கைகள் கட்டப்பட்ட நிலையில் உயிரிழந்துகிடந்த நடிகை: உண்மை வெளியானது
பிரித்தானிய நடிகை ஒருவர் கைகள் கட்டப்பட்ட நிலையில் உயிரிழந்து கிடந்தது கண்டுபிடிக்கப்பட்ட நிலையில், அவர் கொலை செய்யப்பட்டுள்ளது தெரியவந்துள்ளது.
ஓய்வு பெற்ற நடிகை
பிரித்தானிய திரைப்படங்களில் நடித்தவரான விக்கி ரிச்சர்ட்ஸ் என்னும் (Viscella Richards Alias Vikki Richards, 79) நடிகை, Trinidad தீவில் வாழ்ந்துவந்தார்.
இரட்டைக் குடியுரிமை கொண்டவரான விக்கி, 6 வயதில் தன் குடும்பத்துடன் பிரித்தானியா வந்துள்ளார். திரைப்படங்கள், தொலைக்காட்சித் தொடர்கள், மேடை நாடகங்களில் நடித்த விக்கி, ஓய்வுக்குப் பின் Trinidad தீவுக்கே திரும்பிச் சென்றுள்ளார். விக்கிக்கு திருமணம் ஆகவில்லை, அவர் தனியாகத்தான் வாழ்ந்துவந்துள்ளார்.
சடலமாகக் கண்டெடுப்பு
இந்நிலையில், கடந்த புதன்கிழமையன்று, தனது வீட்டில் உயிரற்ற நிலையில் கண்டுபிடிக்கப்பட்டார் விக்கி. கைகள் கட்டப்பட்ட நிலையில், அவர் தனது படுக்கையில் உயிரிழந்து கிடந்ததை அவரது தோழி ஒருவர் கண்டுள்ளார்.
வீடு திறந்திருக்க, விக்கி உடலில் வெளிப்படையாக எந்த காயங்களுமின்றி உயிரிழந்துகிடந்துள்ளார். அதே நேரத்தில், அவரது வீட்டிலுள்ள பொருட்கள் எல்லாம் அலங்கோலமாக கிடந்துள்ளன.
ஆக, அவருக்குத் தெரிந்த யாரோதான் இதை செய்திருக்கவேண்டும் என பொலிசார் கருதுகிறார்கள். அத்துடன், விக்கியின் நகைகளும் மாயமாகியுள்ளதால், கொள்ளையடிப்பது அவர்கள் நோக்கமாக இருந்திருக்கலாம் என்றும் கருதும் பொலிசார், தொடர்ந்து விசாரணை மேற்கொண்டு வருகிறார்கள்.
உடற்கூறு ஆய்வில் தெரியவந்த உண்மை
இந்நிலையில், விக்கியின் உடற்கூறு ஆய்வு முடிவுகள் வெளியாகியுள்ளன. அவை, விக்கி தலை மற்றும் முகத்தில் கூர்மையற்ற ஆயுதம் ஒன்றால் தாக்கப்பட்டதால் உயிரிழந்ததாக தெரிவிக்கின்றன, அதாவது விக்கி கொலை செய்யப்பட்டுள்ளதாக உடற்கூறு ஆய்வு முடிவுகள் தெரிவிக்கின்றன.
விக்கியின் பிரிவால் வாடியிருப்பதாக தெரிவித்துள்ள கனடாவில் வாழும் விக்கியின் குடும்பத்தினர், விக்கி மரணம் தொடர்பாக யாருக்காவது ஏதாவது தகவல் தெரிந்தால் தெரியப்படுத்துமாறு கேட்டுக்கொண்டுள்ளனர்.
உள்நாட்டு மற்றும் வெளிநாட்டு செய்திகளை உடனுக்குடன் அறிந்துக்கொள்ள லங்காசிறி WHATSAPP இல் இணையுங்கள். |