மீண்டும் அமெரிக்கப் பொருட்களைப் புறக்கணிக்கத் தொடங்கிய கனேடிய மக்கள்

Canadians on boycotting Trump’s America: கனேடிய மக்கள் மீண்டும் ட்ரம்பின் அமெரிக்காவைப் புறக்கணிக்கத் தொடங்கியுள்ளனர்.

கடந்த வார இறுதியில் இரு நாடுகளுக்கும் இடையிலான வர்த்தகப் பேச்சுவார்த்தைகள் முறிந்ததைத் தொடர்ந்து, கனடாவின் 20 பில்லியன் அமெரிக்க டொலர் மதிப்பிலான சரக்குகள் மீது அமெரிக்கா இந்த வாரம் 50 சதவீத சுங்க வரியை விதித்துள்ளது;

இதற்குப் பதிலடியாக அதே அளவுக்கு வரி விதிக்கப்படும் என்று கனடியப் பிரதமர் மார்க் கார்னி உறுதியளித்துள்ளார். இதனையடுத்து, வியாழக்கிழமையன்று, டொனால்ட் ட்ரம்ப், ஒன்ராறியோ ஏரிக்கு அமெரிக்கா ஏரி எனப் பெயர் மாற்றுமாறு ஃபெடரல் நிர்வாகத்திற்கு உத்தரவிட்டுப் பதிலடி கொடுத்தார்.

அமெரிக்க ஜனாதிபதியின் வர்த்தகப் போர் மற்றும் கனடாவை இன்னொரு மாகாணமாக இணைத்துக்கொள்வது குறித்த அச்சுறுத்தல்களுக்குப் பதிலடியாக, கடந்த ஆண்டின் தொடக்கத்தில் கனடியர்களிடையே தொடங்கிய அமெரிக்கப் பொருட்கள் மற்றும் சேவைகளுக்கான பரவலான புறக்கணிப்பு நடவடிக்கைகளுக்கு இத்தகைய செயல்கள் மேலும் வலுசேர்த்துள்ளன.

இந்த நிலையில், அமெரிக்க நிர்வாகத்தின் அரசியல் மற்றும் பொருளாதார நிலைப்பாட்டிற்கு எதிர்வினையாகத் தங்கள் வாழ்க்கையில் எத்தகைய மாற்றங்களைச் செய்துகொண்டார்கள் என்பதை, கனடா முழுவதிலும் உள்ள 3,500-க்கும் மேற்பட்டோர் The Guardian நாளேடு நடத்திய இணையவழி அழைப்பின் வாயிலாகப் பகிர்ந்துகொண்டனர்.

பலர் ஆழ்ந்த கோபத்தையும் துக்கத்தையும் வெளிப்படுத்தியபோதிலும், இது ஒரு புதிய வாழ்க்கை முறைதான் என்பதில் உறுதியாக இருந்தனர்.

நேபாள எல்லைச் சோதனைச் சாவடி... சீன மீட்புக் குழுவினர் கண்ட அந்த அதிர வைக்கும் காட்சி

புதிய விளைபொருட்கள் உட்பட கனடிய மளிகைப் பொருட்களை மட்டுமே வாங்குவது மற்றும் எல்லைக்குத் தெற்கே (அமெரிக்காவிற்குள்) பயணம் செய்வதைப் புறக்கணிப்பது ஆகியவை பதிலளித்தவர்களிடம் அதிகம் காணப்பட்ட நடவடிக்கைகளாக இருந்தன.

அமெரிக்கத் தொழில்நுட்பம், Netflix, AmazonPrime, AppleTV மற்றும் Disney+ போன்ற ஸ்ட்ரீமிங் சேவைகள், பெட்ரோல், டெஸ்லா (Tesla) போன்ற வாகனங்கள் மற்றும் Jack Daniel’s உள்ளிட்ட விஸ்கி வகைகளுக்கான செலவுகளைச் செய்வதை கனடிய மக்கள் நிறுத்தியுள்ளனர்.

எக்ஸ், பேஸ்புக் மற்றும் இன்ஸ்டாகிராம் உள்ளிட்ட சமூக ஊடகத் தளங்களும் தவிர்க்கப்பட்டு வந்தன. ஜூலை மாதம், ஆங்கஸ் ரீட் நடத்திய ஒரு கணக்கெடுப்பில், மளிகைப் பொருட்கள் வாங்குபவர்களில் 40 சதவீதம் பேர், பொருட்கள் எங்கிருந்து வருகின்றன என்பதைத் தீவிரமாகச் சரிபார்ப்பதாகவும், அவர்களில் பெரும்பாலானோர் முடிந்தவரை அமெரிக்கப் பொருட்களைத் தவிர்ப்பதாகவும் கண்டறியப்பட்டது.

இதனிடையே, மளிகைக் கடைகள் மெக்சிகோ, பெரு, குவாத்தமாலா, சிலி மற்றும் தென்னாப்பிரிக்காவிலிருந்து வரும் விளைபொருட்களை அதிகளவில் வழங்கி வருகின்றன.

ரொறன்ரோவில் வசிக்கும் மற்றும் ஒரு நிதி நிறுவனத்தில் பணிபுரியும் 51 வயதான விக்ரம், அமெரிக்காவில் தனது குடும்பத்தினர் இருந்தபோதிலும் அங்கு செல்ல மறுத்துவிட்டதாகக் கூறினார். அதற்குப் பதிலாக அவர்கள் அவரைச் சந்திக்கிறார்கள்.

அவரும் அமெரிக்கத் தயாரிப்புகளைத் தவிர்ப்பதுடன், தற்போது அமேசான் சேவைகளைப் புறக்கணித்து வருகிறார். ஆல்பர்ட்டாவின் கால்கரியில் வசிக்கும் ஓய்வுபெற்ற பொறியாளரான 61 வயது கர்ட், அமெரிக்க விஸ்கிகளைச் சுவைக்கும் தனது குழுவினர் ஆண்டுதோறும் அதற்காகப் பெருந்தொகையை – அதாவது சுமார் 10,000 அமெரிக்க டொலர்களை – செலவிடுவதாகக் கூறினார்.

மேலும், ட்ரம்பின் விடுதலை நாள் மற்றும் முதல் கட்ட வரிவிதிப்புகளுக்குப் பிறகு, எங்கள் வெறுப்பை வெளிப்படுத்தும் ஒரு வழி, அமெரிக்க விஸ்கிகளை வாங்காமல் இருப்பதுதான் என்று நாங்கள் முடிவு செய்தோம், என்றார் அவர்.

அதனால், அன்று முதல் நாங்கள் ஒரு அமெரிக்க டொலர் கூட செலவழிக்கவில்லை என்றார். அவரது மனைவியும் இனி கலிபோர்னியா ஒயினை அருந்துவதில்லை என புறக்கணித்து வருகிறார்;

மேலும், 30 ஆண்டுகளுக்கும் மேலாக அமெரிக்காவிற்குத் தொடர்ந்து சென்று வந்த போதிலும், 2025 ஜனவரிக்குப் பிறகு தாங்கள் அங்கு செல்லவில்லை என்று கர்ட் கூறியுள்ளார்.