ஐந்தாவது முறையாக ஐ.பி.எல் கோப்பையை தட்டித்தூக்கிய சென்னை

மழை காரணமாக குறைக்கப்பட்ட 15 ஓவர்கள் இறுதிப் போட்டியில் சென்னை அணி அபார வெற்றிபெற்று ஐந்தாவது முறையாக கோப்பையை வென்றுள்ளது.

வென்ற சென்னை அணி

16வது ஐபிஎல் தொடரின் இறுதிப்போட்டியானது குஜராத் மாநிலம் அகமதாபாத்தில் சென்னை மற்றும் குஜராத் அணிகளுக்கு இடையே நடைபெற்றது. நாணய சுழற்சியில் வென்ற சென்னை அணி பந்து வீச்சை தெரிவு செய்தது.

Tears of Joy ?#IPL2023Final #CSKvGT #WhistlePodu #Yellove ??pic.twitter.com/pMn0pYOSbF

— Chennai Super Kings (@ChennaiIPL) May 29, 2023

ஆட்டம் தொடங்கிய இரண்டாவது ஓவரிலேயே சுப்மன் கில் விக்கெட்டை தீபக் சாஹர் தவறவிட்டார். அந்த வாய்ப்பை பயன்படுத்திய கில் சிக்சரும் பவுண்டரிகளுமாக தெறிக்க விட்டு அசத்தினார்.

ஆனால் 20 பந்துகளில் 39 ஓட்டங்கள் குவித்திருந்த நிலையில் தோனியின் மின்னல் வேக ஸ்டம்பிங்கால் கில் ஆட்டமிழந்து வெளியேறினார். அடுத்ததாக விருத்திமான் சஹாவுடன் சாய் சுதர்சன் ஜோடி சேர்ந்தார்.

இந்த ஜோடியில் சஹா ஒரு பக்கம் அதிரடி காட்ட மறுபக்கம் சாய் சுதர்சன் களத்தில் ருத்ர தாண்டவம் ஆடினார். சாய் சுதர்சன் சிக்சரும் பவுண்டரிகளுமாக விளாச குஜராத் அணியின் ரன் வேகம் குறையாமல் ஜெட் வேகத்தில் சென்று கொண்டிருந்தது.

சென்னை பந்து வீச்சை சிதறடித்த சாய் சுதர்ஷன்

அதிரடி காட்டிக் கொண்டிருந்த இந்த ஜோடியில் சஹா 54 (39) ஓட்டங்களில் கேட்ச் ஆகி வெளியேறினார். தொடர்ந்து சென்னை பந்து வீச்சை சிதறடித்த சாய் சுதர்ஷன் 47 பந்துகளில் 96 ஓட்டங்கள் குவித்து ஆட்டமிழந்தார்.

சாய் சுதர்ஷன் 6 சிக்சர்கள், 8 பவுண்டரிகளை விளாசினார். அடுத்து களமிறங்கிய ரஷித் கான் ரன் ஏதும் எடுக்காமல் கேட்ச் ஆகி வெளியேறினார். ஹர்திக் பாண்ட்யா 21 (12) ஓட்டங்களுடன் கடைசிவரை ஆட்டமிழக்காமல் களத்தில் இருந்தார்.

இறுதியில் குஜராத் டைட்டன்ஸ் அணி நிர்ணயிக்கப்பட்ட 20 ஓவர் முடிவில் 4 விக்கெட் இழப்பிற்கு 214 ஓட்டங்கள் குவித்தது. இதனையடுத்து 215 ஓட்டங்கள் எடுத்தால் வெற்றி என்ற இலக்குடன் சென்னை அணியின் சார்பில் ருதுராஜ் கெய்க்வாட் மற்றும் டிவான் கான்வே ஆகியோர் களமிறங்கினர்.

3 பந்துகள் வீசப்பட்டநிலையில் தீடீரென மழை குறுக்கிட்டது. இதனால் ஆட்டம் நிறுத்தப்பட்டது. இதனைத்தொடர்ந்து போட்டி 15 ஒவர்களாக குறைக்கப்பட்டு சென்னை அணிக்கு 171 ஓட்டங்கள் இலக்காக நிர்ணயம் செய்யப்பட்டது.

விக்கெட் இழப்பின்றி 74 ஓட்டங்கள்

இதனையடுத்து களத்தில் இருந்த ருதுராஜ் மற்றும் டிவான் கான்வே குஜராத் பந்துவீச்சை நொறுக்கத் தொடங்கினர். 6 ஓவர்கள் முடிவில் விக்கெட் இழப்பின்றி 74 ஓட்டங்கள் குவித்தனர்.

ஆனால் அடுத்த ஓவரில் நூர் அஹ்மத் பந்துவீச்சில் ருதுராஜ் மற்றும் கான்வே அடுத்தடுத்து வெளியேறினர். ருதுராஜ் 16 பந்துகளில் 26 ஓட்டங்களும் கான்வே 25 பந்துகளில் 47 ஓட்டங்களும் எடுத்து ஆட்டமிழந்தனர்.

தொடர்ந்து ஷிவம் தூபே மற்றும் ரஹானே களமிறங்கினர். இதில் ரஹானே 27 ஓட்டங்களில் ஆட்டமிழக்க, தொடர்ந்து ராயுடு, தோனி என விக்கெடுகளை கைப்பற்றி மோகித் ஷர்மா நெருக்கடி அளித்தார். 

 ராயுடு 19 ஓட்டங்களுடனும் தோனி கணக்கை தொடங்காமலும் ஆட்டமிழக்க, இறுதியில் ஜடேஜா 6 பந்துகளில் 15 ஓட்டங்கள் எடுத்து, சென்னை அணியை வெற்றிக்கு இட்டுச்சென்றார். ஷிவம் தூபே 32 ஓட்டங்களுடன் களத்தில் இருந்தார்.