தோல்வியடைந்த வழக்கு... இளவரசர் ஹரி உட்பட 6 பேர் ரூ 124 கோடி செலுத்த உத்தரவு

Prince Harry and others ordered to pay: தனியுரிமை தொடர்பான வழக்கில் தோல்வியடைந்ததைத் தொடர்ந்து, இளவரசர் ஹரி மற்றும் மற்ற ஆறு பேர் ரூ. 124 கோடியைச் செலுத்த உத்தரவு.

தனியுரிமை மீறல் தொடர்பான வழக்கில் தோல்வியடைந்ததைத் தொடர்ந்து, இளவரசர் ஹரி மற்றும் இசைக்கலைஞர் எல்டன் ஜான், நடிகை எலிசபெத் ஹர்லி உள்ளிட்ட ஆறு பேரும் 'டெய்லி மெயில்' (Daily Mail) பத்திரிகை வெளியீட்டாளரின் சட்டச் செலவுகளுக்காக ஏழு நாட்களுக்குள் 9.54 மில்லியன் பவுண்டுகள் (சுமார் 124 கோடி ரூபாய்) இடைக்காலத் தொகையைச் செலுத்த வேண்டும் என்று நீதிபதி தீர்ப்பளித்துள்ளார்.

இருப்பினும், இடைக்காலத் தொகையானது 7.9 மில்லியன் பவுண்டுகள் அல்லது 102 கோடி ரூபாய்க்கும் சற்று அதிகமான தொகையாக மட்டுமே இருக்க வேண்டும் என்று மனுதாரர்களின் சட்டத்தரணிகள் கூறியுள்ளனர்.

அதன் பிறகு, மனுதாரர்கள் கூடுதலாக ரூ. 326 கோடி செலுத்த நேரிடலாம். வெள்ளிக்கிழமை அன்று வழங்கப்பட்ட தீர்ப்பில், நீதிபதி மேத்யூ நிக்லின் குறிப்பிடுகையில், பிரபலங்களால் குற்றச்சாட்டுகளை நிரூபிக்க முடியாததால், அந்தப் பணம் ஒரு வாரத்திற்குள் செலுத்தப்பட வேண்டும் என்று கூறினார்.

அசோசியேட்டட் நியூஸ்பேப்பர்ஸ் நிறுவனத்தால் அலைபேசிகள் சட்டவிரோதமாக ஹேக் செய்யப்பட்டது போன்ற முறைகேடுகள் நடந்ததாக ஏழு மனுதாரர்களும் குற்றம் சாட்டியிருந்தனர். இருப்பினும், அந்தப் பதிப்பகம் இந்தக் குற்றச்சாட்டுகளை மறுத்தது.

ஈரானைத் தனிமைப்படுத்த ட்ரம்பின் திட்டம்... சீனா மற்றும் ரஷ்யாவால் முடக்கக்கூடும்

மேலும், குற்றச்சாட்டுகளை ஆதரிக்கப் போதுமான ஆதாரங்கள் இல்லை என்றும், அந்தச் செய்திகள் நம்பகமான வட்டாரங்களிலிருந்து வந்திருக்கலாம் என்றும் நீதிபதி கூறியுள்ளார்.

இவ்வழக்குடன் தொடர்புடைய பிற முக்கியப் பிரமுகர்களில், இனவெறிக்கு எதிரான செயல்பாட்டாளரான டோரின் லாரன்ஸ் (இவரது மகன் ஸ்டீபன் 1993-ல் பேருந்துக்காகக் காத்திருந்தபோது கத்தியால் குத்திக் கொல்லப்பட்டார்), எல்டன் ஜானின் கணவரும் திரைப்படத் தயாரிப்பாளருமான டேவிட் ஃபர்னிஷ், நடிகை சேடி ஃப்ரோஸ்ட் மற்றும் அரசியல்வாதி சைமன் ஹியூஸ் ஆகியோர் அடங்குவர்.

இளவரசர் ஹரியும் அவரது மனைவி மேகன் மெர்க்கலும் மீண்டும் பிரித்தானியாவுக்குக் குடியேறவிருப்பது பொதுவெளியில் தெரியவந்த இரண்டு நாட்களுக்குப் பிறகு இந்தத் தீர்ப்பு வழங்கப்பட்டது.

டெய்லி மிரர் பத்திரிகையின் வெளியீட்டாளர்கள் பரவலாகவும் தொடர்ச்சியாகவும் தொலைபேசி ஒட்டுக் கேட்பதில் ஈடுபட்டதைக் கண்டித்து, இளவரசர் ஹரி 2023ல் தொடர்ந்த வழக்கில் அவருக்கு சாதகமான தீர்ப்பு வந்திருந்தது.

கடந்த ஆண்டு, தி சன் நாளேடு, பல ஆண்டுகளாக இளவரசர் ஹரியின் வாழ்க்கையில் அத்துமீறி நுழைந்ததற்காக மன்னிப்புக் கோரியதுடன், அவரது தனியுரிமை மீறல் வழக்கை முடிவுக்குக் கொண்டுவர கணிசமான இழப்பீட்டைச் செலுத்தவும் ஒப்புக்கொண்டது.

தற்போதைய இந்த விவகாரத்தில் மேல்முறையீடு செய்வதற்கான அனுமதியைத் தாக்கல் செய்ய, சம்பந்தப்பட்ட தரப்பினருக்கு அக்டோபர் 2 ஆம் திகதி வரை அவகாசம் வழங்கப்பட்டுள்ளது.