நாளை நடைபெறவுள்ள இலங்கை நாடாளுமன்ற தேர்தல் - வாக்குப் பெட்டி விநியோகம் இன்று ஆரம்பம்

பொதுத் தேர்தலுக்கான வாக்குப் பெட்டிகள் மற்றும் அனைத்து எழுதுபொருட்களும் இன்று (13) பகல் முழுவதும் விநியோகிக்கப்படும் என தேர்தல்கள் ஆணைக்குழு தெரிவித்துள்ளது.

இலங்கை பொதுத்தேர்தல் 2024

இந்த நடவடிக்கைகள் காலை 7.00 மணி முதல் மாலை 4.00 மணி வரை இடம்பெறும் என தேர்தல்கள் ஆணையாளர் நாயகம் சமன் ஸ்ரீ ரத்நாயக்க தெரிவித்தார். 

“நாளைய நாடாளுமன்றத் தேர்தலுக்காக 13,314 வாக்குச் சாவடிகளுக்கு அனுப்பப்பட வேண்டிய அனைத்து அலுவலர்கள் மற்றும் வாக்குப் பெட்டிகள், வாக்குச் சீட்டுகள் மற்றும் பிற எழுதுபொருட்கள் இலங்கையில் உள்ள 49 வளாகங்களில் இன்று விநியோகிக்கப்படும். 22 வட்டாரங்களை உள்ளடக்கிய 25 மாவட்ட செயலகங்களில் இந்த விநியோகம் மேற்கொள்ளப்படுகிறது. நடவடிக்கைகள் காலை 7:00 மணிக்கு தொடங்கும், மேலும் அனைத்து வாக்குச்சாவடிகளிலும் பணிபுரியும் ஊழியர்களுக்கு ஒத்திகை நடத்தப்படும்” எனவும் தெரிவித்துள்ளார்.

பொதுத் தேர்தலின் போது அனைத்து தொகுதிகளிலும் பாதுகாப்பை உறுதிப்படுத்துவதற்காக சுமார் 64,000 பொலிஸ் உத்தியோகத்தர்கள் நேற்று (12) கடமையில் ஈடுபடுத்தப்பட்டுள்ளதாக பொலிஸ் ஊடகப் பேச்சாளர் பிரதி பொலிஸ் மா அதிபர் நிஹால் தல்துவா தெரிவித்துள்ளார்.

மேலும், சுதந்திரமான மற்றும் நியாயமான தேர்தலுக்கான மக்கள் நடவடிக்கை (PAFFREL) இந்த ஆண்டு தேர்தலை கண்காணிக்க சுமார் 6,000 பிரதிநிதிகளை ஈடுபடுத்தும் என நிறைவேற்று பணிப்பாளர் ரோஹன ஹெட்டியாராச்சி தெரிவித்துள்ளார்.

இதற்கிடையில், ஆட்கள் பதிவு திணைக்களம் தனது ஒரு நாள் சேவை உட்பட அனைத்து பொது சேவைகளும் நவம்பர் 14, 2024 அன்று கிடைக்காது என்று அறிவித்துள்ளது.

அன்றைய தினம் பொதுத் தேர்தல் நடைபெறுவதால், தேர்தல் பணிகளுக்கு ஊழியர்கள் நியமிக்கப்பட்டுள்ளதாகவும், அதனால் சேவைகள் இயங்காது எனவும் திணைக்களம் விடுத்துள்ள அறிக்கையில் தெரிவிக்கப்பட்டுள்ளமை குறிப்பிடத்தக்கது.