உலகிலேயே மோசமான நாடு என பெயர் வாங்கியுள்ள ஜேர்மனி: எந்த விடயத்தில் தெரியுமா?

வெளிநாட்டவர்களின் அத்தியாவசியத் தேவைகளை சந்திப்பதில் மோசமான நாடு என பெயர் வாங்கியுள்ளது ஜேர்மனி.

சமீபத்திய வருடாந்திர ஆய்வு ஒன்றில், உலகிலுள்ள 52 நாடுகளில் வாழும் வெளிநாட்டவர்கள் அந்த நாட்டைக் குறித்து என்ன நினைக்கிறார்கள் என்பது குறித்து கேள்விகள் கேட்கப்பட்டன.

அந்த ஆய்வில், ஜேர்மனியில் வாழும் வெளிநாட்டவர்கள் ஏராளமான புகார்களைத் தெரிவித்தார்கள்.

வெளிநாட்டவர்களுக்கு அத்தியாவசியமான விடயங்கள் என்ற பிரிவில், அதாவது, வீடு, டிஜிட்டல் மயமாக்கல் போன்ற விடயங்கள் தொடர்பில் கேள்விகள் கேட்கப்பட்டன. பதிலளித்தவர்களில் 56 சதவிகிதத்தினர், ஜேர்மனியில் வாழ ஒரு இடத்தைக் கண்டுபிடிப்பது மிகவும் கடினமாக இருப்பதாக தெரிவித்தார்கள்.

கிட்டத்தட்ட பாதி பேர், மொழித்திறன் இல்லாமல் ஜேர்மனியில் வாழ்வது கடினம் என்று கூற, 55 சதவிகிதத்தினர் ஜேர்மன் மொழி கடினமான ஒன்று என்று கூறினார்கள்.

ரொக்கமில்லா பணப்பரிவர்த்தனை மற்றும் அதி வேக இணையம் போன்ற விடயங்களிலும் ஜேர்மனிக்கு குறைவான புள்ளிகளே கிடைத்தன.

ஆய்வில் பங்கேற்ற 52 நாடுகளில் ஜேர்மனிக்கு 42ஆவது இடமே கிடைத்தது.

ஜேர்மனி வெளிநாட்டவர்களை வரவேற்க விருப்பம் காட்டவில்லை, உள்ளூர் கலாச்சாரத்துடன் இணைந்து வாழ்வது கடினம் என குற்றச்சாட்டுகளை முன்வைத்த வெளிநாட்டவர்கள், அதே நேரத்தில், ஜேர்மன் தெருக்களில் பயணிப்பது மிகவும் பாதுகாப்பாக உணரவைப்பதாக பாராட்டும் கிடைத்துள்ளது.

மேலும், பயணக் கட்டமைப்பு, ஊதியம், பணி பாதுகாப்பு ஆகிய விடயங்களும் பாராட்டப்பட்ட நிலையில், ஜேர்மன் பொருளாதாரம், பணி, வாழ்க்கை சமநிலை, பணியாளர்களுக்கு மரியாதை ஆகிய விடயங்களிலும் ஜேர்மனி நல்ல பெயரைப் பெற்றுள்ளதை மறுப்பதற்கில்லை.