அமெரிக்க மதுபானங்கள் மீதான தடையை நீக்க கனேடியா மாகாணங்களைக் கேட்டுக்கொண்ட பிரதமர்

Canada's provinces to end US alcohol ban: அமெரிக்க மதுபானங்கள் மீதான தடையை நீக்குமாறு கனடாவின் மாகாணங்களை பிரதமர் கேட்டுக்கொண்டுள்ளார்.

அமெரிக்காவுடனான வர்த்தக ஒப்பந்தம் நெருங்கி வரும் நிலையில், மதுபானக் கடைகள் மற்றும் பல்பொருள் அங்காடிகளில் அமெரிக்க மதுபானங்களை மீண்டும் இடம்பெறச் செய்யுமாறு கனடிய மாகாணங்களை பிரதமர் மார்க் கார்னி கேட்டுக்கொண்டுள்ளார்.

முடிவுக்குக் கொண்டுவர

வர்த்தகப் பேச்சுவார்த்தையாளர்கள் கடந்த நான்கு நாட்களில் நான்காவது முறையாக வியாழக்கிழமை வாஷிங்டனில் சந்தித்தனர். இச்சந்திப்பிற்குப் பிறகு கனடா-அமெரிக்க வர்த்தக அமைச்சர் டொமினிக் லெப்லாங்க் செய்தியாளர்களிடம், ஒப்பந்தம் மிக விரைவில் எட்டப்பட இருப்பதாகத் தெரிவித்தார்.

முன்மொழியப்பட்ட ஒப்பந்தத்தில் என்னென்ன அம்சங்கள் இடம்பெற்றுள்ளன என்பது குறித்த விவரங்கள் இன்னும் அறிவிக்கப்படவில்லை; இருப்பினும், அமெரிக்க விஸ்கி மற்றும் பிற மதுபானங்கள் மீதான புறக்கணிப்பை முடிவுக்குக் கொண்டுவருமாறு கார்னி தங்களைக் கேட்டுக்கொண்டதாக கனடாவின் மாகாண முதல்வர்கள் தெரிவித்தனர்.

அமெரிக்க மதுபானங்கள் மட்டுமின்றி, கனடிய எஃகு, அலுமினியம் மற்றும் கார்கள் ஆகியவையும் இந்த ஒப்பந்தத்தில் இடம்பெறக்கூடும் என்று தகவல்கள் தெரிவிக்கின்றன.

இதனிடையே, கனடியப் பொருட்கள் பலவற்றின் மீது புதன்கிழமை இரவு முதல் புதிய சுங்க வரிகளை விதிக்கப்போவதாக மிரட்டியிருந்த அமெரிக்க ஜனாதிபதி டொனால்ட் ட்ரம்ப், அந்த ஒப்பந்தத்தின் விவரங்களை இறுதி செய்வதற்கான வாய்ப்பை அளிக்கும் வகையில் அவற்றைச் செயல்படுத்தும் நடவடிக்கையைத் தற்காலிகமாக நிறுத்தி வைத்தார்.

கனடா மீதான வரி விதிப்பு அச்சுறுத்தலை இடைநிறுத்திய ட்ரம்ப்

அமெரிக்க விவசாயிகளுக்கான இறக்குமதி வரிகளை நீக்க கனடா ஒப்புக்கொண்டுள்ளதாக ட்ரம்ப் புதன்கிழமையன்று தெரிவித்தார்; இருப்பினும், எந்தெந்த விவசாயத் துறைகள் இதனால் பயனடையும் என்பதை அவர் குறிப்பிடவில்லை.

கனடாவின் எஃகு, அலுமினியம், வாகனங்கள் மற்றும் மரக்கட்டைகள் மீதான வரிகளை அமெரிக்கா கைவிடவோ அல்லது குறைக்கவோ செய்யும் ஒரு ஒப்பந்தத்தை கனடா நாடி வருகிறது.

வெள்ளிக்கிழமை மாலைக்குள் நிறைவடையக்கூடிய ஒப்பந்தத்தின்படி, கனடிய எஃகு மற்றும் அலுமினியம் மீதான அமெரிக்க வரிகள் 50 சதவீதத்திலிருந்து 25 சதவீதமாகக் குறைக்கப்படும் எனத் தெரிவிக்கப்பட்டுள்ளது.

விற்பனைக்குத் தடை

அமெரிக்க மற்றும் கனடிய ஊடகங்களின் செய்திகளின்படி, கனடாவில் தயாரிக்கப்பட்ட வாகனங்கள் மீதான தனது முதன்மை சுங்க வரியை அமெரிக்கா 25 சதவீதத்திலிருந்து 15 சதவீதமாகக் குறைக்கக்கூடும்.

பிரதமர் புதன்கிழமை பிற்பகல் தனது அமைச்சரவையையும் கனடிய மாகாணங்களின் தலைவர்களையும் சந்தித்து அவர்களுக்கு விளக்கமளித்துள்ளார்.

கார்னியின் சந்திப்பைத் தொடர்ந்து, அமெரிக்க மதுபானத்தை கனடிய சந்தைகளுக்கு மீண்டும் கொண்டுவருமாறு பிரதமர் மாகாணங்களைக் கேட்டுக்கொண்டதாக நோவா ஸ்கோஷியா மாகாண முதல்வர் டிம் ஹூஸ்டன் தெரிவித்தார்.

ட்ரம்பின் வரிப்போருக்குப் பதிலடியாக, கடந்த ஆண்டு கனடாவின் பெரும்பாலான மாகாணங்கள் அமெரிக்க மதுபான விற்பனைக்குத் தடை விதித்தன.

கடந்த ஆண்டு தொடக்கத்தில் புறக்கணிப்பு அமுலுக்கு வந்ததிலிருந்து, கனடாவுக்கான ஏற்றுமதி 70 சதவீதத்திற்கும் மேல் சரிந்துள்ளதாக அமெரிக்க ஒயின் மற்றும் மதுபானத் தொழில் துறை தெரிவித்துள்ளது குறிப்பிடத்தக்கது.