அவன் உயிரிழந்தது இந்தியாவிலிருக்கும் அவனது தாய்க்குத் தெரியாது: கனடாவில் கொல்லப்பட்ட இளைஞரின் தந்தை கண்ணீர்

கடந்த திங்கட்கிழமை கனடாவின் ஒன்ராறியோவிலுள்ள மில்ட்டன் நகரில் நடந்த துப்பாக்கிச்சூட்டில் காயமடைந்த இந்திய இளைஞர் ஒருவர் உயிரிழந்துள்ளார்.

அவர் உயிரிழந்த விவரம் இன்னமும் இந்தியாவிலிருக்கும் அவரது தாய்க்குத் தெரியாது என்று கூறி கண்ணீர் வடித்துள்ளார் அவரது தந்தை.

கடந்த திங்கட்கிழமை கனடாவின் ஒன்ராறியோவிலுள்ள மில்ட்டன் நகரில் நடந்த துப்பாக்கிச்சூட்டில் காயமடைந்த இந்திய இளைஞர் உயிரிழந்ததாக பொலிசார் தெரிவித்துள்ளார்கள்.

திங்கட்கிழமை நடந்த துப்பாக்கிச்சூட்டில் பொலிசாரான Andrew Hong (48) மற்றும் Shakeel Ashraf (38) என்னும் இருவர் கொல்லப்பட்டார்கள், மூன்று பேர் காயமடைந்தார்கள்.

காயமடைந்தவர்களில் இந்தியரான சத்விந்தர் சிங் (Satwinder Singh, 28)ம் ஒருவர்.

சத்விந்தரின் தந்தை, துபாயில் ட்ரக் சாரதியாக பணிபுரிகிறார். மகன் சுடப்பட்ட செய்தி அறிந்த அவர் மகனைக் காண கனடாவுக்கு ஓடோடிவந்துள்ளார். கோவிட் காலகட்டத்துக்கு முன்புதான் அவர் கடைசியாக தன் மகனை பார்த்துள்ளார்.

இந்நிலையில், சத்விந்தர் பிழைக்க வாய்ப்பில்லை என்று கூறி மருத்துவர்கள் அவருக்கு அளிக்கப்பட்டுவந்த செயற்கை சுவாசத்தை, அவரது உறவினர்கள் அனுமதியுடன் நிறுத்தியுள்ளனர்.

சத்விந்தரின் தாய் மற்றும் சகோதரிக்கோ, அவர் இறந்த விடயம் இன்னமும் தெரிவிக்கப்படவில்லை என்று கூறி கண்ணீர் வடித்துள்ளார் அவரது தந்தை.

இதற்கிடையில், தாக்குதல்தாரியான Sean Petrie (40) பொலிசாரால் சுட்டுக்கொல்லப்பட்டார். அவர் குறித்த விசாரணைகள் தொடர்கின்றன.