வார்னர், பவல் அதிரடி... கொல்கத்தாவை புரட்டியெடுத்த டெல்லி அணி

15-வது ஐ.பி.எல். கிரிக்கெட் தொடரின் 40வது லீக் ஆட்டத்தில் கொல்கத்தா அணியை 4 விக்கெட்கள் வித்தியாசத்தில் வீழ்த்தி டெல்லி அணி வெற்றிபெற்றுள்ளது.

நாணய சுழற்சியில் வென்ற டெல்லி அணி பந்துவீச்சை தெரிவு செய்தது. அதன்படி கொல்கத்தா அணி முதலில் துடுப்பாட்டம் செய்ய களமிறங்கியது. தொடக்க வீரர்களாக களமிறங்கிய பின்ச் 3 ஓட்டங்களிலும் வெங்கடேஷ் ஐயர் 6 ஓட்டங்களிலும் ஆட்டமிழந்து ஏமாற்றமளித்தனர்.

அவர்களை தொடர்ந்து தமிழக வீரர் பாபா இந்திரஜித் 6 ஓட்டங்களில் குல்தீப் யாதவ் பந்துவீச்சில் பவல்-யிடம் கேட்ச் கொடுத்து ஆட்டமிழந்தார். அதே ஓவரில் குல்தீப் வீசிய அடுத்த பந்தில் சுனில் நரேன் டக் அவுட்டாகி வெளியேறினார்.

ஒரு முனையில் நிதானமாக விளையாடி வந்த கொல்கத்தா அணித்தலைவர் ஷ்ரேயஸ் ஐயர் 37 பந்துகளில் 42 ஓட்டங்கள் எடுத்து குல்தீப் யாதவ் வீசிய பந்தில் ஆட்டமிழந்தார். அவரை தொடர்ந்து அதிரடி வீரர் ரசல் குல்தீப் சுழலில் டக் அவுட்டாகி வெளியேறினார்.

15-வது ஓவருக்கு பிறகு அதிரடி காட்டிய நிதிஷ் ராணா அணியை சரிவில் இருந்து மீட்கும் முயற்சியில் ஈடுபட்டார். சிறப்பாக விளையாடிய நிதிஷ் ராணா 34 பந்துகளில் 57 ஓட்டங்கள் சேர்த்து அசத்தினார். மறுமுனையில் ரிங்கு சிங் 16 பந்துகளில் 23 ஓட்டங்கள் எடுத்து ஆட்டமிழந்தார்.

இறுதியில் 20 ஓவர்கள் முடிவில் கொல்கத்தா அணி 9 விக்கெட் இழப்பிற்கு 146 ஓட்டங்கள் எடுத்தது. டெல்லி அணி சார்பில் குல்தீப் யாதவ் 4 விக்கெட்களும் , ரகுமான் 3 விக்கெட்களும் கைப்பற்றி அசத்தினர்.

147 ஓட்டங்கள் எடுத்தால் வெற்றி என்ற இலக்குடன் டெல்லி அணி களமிறங்கியது. நடப்பு தொடரில் சிறப்பாக விளையாடி வந்த பிரித்வி ஷா முதல் பந்திலே டக் அவுட்டாகி அதிர்ச்சி அளித்தார். அவரை தொடர்ந்து களமிறங்கிய மிட்செல் மார்ஷ் 13 ஓட்டங்களில் பிரதீப் ராணா பந்துவீச்சில் ஆட்டமிழந்தார்.

மறுமுனையில் சிறப்பாக விளையாடி வந்த வார்னர் 42 ஓட்டங்களில் ஆட்டமிழந்தார். லலித் யாதவ் 29 பந்துகளில் 22 ஓட்டங்கள் எடுத்து வெளியேற, அணித்தலைவர் ரிஷப் பந்த் 5 பந்துகளை சந்தித்து 2 ஓட்டங்களுக்கு வெளியேறினார்.

அக்சர் பட்டேல் 17 பந்துகளுக்கு 24 ஓட்டங்கள் எடுத்து ரன் அவுட்டாக கடைசி 4 ஓவரில் வெற்றிக்கு 30 ஓட்டங்கள் தேவைப்பட்டது. இதனையடுத்து பவல்(33) - தாக்குர்(8) ஜோடி அணியை வெற்றி பாதைக்கு அழைத்து சென்றனர். இறுதியில் டெல்லி அணி 19-வது ஓவரில் 150 ஓட்டங்கள் எடுத்து 4 விக்கெட்கள் வித்தியாசத்தில் கொல்கத்தா அணியை வீழ்த்தியது.