பிக்கையுடன் செய்து வரும் வேலையும், மேலும் "கட்டா குஸ்தி 2" படத்திற்காக இரவு பகலாக உழைத்த ஒவ்வொருவரிடமும் எனக்குள்ள பொறுப்புணர்வும் என்னை தொடர்ந்து முன்னேறச் செய்கின்றன.

அதனால்தான் உடல்நிலை சவால்கள் இருந்தபோதிலும், படத்தின் விளம்பர நிகழ்ச்சிகளில் தொடர்ந்து பங்கேற்று வருகிறேன். என் உடல்நிலை விரைவில் குணமாகிவிடும். நீங்கள் காட்டிய அக்கறை, என்னை இன்னும் சிறப்பாக என் உடல்நலத்தை கவனித்துக்கொள்ள ஊக்குவித்துள்ளது.

ஒவ்வொரு கமெண்ட்ஸ் மற்றும் கருத்துக்கும், ஒவ்வொரு ஆதரவுக்கும் நான் மனமார்ந்த நன்றியைத் தெரிவிக்கிறேன்.

இப்போது கட்டாகுஸ்தி படத்தின் ப்ரோமோசன் வேலைகளில் இறுதிகட்ட பணிகளில் நாங்கள் இருக்கிறோம். மிகுந்த நம்பிக்கையுடனும் உற்சாகத்துடனும் இருக்கிறேன்.

வரும் ஜூலை 3-ஆம் தேதி திரையரங்குகளில் வெளியாகும் "சுட்டா குஸ்தி 2" படத்தை நீங்கள் அனைவரும் கண்டுகளித்திட காத்திருக்கிறேன்" என தெரிவித்துள்ளார்.

Autoimmune நோய்

நமது உடலில் உள்ள நோய் எதிர்ப்பு மண்டலம், வெளியில் இருந்து வரும் பாக்டீரியா, வைரஸ் உள்ளிட்ட கிருமிகளை தாக்கி தமது உடலை பாதுகாப்பாக வைத்திருக்கும்.

ஆனால், Autoimmune நோயால் பாதிக்கப்பட்டவர்களின் உடலில் உள்ள நோய்எதிர்ப்பு மண்டலம் நல்ல செல்கள் மற்றும் கெட்ட செல்கள் என பகுத்தறிய தெரியாமல் நமது உடலில் உள்ள ஆரோக்கியமான செல்களின் மீதும் தாக்குதல் நடத்தி பல்வேறு ஆரோக்கியப் பிரச்னைகளை ஏற்படுத்தும்.