மணிக்கு 414 கி.மீ. வேகத்தில் சென்ற Bugatti கார்! கோடீஸ்வரரை எச்சரித்த ஜேர்மன் அரசு
ஜேர்மனியில் உள்ள ஒரு பொது நெடுஞ்சாலையில், தனது Bugatti Chiron சூப்பர் காரில் மணிக்கு 414 கிலோமீட்டர் வேகத்தில் ஓட்டிச்சென்ற செக் நாட்டைச் சேர்ந்த கோடீஸ்வரரை ஜேர்மன் அரசு எச்சரித்துள்ளது.
செக் நாட்டைச் சேர்ந்த கோடீஸ்வரர் ஒருவர், தனது அதிசக்தி வாய்ந்த Bugatti Chiron ஸ்போர்ட்ஸ் காரை பொது நெடுஞ்சாலையில் மணிக்கு 414 கிலோமீட்டர் வேகத்தில் ஓட்டிச் சென்றதற்காக ஜேர்மனியின் போக்குவரத்து அமைச்சகத்தால் விமர்சிக்கப்பட்டார்.
பெர்லின் மற்றும் ஹானோவர் இடையே ஜேர்மனியின் A2 ஆட்டோபான் பகுதியில் கோடீஸ்வரர் Radim Passer தனது Bugatti Chiron காரை வேகமாக ஓட்டும் வீடியோ இந்த மாத தொடக்கத்தில் YouTube-ல் வெளிவந்தது.
இந்த ஸ்டண்ட் கடந்த ஆண்டு 10 கிலோமீட்டர் நேராக அமைந்துள்ள முழு நீளத்திலும் தெரியக்கூடிய ஒரு மூன்று வழி நெடுஞ்சாலையில் படமாக்கப்பட்டது என்று Passer கூறினார்.
அந்த வீடியோவில், கார் நெடுஞ்சாலையில் பல வாகனங்களை கடந்து செல்வதைக் காணலாம். அந்த வீடியோ அந்தி நேரத்தில் படமாக்கப்பட்டதாகத் தெரிகிறது.
அதில் "எங்களால் மணிக்கு 414 கிமீ வேகத்தை எட்ட முடிந்தது, பாதுகாப்பு மற்றும் நல்ல சூழ்நிலைகளுக்காக கடவுளுக்கு நன்றி!" என்று பாஸர் கூறினார்.
ஜேர்மனியின் பெரும்பாலான ஆட்டோபான் சாலைகளில் வேக வரம்பு இல்லை.
ஆனால் போக்குவரத்து அமைச்சகம் புதன்கிழமை வெளியிடப்பட்ட அறிக்கையில், சாலைப் போக்குவரத்தில் சாலையைப் பயன்படுத்துபவர்களுக்கு எந்தவொரு ஆபத்தை விளைவிக்கும் நடத்தையையும் நிராகரிக்கப்படும் என கூறியது.
Photo: Forbes
"அனைத்து சாலைப் பயனர்களும் சாலைப் போக்குவரத்து விதிகளுக்குக் கட்டுப்பட வேண்டும்," என்று ஜேர்மனியின் சாலைப் போக்குவரத்துச் சட்டத்தின் முதல் ஷரத்தை மேற்கோள் காட்டி, "போக்குவரத்தை பயன்படுத்தும் எவரும் வேறு யாருக்கும் தீங்கு விளைவிக்காத, தடையை உண்டாக்காத அல்லது சிரமத்திற்கு உள்ளாகாத அல்லது ஆபத்து அல்லாத வகையில் நடந்து கொள்ள வேண்டும்" என எச்சரித்தது.
சாரதிகள் "வாகனம் தொடர்ந்து கட்டுப்பாட்டில் இருக்கும் அளவுக்கு வேகமாக மட்டுமே ஓட்ட வேண்டும்" என்றும் சட்டம் கூறுகிறது என்றும் அமைச்சகம் குறிப்பிட்டது.
Radim Passer, 6.6 பில்லியன் செக் கிரௌன்கள் (இலங்கை மதிப்பில் கிட்டத்தட்ட ரூ. 6,215 கோடி) சொத்துக்களுடன், செக் குடியரசின் 33-வது பணக்காரர் என்பது குறிப்பிடத்தக்கது.