ட்ரம்புடனான மோதல் போக்கால் எலோன் மஸ்க் எதிர்கொள்ளவிருக்கும் பேரிழப்பு

டெஸ்லா கோடீஸ்வரர் எலோன் மஸ்க் மற்றும் ஜனாதிபதி டொனால்ட் ட்ரம்ப் இடையேயான மோதல் போக்கு எல்லை மீறியுள்ளதுடன், சிறார் துஸ்பிரயோக வழக்கில் சிக்கிய நபருடன் ட்ரம்புக்கு தொடர்பிருந்ததாகவும் மஸ்க் பகீர் குற்றச்சாட்டை முன்வைத்துள்ளார்.

சுமார் 27 பில்லியன் டொலர்

ஆனால் இந்த மோதல் போக்கால் ட்ரம்பல்ல எலோன் மஸ்க் ஒருவரே பேரிழப்பை எதிர்கொள்ள இருக்கிறார் என்பது வெளிவரும் தகவல்களால் உறுதி செய்யப்பட்டுள்ளது.

வியாழக்கிழமை ஒரே நாளில் மஸ்க்கின் சொத்து மதிப்பில் சுமார் 27 பில்லியன் டொலர் இழப்பு ஏற்பட்டுள்ளது. அத்துடன் மஸ்க்கின் நிறுவனங்களுக்கு வழங்கும் மிகப்பெரிய பெடரல் கடன்கள் மற்றும் மானியங்களை நிறுத்துவதாக ஜனாதிபதி ட்ரம்ப் அச்சுறுத்தியுள்ளார்.

வெளிவரும் தரவுகளின் அடிப்படையில் கடந்த 20 அல்லது அதற்கு மேற்பட்ட ஆண்டுகளில், எலோன் மஸ்க்கின் நிறுவனங்கள் சுமார் 38 பில்லியன் டொலர் அரசாங்க ஒப்பந்தங்களைப் பெற்றுள்ளன.

அமெரிக்காவின் F-47, சீனாவின் J-35, ரஷ்யாவின் Su-57... உலகின் மிகவும் மேம்பட்ட போர் விமானம் எது?

சுமார் 330 பில்லியன் டொலர் சொத்து மதிப்பு கொண்ட எலோன் மஸ்க் ஜனாதிபதி ட்ரம்பின் கொள்கை முடிவு ஒன்றை கடுமையாக எதிர்ப்பதே இந்த மோதல் போக்கிற்கு காரணம்.

ட்ரம்பின் ஒற்றை முடிவால் அமெரிக்க அரசாங்கத்திற்கு டிரில்லியன் கணக்கான டொலர்கள் பற்றாக்குறை ஏற்படும் என்றே எலோன் மஸ்க் எச்சரித்து வருகிறார். மஸ்க்கின் மிகப்பெரிய நிறுவனங்களான டெஸ்லா மற்றும் SpaceX ஆகியவை கடந்த பல ஆண்டுகளாக அமெரிக்க அரசாங்கத்திடமிருந்து அதிகபட்ச உதவியைப் பெற்றுள்ளது.

SpaceX தலைவரும் COO பொறுப்பில் இருப்பவருமான க்வின் ஷாட்வெல் தெரிவிக்கையில், SpaceX நிறுவனம் அரசாங்க செலவினத்தில் 22 பில்லியன் டொலர் சம்பாதித்துள்ளதாக மதிப்பிட்டுள்ளார்.

52 ஒப்பந்தங்கள்

கடந்த ஓராண்டில் மட்டும் நேரடி அரசாங்க ஒப்பந்தங்களால் எலோன் மஸ்க் சுமார் 3.8 பில்லியன் டொலர் தொகையை சம்பாதித்துள்ளார். மேலும், சுற்றுச்சூழல் சார்ந்த பெடரல் மற்றும் மாகாணத் திட்டங்களிலிருந்து பூஜ்ஜிய உமிழ்வு வாகனங்களின் எண்ணிக்கையை அதிகரிக்க டெஸ்லா ஏற்கனவே 11.4 பில்லியன் டொலர் ஒழுங்குமுறை வரவுகளைப் பெற்றுள்ளது.

அந்த மொத்த தொகையில் குறைந்தது 2.1 பில்லியன் டொலர் புதிய கார்களை உருவாக்கவும் அதன் பேட்டரி தொழில்நுட்பத்தை மேம்படுத்தவும் டெஸ்லா நிறுவனத்திற்கு உதவியுள்ளது.

ஆனால் இந்த ஒழுங்குமுறை ஆதாயங்களை அகற்ற விரும்புவதாக ட்ரம்ப் இன்னும் கூறவில்லை. வெளிவரும் தகவல்களின் அடிப்படையில், அடுத்த சில ஆண்டுகளில் மஸ்க்கின் நிறுவனங்களுக்கு கூடுதலாக 11.8 பில்லியன் டொலர் ஆதாயம் தரும் ஏழு வெவ்வேறு அரசு நிறுவனங்களுடன் 52 ஒப்பந்தங்கள் முன்னெடுக்கப்பட்டுள்ளது சிக்கலில் முடியலாம்.

மேலும், வியாழக்கிழமை மட்டும் டெஸ்லா பங்குகள் 12 சதவீதம் வீழ்ச்சி கண்டது குறிப்பிடத்தக்கது.