இரண்டு பேருந்துகள் நேருக்கு நேர் மோதி கொடூர விபத்து- சம்பவ இடத்தில் பலர் பலி

தமிழகத்தின் கடலூர் மாவட்டத்தில் இரண்டு தனியார் பேருந்துகள் நேருக்கு நேர் மோதி விபத்துக்குள்ளானதில் நான்கு பேர் உயிரிழந்துள்ளனர், 80க்கும் மேற்பட்டோர் படுகாயமடைந்துள்ளனர்.

நெல்லிக்குப்பம் அருகே மேல்பட்டாம்பக்கம் அருகே இந்த விபத்து நடந்துள்ளது, இன்று காலை கடலூரில் இருந்து பண்ருட்டிக்கு சென்று கொண்டிருந்த தனியார் பேருந்து ஒன்றும், பண்ருட்டியில் இருந்து கடலூர் நோக்கி வந்து கொண்டிருந்த தனியார் பேருந்தும் எதிர்பாராத விதமாக நேருக்கு நேர் மோதின.

இரண்டு பேருந்துகளும் அதிவிரைவாக வந்து கொண்டிருந்ததால் மோதிய வேகத்தில் உடைந்து போனது.

ஓட்டுநர்கள் உட்பட பேருந்தில் இருந்த 80க்கும் மேற்பட்டோர் படுகாயமடைந்தனர்,  இதில் சம்பவ இடத்திலேயே 4 பேர் உயிரிழந்தனர்.

இதில் கடலூரில் இருந்து பண்ருட்டி நோக்கி வந்த தனியார் பஸ் டிரைவர் அங்காளமணி (வயது 33), திருவெண்ணைநல்லூர் முருகன் (45), பண்ருட்டி சேமக்கோட்டையை சேர்ந்த சீனுவாசன் (55) என்பது தெரியவந்தது.

மேலும், ஒருவர் அடையாளம் தெரியவில்லை. இவரது உடல்களை போலீசார் மீட்டு பிரேத பரிசோதனைக்கு அனுப்பி வைத்தனர்.

உடனடியாக அக்கம்பக்கத்தினர் விரைந்து வந்து காயமடைந்த 80க்கும் மேற்பட்டவர்களை மருத்துவமனையில் அனுமதித்தனர், அவர்களில் பலருக்கு காயம் தீவிரமாக இருப்பதால் பலி எண்ணிக்கை அதிகரிக்கலாம் என அஞ்சப்படுகிறது.

இந்த சம்பவம் பரபரப்பை கிளப்பிய நிலையில், நிவாரணை உதவித்தொகையை அறிவித்துள்ளார் முதலமைச்சர் முக ஸ்டாலின்.

முதலமைச்சர் நிவாரணைத்தொகை அறிவிப்பு

இதுதொடர்பாக வெளியான அறிக்கையில், “கடலூர் மாவட்டம், நெல்லிக்குப்பம் காவல் நிலைய சரகம், மேல்பட்டாம்பாக்கம் கிராமத்தில் இன்று காலை பண்ருட்டியிலிருந்து கடலூருக்குச் சென்ற தனியார் பேருந்தின் வலதுபுற முன் டயர் எதிர்பாராதவிதமாக வெடித்து கடலூரிலிருந்து பண்ருட்டி வந்த தனியார் பஸ் மீது மோதியதால் ஏற்பட்ட விபத்தில் நான்கு பேர் உயிரிழந்தனர், மேலும் பலர் காயமடைந்துள்ளனர் என்ற துயரமான செய்தியினைக் கேட்டு மிகுந்த வேதனையடைந்தேன்.

இச்சம்பவத்தை கேள்விப்பட்டவுடன் கடலூர் மாவட்ட ஆட்சியரை தொலைபேசியில் தொடர்பு கொண்டு விபத்து நடந்த இடத்துக்குச் சென்று தேவையான மீட்பு நடவடிக்கைகளையும், மருத்துவ உதவிகளையும் விரைந்து மேற்கொள்ள கேட்டுக்கொண்டேன்.

மேலும், வேளாண்மை மற்றும் உழவர் நலத்துறை அமைச்சர் எம்.ஆர்.கே. பன்னீர்செல்வம், தொழிலாளர் மற்றும் திறன் மேம்பாட்டுத்துறை அமைச்சர் சி.வி.கணேசன் ஆகியோர்களை மருத்துவமனைக்கு நேரில் சென்று விபத்தில் காயமடைந்து சிகிச்சை பெற்று வருபவர்களுக்கு சிறப்பு சிகிச்சை அளிக்கப்படுவதை உறுதிசெய்யுமாறும் அறிவுறுத்தியுள்ளேன்.

இவ்விபத்தில் உறவினர்களுக்கும் உயிரிழந்தவர்களின் குடும்பனத்தினருக்கும் அவர்களது எனது ஆழ்ந்த இரங்கலையும், ஆறுதலையும் தெரிவித்துக் கொள்வதோடு உயிரிழந்தவர்களின் குடும்பத்தினருக்கு தலா இரண்டு இலட்சம் ரூபாயும்,

படுகாயமடைந்து மருத்துவமனையில் சிகிச்சை பெற்று வருபவர்களுக்கு தலா ஐம்பதாயிரம் ரூபாயும், லேசான காயமடைந்து சிகிச்சை பெற்று வருபவர்களுக்கு தலா இருபத்தைந்தாயிரம் ரூபாயும், முதலமைச்சரின் பொது நிவாரண நிதியிலிருந்து வழங்கவும் உத்தரவிட்டுள்ளேன்." இவ்வாறு அதில் கூறியுள்ளார்.