முதல் பந்திலே ஆஸ்திரேலியாவை ஆட்டம் காண வைத்த வங்கதேசம்! டி20-யில் அபார வெற்றி: உச்சகட்ட மகிழ்ச்சியில் ரசிகர்கள்
வங்கதேச அணிக்கெதிரான முதல் டி20 போட்டியில், அவுஸ்திரேலியா அணி 23 ஓட்டங்கள் வித்தியாசத்தில் தோல்வியை சந்தித்துள்ளது.
மேத்யூ வேட் தலைமையிலான அவுஸ்திரேலியா அணி, வங்கதேசத்தில் சுற்றுப்பயணம் மேற்கொண்டு, அங்கு 5 போட்டிகள் கொண்ட டி20 தொடரில் விளையாடவுள்ளது.
இதில் இரு அணிகளுக்கிடையேயான முதல் டி20 போட்டி நேற்று டாக்காவில் நடைபெற்றது. அதன் படி டாஸ் வென்ற ஆஸ்திரேலியா அணி முதலில் பந்து வீச்சை தேர்வு செய்தது.
வங்கதேச அணிக்கு துவக்க வீரர்களாக மொகமது நயிம் மற்றும் சவுமியா சர்கார் களமிறங்கினர். இதில் சவுமியா சர்கார் 2 ஓட்டங்கள் எடுத்த நிலையில், ஆட்டத்தின் 4-வது ஓவரில் ஹசல்வுட் பந்து வீச்சில் ஆட்டமிழக்க, அடுத்து வந்த ஷகிப் அல்ஹசன் சிறப்பாக ஆட, மற்றொரு துவக்க வீரர் மொகமது நயிம் 30 ஓட்டங்கள் எடுத்த நிலையில் வெளியேறினார்.
இவரைத் தொடர்ந்து மகமதுல்லா 20 ஓட்டங்கள், நூரல் ஹாசன் 3, சிறப்பாக விளையாடி வந்த ஷகிப் அல்ஹசன் 36 ஓட்டங்களில் என வெளியேற, இறுதியாக வங்கதேச அணி 20 ஓவர் முடிவில் 7 விக்கெட் இழப்பிற்கு 131 ஓட்டங்கள் எடுத்தது.
அவுஸ்திரேலியா அணியில் அதிகபட்சமாக ஜோஸ் ஹசல்வுட் மூன்று விக்கெட்டுகள் வீழ்த்தினார். இதைத் தொடர்ந்து 132 ஓட்டங்கள் எடுத்தால் வெற்றி என்ற எளிதான இலக்குடன் களமிறங்கிய அவுஸ்திரேலியா அணிக்கு ஆரம்பமே அதிர்ச்சி காத்திருந்தது.
துவக்க வீரரான அலெக்ஸ் கேரி முதல் பந்திலே டக் அவுட் ஆகி பெளவிலியன் திரும்ப, அவரைத் தொடர்ந்து மற்றொரு துவக்க வீரர் ஜோஸ் பிலிப் 9 என வெளியேற, அவுஸ்திரேலியா அணியின் விக்கெட்டுகள் சீட்டு கட்டு போல் சரிந்தன.
இருப்பினும் மிட்சல் மார்ஷ் மட்டும் கடைசி வரை போராடிய நிலையில், அவரும் 45 ஓட்டங்களில் அவுட்டாக, அவுஸ்திரேலியா அணி இறுதியாக 20 ஓவர் முடிவில் அனைத்து விக்கெட்டுகளையும் இழந்து வெறும் 108 ஓட்டங்கள் மட்டுமே எடுத்து.
23 ஓட்டங்கள் வித்தியாசத்தில் தோல்வியை சந்தித்தது. வங்கதேச அணியில் அதிகபட்சமாக நசும் அகமத் 4 ஓவர் வீசி, 19 ஓட்டங்கள் விட்டுக் கொடுத்து 4 விக்கெட்டுகள் வீழ்த்தினார்.
இந்த வெற்றியின் மூலம் வங்கதேச அணி ஐந்து போட்டிகள் கொண்ட டி20 தொடரில் 1-0 என்று முன்னிலை வகிக்கிறது. மேலும் சொந்த மண்ணில் அவுஸ்திரேலியாவை கதறவிட்ட வங்கதேச அணிக்கு அந்நாட்டு ரசிகர்கள் தங்கள் வாழ்த்துக்களை கூறி வருகின்றனர்.