பிரபல நடிகரின் காலை உடைத்த பாஜகவினர்: மனைவியே போட்ட மாஸ்டர் பிளான்

பிரபல சின்னத்திரை மற்றும் திரைப்பட நடிகர் வெங்கடேஷை அவரது மனைவியே திட்டம் தீட்டி பாஜகவினரை ஏவி கால்களை உடைத்த சம்பவம் அம்பலமாகியுள்ளது.

பிரபல தனியார் தொலைக்காட்சி ஒன்றில் ஒளிபரப்பான 'அசத்தப்போவது யாரு' மற்றும் 'கலக்கப்போவது யாரு' உள்ளிட்ட காமெடி நிகழ்ச்சிகளில் பங்கேற்று பிரபலாமனவர் நடிகர் வெங்கடேஷ்(50). இவர் 'கருப்பசாமி குத்தைகைதாரர்', 'சீடன்' உள்ளிட்ட பல திரைப்படங்களில் நடித்துள்ளார்.

இவர் மதுரை தபால் தந்தி நகர் பகுதியில் வசித்துவருகிறார். மதுரையில் தற்போது விளம்பர ஏஜென்சி நடத்திவரும் வெங்கடேஷ், விளம்பரங்கள் எடுப்பது, நிகழ்ச்சிகளை ஒருங்கிணைப்பது போன்ற வேலைகளை செய்து வருகிறார்.

இதனிடையே, கோவையைச் சேர்ந்த பெண்ணுடன் திருமணத்தை மீறிய உறவில் இருந்துள்ளார் வெங்கடேஷ். இது அவரது மனைவி தெரியவர அதனை கண்டித்ததாக கூறப்படுகிறது. இதனால் இருவருக்குமிடையே அவ்வப்போது வாக்குவாதம் ஏற்பட, வெங்கடேஷ் பானுமதிக்கு விவாகரத்து நோட்டீஸ் அனுப்பியுள்ளார்.

விவாகரத்து வழக்கு நீதிமன்றத்தில் நடந்து வரும் நிலையிலும் இருவரும் ஒரே வீட்டிலேயே வசித்து வந்துள்ளார்.

இந்த நிலையில், கணவரை தன்னுடன் வீட்டிலேயே வைத்திருக்க முடிவு செய்த பானுமதி தனது வீட்டில் கார் ஓட்டுநராக பணிபுரியும் மோகன் உதவியுடன் வெங்கடேஷ் காலை உடைத்து வீட்டிலேயே கிடைக்கும்படி செய்யவேண்டும் என திட்டம் தீட்டினார்.

இதற்காக மோகன் ராஜ்குமார் என்பவரை பானுமதிக்கு அறிமுகம் செய்து வைத்திருக்கிறார். வெங்கடேஷின் காலை உடைக்க ராஜ்குமார் ஒரு லட்சம் ரூபாய் கேட்டதாக கூறப்படுகிறது. அதனால் அந்த திட்டத்தை கைவிட்டு தகுந்த சந்தர்ப்பத்திற்காக காத்திருந்தார் பானுமதி.

இதனிடையே, சமூக வலைதளங்களில் அடிக்கடி அரசியல் கருத்து பேசிவந்த வெங்கடேஷ், சமீபத்தில் பாஜக கட்சிக்கு எதிராகவும், உள்துறை அமைச்சர் அமித்ஷா, பிரதமர் மோடி ஆகியோருக்கு எதிரான கருத்துக்களை பதிவிட்டதாக கூறப்படுகிறது. அதனால் பாஜகவினர் அவரை நேரில் சென்று மிரட்டியதாக கூறப்படுகிறது.

இதனை அறிந்த பானுமதி, இந்த சந்தர்ப்பத்தை சரியாகப் பயன்படுத்திக் கொள்ள திட்டம் தீட்டினார். கணவர் மீது வெறுப்பில் இருந்த அவர், தன்னைப் போலவே கோபத்தில் இருந்த பாஜக பிரமுகர் வைரமுத்து என்பவரை அணுகினார்.

அனைத்தும் வசதியாக அமைந்ததும், ஜூன் 15 இரவு வெங்கடேஷை திருப்பாலை செல்லும் வழியில் உள்ள நாகனாகுளம் கண்மாய் பகுதிக்கு வரவழைத்து கட்டையால் இரு கால்களையும் அடித்து உடைத்தனர்.

வெங்கடேஷ் அலறல் சத்தம் கேட்டு அப்பகுதி மக்கள் தல்லாகுளம் காவல்துறைக்கு தகவல் கொடுக்க, பொலிஸார் வெங்கடேஷை மீட்டு மதுரை அரசு ராஜாஜி மருத்துவமனையில் அனுமதித்தனர்.

இதுகுறித்து தல்லாகுளம் காவல்துறையில் வெங்கடேஷ் அளித்த புகாரின் அடிப்படையில் வழக்குப் பதிவுசெய்த பொலிஸார், வெங்கடேஷ் மனைவி பானுமதி(48), ராஜ்குமார்(37), மோகன்(40), வைரமுத்து(38), மலைச்சாமி(35), ஆனந்தராஜ் (37) ஆகிய 6 பேரையும் கைது செய்து சிறையில் அடைத்தனர். மேலும் தலைமறைவாக இருக்கும் துளசி என்பவரைத் தேடி வருகின்றனர்.