ஜெலென்ஸ்கியை வறுத்தெடுத்தது போல் நடக்கலாம்: சார்லஸ் மன்னர் - ட்ரம்ப் சந்திப்பில் எழுந்த அச்சம்

அமெரிக்க ஜனாதிபதி டொனால்ட் ட்ரம்பால் பொதுவெளியில் கடுமையாகச் சாடப்படும் சாத்தியமான அவமானத்திலிருந்து மன்னர் சார்லஸ் தப்பித்துள்ளார்.

கமெராக்கள் ஏதுமின்றி

ஜனாதிபதி ட்ரம்ப் மற்றும் சார்லஸ் மன்னர் இடையிலான எந்தவொரு சந்திப்பும் கமெராக்கள் இல்லாமல் நடைபெற வேண்டும் என்று வெள்ளை மாளிகை ஒப்புக்கொண்டதாகவும் தகவல் வெளியாகியுள்ளது.

மன்னருக்கும் அமெரிக்க ஜனாதிபதிக்கும் இடையிலான ஓவல் அலுவலகச் சந்திப்பு, கமெராக்கள் ஏதுமின்றி நடைபெற வேண்டும் என்று பிரித்தானிய அதிகாரிகள் தரப்பு வலியுறுத்தியுள்ளனர்.

உலக ஊடகங்களின் முன்னிலையில், ட்ரம்ப் உக்ரைன் ஜனாதிபதி வொலோடிமிர் ஜெலென்ஸ்கியை வறுத்தெடுக்கும் காட்சிகள் அதிர்வலைகளை ஏற்படுத்திய நிலையில், மீண்டும் அவ்வாறான ஒரு காட்சி அரங்கேறிவிடுமோ என்ற அச்சத்தின் காரணமாகவே இந்த முடிவு.

மன்னரின் பயணத்தைத் திட்டமிடுவதில் ஈடுபட்டுள்ள வட்டாரங்கள், செவ்வாய்க்கிழமை நடைபெறும் தனது முக்கிய இருதரப்பு சந்திப்பின் தொடக்கத்தில் சார்லஸ் புகைப்படங்ளுக்கு முகம் காட்டுவார் என்றும், ஆனால் அவர் சாராம்சமான எதைப் பற்றியும் பேசுவது பதிவு செய்யப்படாது என்றும் கூறுகின்றன.

மன்னரின் இந்த அரசுமுறைப் பயணம், கடந்த பல தசாப்தங்களிலேயே மிகவும் இக்கட்டான காலகட்டங்களில் ஒன்றாகத் திகழும் இத்தருணத்தில், இரு நாடுகளுக்கும் இடையிலான உறவைச் சீரமைக்க உதவும் என அமைச்சர்கள் வட்டாரத்தில் நம்பிக்கை வைத்துள்ளனர்.

இணங்க மறுக்கும் ஈரான்... பாதுகாப்பு ஆலோசகர்களுடன் அவசர ஆலோசனை நடத்தும் ட்ரம்ப்

ஈரான் போர் குறித்த பிரதமர் ஸ்டார்மர் மற்றும் சேன்ஸலர் ரேச்சல் ரீவ்ஸ் ஆகியோரின் விமர்சனங்களுக்குப் பதிலடியாகத் தக்க நடவடிக்கை எடுப்பதாக ட்ரம்ப் மிரட்டி வரும் நிலையில், ஜனாதிபதியின் சில ஆக்ரோஷமான கருத்துகளின் வீரியத்தைக் குறைக்க மன்னரால் பேச்சுவார்த்தை மூலம் இயலக்கூடும் என்று அரசாங்கம் நம்புகிறது.

கேடயமாகச் செயல்பட

மன்னர் ட்ரம்புடன் இணைந்து வேறு பல நிகழ்வுகளிலும் கலந்துகொள்வார்; இந்நிகழ்வுகளில் அரண்மனை அதிகாரிகளும், வெளிவிவகாரச் செயலாளர் இவெட் கூப்பரும் அவருக்குத் துணையாக இருப்பார்கள்.

கசிந்துள்ள தகவலின் அடிப்படையில், தேவைப்பட்டால், ட்ரம்பிடம் இருந்து எத்தகைய சங்கடமான தருணங்களையும் சமாளிக்கக் கூப்பர் தயாராக இருப்பார் என்றே கூறப்படுகிறது.

ஸ்டார்மரையோ அல்லது பொதுவாக பிரித்தானியாவையோ விமர்சிக்கும் இயல்புடைய ட்ரம்ப், அவ்வாறு செய்யத் தொடங்கினால் — மன்னருக்கு மனிதக் கேடயமாகச் செயல்பட கூப்பர் தயாராக இருக்கிறார் என்றே அதிகாரிகள் தரப்பில் தெரிவிக்கப்பட்டுள்ளது.

ஆனால், அரச குடும்பத்தினர் மீது தனிப்பட்ட மரியாதை வைத்திருக்கும் ட்ரம்ப், திங்கள்கிழமை மாலை சார்லஸ் வருகை தரும்போது, ​​அவர் பகிரங்கமாக மோதலில் ஈடுபடுவார் என்று எதிர்பார்க்கப்படவில்லை.