போதைப்பொருள் உட்கொண்டதாக கூறிய விவகாரம்: இளவரசர் ஹரிக்கு மீண்டும் சிக்கல்

இளவரசர் ஹரி தனது ஸ்பேர் என்னும் சுயசரிதைப் புத்தகத்தில் தான் போதைப்பொருட்கள் சிலவற்றை உட்கொண்டு சோதித்துப் பார்த்ததாகத் தெரிவித்திருந்த விடயம் பெரும் சர்ச்சையை உருவாக்கியது.

நீதிமன்றம் சென்ற அமைப்பு

ஹரியும் அவரது மனைவி மேகனும், அமெரிக்காவில் சென்று குடியமர்ந்துள்ளது அனைவரும் அறிந்ததே.

ஆனால், அமெரிக்காவுக்கான விசா விண்ணப்பித்திலும், அதற்குப் பின்வரும் நேர்காணல்களிலும், சட்டவிரோத போதைப்பொருட்கள் வைத்திருக்கும், பயன்படுத்தும் அல்லது விநியோகிக்கும் விடயத்தில், எப்போதாவது, ஏதாவது சட்டத்தை மீறியிருக்கிறீர்களா என்ற கேள்வி இடம்பெற்றிருக்கும்.

அதற்கு, ’ஆம்’ என பதிலளிக்கும் பட்சத்தில், அந்த நபருடைய விண்ணப்பம் பொதுவாக நிராகரிக்கப்படும்.

அப்படியிருக்கும் நிலையில், தான் போதைப்பொருள் பயன்படுத்தியதாக தனது புத்தகத்தில் தெரிவித்திருக்கும் ஹரி, விசா விண்ணப்பத்தில் பொய் சொன்னாரா என்ற கேள்வி எழுந்தது.

ஆக, விசா தொடர்பான ஆவணங்களில் ஹரி பொய் சொன்னாரா என்பதை அறிவதற்காக Heritage Foundation என்னும் அமைப்பு, ஹரியின் புலம்பெயர்தல் ஆவணங்களைப் பார்வையிடக் கோரி முறையீடு செய்திருந்தது.

ஹரி பொய் சொல்லியதாக தெரியவந்தால், அவர் அமெரிக்காவிலிருந்து வெளியேற்றப்படலாம் என்னும் நிலையும் உருவானது.

அதைத் தொடர்ந்து Carl Nichols என்னும் நீதிபதி, இளவரசர் ஹரியின் விசா தொடர்பான ஆவணங்களை மீளாய்வு செய்ய கோரியிருந்தார்.

ஐந்து மாதங்கள் ஹரியின் ஆவணங்களை ஆய்வு செய்தபின், அவர் விசா தொடர்பான ஆவணங்கள் இளவரசர் ஹரியின் தனியுரிமை கருதி வெளியிடப்படாது என தீர்ப்பளித்து வழக்கை முடித்துவைத்தார்.

இளவரசர் ஹரிக்கு மீண்டும் சிக்கல்

ஆனால், The Heritage Foundation அமைப்பு அந்த வழக்கை மீண்டும் துவக்கவேண்டும் என கோரிக்கை விடுத்துள்ளது.

வழக்கில் சமர்ப்பிக்கப்பட்ட சில விடயங்கள் ரகசியமாக மேற்கொள்ளப்பட்டுள்ளதால், வழக்கு நியாயமாக நடத்தப்பட்டதா என சந்தேகம் ஏற்பட்டுள்ளதாக தெரிவித்துள்ள அந்த அமைப்பு வழக்கை மீண்டும் துவக்கவேண்டும் என கோரிக்கை விடுத்துள்ளது.

ஆகவே, இளவரசர் ஹரிக்கு மீண்டும் ஒரு தலைவலி உருவாகியுள்ளது எனலாம்.