புலம்பெயர்ந்தோரை வெளியேற்ற நிதி வேண்டும்... ஜேர்மனியின் AfD கட்சி புதிய திட்டம்

Germany's AfD party wants arms factory in their state: ஜேர்மனியின் AfD கட்சி தங்கள் மாகாணத்தில் ஆயுதத் தொழிற்சாலை ஒன்றை அமைக்க விரும்புகிறது.

ஜேர்மனியின் தீவிர வலதுசாரி கட்சியான AfD, தாங்கள் திட்டமிட்டுள்ள கட்டாய வெளியேற்ற நடவடிக்கைகளுக்குத் தேவையான நிதியைத் திரட்டுவதற்காக, தங்கள் மாகாணங்களில் ஒன்றில் ஆயுதத் தொழிற்சாலையை அமைக்க விரும்புகிறது.

எதிர்க்கவில்லை

கிழக்கு ஜேர்மன் மாகாணமான Saxony-Anhalt-ன் வருங்காலத் தலைவரான உல்ரிச் சிக்மண்ட், சங்கர்ஹவுசன் நகரில் திட்டமிடப்பட்ட பாதுகாப்புத் தொழில் முதலீட்டின் எதிர்காலம் குறித்து வியாழக்கிழமை நடைபெற்ற செய்தியாளர் சந்திப்பில் கேட்கப்பட்டபோது, ​​உள்நாட்டுப் பயன்பாட்டிற்கான ஆயுத உற்பத்தியை AfD கட்சி எதிர்க்கவில்லை என்று குறிப்பிட்டார்.

மேலும், ராணுவ உபகரணங்களின் உற்பத்தியை ஒட்டுமொத்தமாக எதிர்க்கவில்லை என குறிப்பிட்டுள்ள அவர்; எதிர்காலத்தில் மேற்கொள்ளப்படவுள்ள தாயகம் திரும்பும் மற்றும் நாடு கடத்தும் நடவடிக்கைகளுக்குத் தேவையான நிதி இயல்பாகவே எங்களுக்குத் தேவைப்படும் என்றார்.

அத்துடன் இது உள்நாட்டுப் பாதுகாப்பு, நமது சொந்த ஸ்திரத்தன்மை மற்றும் தேசியப் பாதுகாப்பு ஆகியவற்றின் நலனுக்கும் உகந்தது என்று அவர் குறிப்பிட்டுள்ளார்.

243 பேர்களுடன் கடலில் மாயமான இந்தோனேசியப் பயணிகள் கப்பல்

இதனிடையே, வெளியாகியுள்ள தகவலின் அடிப்படையில், இஸ்ரேலின் எல்பிட் சிஸ்டம்ஸ் (Elbit Systems) நிறுவனம், பிற ஜேர்மானிய நிறுவனங்களுக்கான உதிரிபாகங்களைத் தயாரிக்கும் தொழிற்சாலை ஒன்றை அங்கு அமைப்பது குறித்து பேச்சுவார்த்தை நடத்தி வருகிறது.

ஆனால், சுமார் 400 வேலைவாய்ப்புகளை உருவாக்கக்கூடிய அந்த இடத்தில், முழுமையான ஆயுத அமைப்புகள், ட்ரோன்கள் அல்லது பீரங்கி குண்டுகள் எதுவும் தயாரிக்கப்படாது என்று நகர அதிகாரிகள் தெரிவிக்கின்றனர்.

இதனிடையே, எல்பிட் சிஸ்டம்ஸ் தெரிவிக்கையில், ஜேர்மனியில் மேலும் விரிவாக்கம் செய்வதற்கான வாய்ப்புகளை தொடர்ந்து மதிப்பீடு செய்து வருவதாகவும்; இருப்பினும், எதிர்கால விரிவாக்கத்திற்காக இதுவரை எந்த இடங்களும் தெரிவு செய்யப்படவில்லை என்றும் குறிப்பிட்டுள்ளது.

எதிராகப் பிரச்சாரம்

குடியேற்றத்தை எதிர்க்கும் AfD கட்சியானது, முழுமையான பெரும்பான்மைக்குச் சற்று குறைவான ஆசனங்களுடன் வரலாற்றுச் சிறப்புமிக்க தேர்தல் வெற்றியைப் பெற்று மாகாணத்தில் அரசமைக்க முயன்று வரும் நிலையில்,

ஆட்சிக்கு வந்த முதல் நிமிடத்திலிருந்தே, நாடு கடத்தல் நடவடிக்கைகள், குடிமக்கள் ரோந்துப் பணிகள் மற்றும் அகதி குழந்தைகளுக்கெனத் தனி வகுப்பறைகள் ஆகியவற்றைச் செயல்படுத்த உறுதியளித்துள்ளது.

இதனிடையே, துல்லியமாக என்ன தயாரிக்கப்படுகிறது, எந்தச் சூழலில் தயாரிக்கப்படுகிறது என்பதையும், இது நம்மை வெளிநாட்டு மோதல்களில் ஈடுபடுத்தும் அபாயத்தைக் கொண்டிருக்கிறதா என்பதையும் நாங்கள் உன்னிப்பாக ஆராய விரும்புகிறோம் என்று உல்ரிச் சிக்மண்ட் கூறியுள்ளார்.

இத்திட்டத்திற்கு அளிக்கப்படும் எந்தவொரு ஆதரவும், AfD கட்சியுடனான ஒத்துழைப்பை நிராகரிக்காத ஒரே கட்சியான இடதுசாரி மக்கள்வாதக் கட்சியான BSW-வுடனான பேச்சுவார்த்தைகளைச் சிக்கலாக்கக்கூடும்.

AfD-ஐப் போலவே, உக்ரைனுக்கான ஜேர்மன் இராணுவ ஆதரவை எதிர்க்கும் BSW கட்சியானது, வெளிநாட்டுப் பாதுகாப்பு உற்பத்தியாளர்களை ஈர்ப்பதற்கான பொருளாதார வாதங்களை நிராகரித்து, சங்கர்ஹவுசன் திட்டத்திற்கு எதிராகப் பிரச்சாரம் செய்துள்ளது குறிப்பிடத்தக்கது.