கனடா காட்டுத்தீ... மிக மோசமான சூழலை எதிர்கொள்ளத் தயாராக மக்களுக்கு எச்சரிக்கை

Residents warned to brace for the worst: கனடாவில் காட்டுத்தீ கட்டுப்பாடின்றி எரிந்து வருவதால், மிக மோசமான சூழலை எதிர்கொள்ளத் தயாராக இருக்குமாறு மக்களுக்கு எச்சரிக்கை.

மேற்கு கனடாவில் வெள்ளிக்கிழமை கண்டறியப்பட்ட காட்டுத்தீ வேகமாகப் பரவி அதன் பரப்பளவு இருமடங்காக அதிகரித்துள்ள நிலையில், ஆயிரக்கணக்கான மக்கள் தங்கள் வீடுகளை விட்டு வெளியேற வேண்டிய கட்டாயம் ஏற்பட்டதையடுத்து அங்கு அவசரநிலை பிரகடனப்படுத்தப்பட்டுள்ளது.

பிரிட்டிஷ் கொலம்பியா காட்டுத்தீ சேவையின் தகவல்படி, பால்ட் ரேஞ்ச் தீ தற்போது சம்மர்லேண்ட், பீச்லேண்ட் மற்றும் பிரிட்டிஷ் கொலம்பியாவின் பிற பகுதிகளில் 53 சதுர மைல்களுக்கும் அதிகமான பரப்பளவை ஆக்கிரமித்துள்ளது.

இதனிடையே, தீப்பிழம்புகள் மிகவும் உயரமாக இருந்ததால் அவை தமக்கே உரிய வானிலை அமைப்புகளை உருவாக்கியதாகவும், அதன் விளைவாக மின்னல் உருவானதாகவும் அதிகாரிகள் தெரிவித்துள்ளனர்.

பிரிட்டிஷ் கொலம்பியா மாகாணத்தின் முதல்வர் டேவிட் எபி சனிக்கிழமையன்று நடைபெற்ற செய்தியாளர் சந்திப்பில், தீயணைப்பு அதிகாரி ஒருவர் இந்தத் தீ விபத்தை வெடிகுண்டு வெடித்ததற்கு ஒப்பிட்டதாகத் தெரிவித்தார்.

சிறையில் இருப்பது போல... வளைகுடாவில் சிக்கியுள்ள கப்பல் ஊழியர்கள் வேதனை

இந்த நிலையில், அவசரநிலை பிரகடனமானது, பயணக் கட்டுப்பாடுகள் மற்றும் விலையேற்றத்தைத் தடுப்பதற்கான விநியோகப் பாதுகாப்புகள் உள்ளிட்ட சிறப்பு அதிகாரங்களையும், மீட்புப் பணிகளை ஒருங்கிணைப்பதற்கான கூடுதல் வளங்களையும் மாகாண அரசாங்கத்திற்கு வழங்குகிறது.

சுமார் 12,000 மக்கள் வசிக்கும் சம்மர்லேண்ட் பகுதி, மிகக் கடுமையாகப் பாதிக்கப்பட்ட பகுதிகளில் ஒன்றாக மாறியுள்ளதுடன், அங்கிருந்த மக்கள் வெளியேற்றப்பட வேண்டிய கட்டாயமும் ஏற்பட்டது.

சுமார் 6,500 பேர் வசிக்கும் பீச்லேண்ட் பகுதியின் சில பகுதிகளில் இருந்த மக்களுக்கும் இதே நிலை ஏற்பட்டது. பால்ட் ரேஞ்ச் (Bald Range) காட்டுத்தீ இந்த கோடையில் மிகப்பெரிய அளவிலான வெளியேற்ற நடவடிக்கையைத் தூண்டியுள்ளது; பிரிட்டிஷ் கொலம்பியா முழுவதும் 20,000-க்கும் மேற்பட்ட மக்கள் தங்கள் வீடுகளை விட்டு வெளியேறியுள்ளதாக அதிகாரிகள் தெரிவிக்கின்றனர்.

அதிகாரிகள் வெளியிட்டுள்ள தகவலின்படி, மத்திய ஒகனகன் மற்றும் ஒகனகன்-சிமில்கமீன் பிராந்திய மாவட்டங்களும், ஸ்ன்பிங்க்டன் இந்திய பூர்வகுடியினக் குழுவும், சம்மர்லேண்ட் மற்றும் பீச்லேண்ட் மாவட்டங்களும் வெளியேற்ற உத்தரவுகளைப் பிறப்பித்துள்ளன, மேலும் சில பகுதிகளில் வெளியேற்ற எச்சரிக்கைகளும் விடுக்கப்பட்டுள்ளன.

ஒகனகனில், ஏராளமான குதிரைகளை வெளியேற்றுவதற்கு அப்பகுதி மக்கள் சிரமப்பட்டு வருவதாகவும் தகவல் வெளியாகியுள்ளது. இந்தக் கோடைக்காலத்தில் கனடா முழுவதும் நூற்றுக்கணக்கான காட்டுத்தீகள் கொழுந்துவிட்டு எரிந்தன; குறிப்பாக ஜூலை மாதத்தில் ஒன்ராறியோவில் மட்டும் சுமார் 200 காட்டுத்தீகள் எரிந்ததால், ரொறன்ரோவின் காற்றுத் தரம் சில நாட்களுக்கு உலகின் மிக மோசமான நிலைகளில் ஒன்றாக மாறியது.

கனடாவில் ஏற்பட்ட காட்டுத்தீயிலிருந்து எழுந்த புகை அமெரிக்காவின் மினசோட்டா மற்றும் நியூயார்க் உள்ளிட்ட பகுதிகளுக்குப் பரவியது; இதனால், அமெரிக்காவின் வடக்குப் பக்கத்து நாடான கனடா மீது புதிய வரிகளை விதிப்பதாக அமெரிக்க ஜனாதிபதி டொனால்ட் ட்ரம்ப் அச்சுறுத்தினார் என்பது குறிப்பிடத்தக்கது.