அமெரிக்க ஜனாதிபதி பதவிக்கு குறிவைக்கும் ஹரி மேகன் ?: வெளியாகியுள்ள பரபரப்பு தகவல்

பிரித்தானியாவின் விண்ட்சர் மாளிகையிலிருந்து வெளியேறிய பிரித்தானிய இளவரசர் ஹரியும் அவரது மனைவி மேகனும், வெள்ளை மாளிகைக்கு குறிவைப்பதாக பரபரப்பு தகவல்கள் வெளியாகியுள்ளன.

ராஜ குடும்பத்தை விட்டு ஹரியும் மேகனும் வெளியேறியதைத் தொடர்ந்து, ராஜ குடும்பத்துக்கு வெளியில் வாழ்க்கையை அமைத்துக்கொள்வது தொடர்பில் அவர்கள் அமெரிக்க முன்னாள் அதிபர் ஒபாமா மற்றும் அவரது மனைவி மிச்செல் ஒபாமாவிடம் ஆலோசனைகள் பெற்று வருவதாக ஏற்கனவே செய்திகள் வெளியாகியுள்ளன.

ஹரியைப் பொருத்தவரை, அவருக்கும் ஒபாமா தம்பதியருக்கும் நீண்ட கால நட்பு உள்ளது. அத்துடன் ஹரியின் மனிதநேய மற்றும் இராணுவ சேவை, மற்றும் காயமடைந்த இராணுவ வீரர்களுக்காக அவர் நடத்திவரும் Invictus Games என்னும் விளையாட்டுப்போட்டிகள் ஆகியவை அவருக்கும் ஒபாமா தம்பதியருக்கும் இடையில் ஒரு நல்ல பிணைப்பை உருவாக்கியுள்ளதை மறுக்க இயலாது.

மேகன், மிச்செல் ஒபாமாவின் தீவிர ரசிகை, 2018இல் மிச்செல் லண்டனில் உரையாற்றியபோது, இரகசியமாக அந்த நிகழ்ச்சியில் பங்கேற்றவர் மேகன்.

இப்போது அமெரிக்காவுக்கு குடிபெயர்ந்துள்ள நிலையில், ஹரி மேகன் தம்பதி, ஒபாமா மிச்செல் தம்பதியை தங்களுக்கு முன்மாதிரியாகக் கொண்டு செயல்பட இருப்பதாக தகவல் வெளியாகியுள்ளது. அத்துடன், ஹரி மேகன் தம்பதியரின் ஒவ்வொரு நடவடிக்கையும், ஒபாமா மிச்செல் தம்பதியின் நடவடிக்கைகளை ஒத்திருப்பதைக் காணலாம்.

உதாரணமாக, தங்கள் ஜனாதிபதி பதவிக்காலம் முடிந்ததும், ஒபாமா தம்பதியர், புத்தகங்கள் எழுதுவது, உரையாற்றுவது, ஒரு தயாரிப்பு நிறுவனம் மற்றும் தொண்டு நிறுவனம் துவங்கியது ஆகிய விடயங்களில் கவனம் செலுத்தினார்கள்.

ஹரி மேகனும், அதேபோல் புத்தகங்கள் எழுதுவது, நெட்ஃப்ளிக்ஸ் ஒப்பந்தங்கள், தொண்டு நிறுவனங்கள் ஆகியவற்றில் கவனம் செலுத்திவருகிறார்கள்.

அமெரிக்க அரசியலில் ஹரிக்கும் மேகனுக்கும் ஈடுபாடு உள்ளது என்பதற்கு கடந்த அமெரிக்க தேர்தலின்போது நடந்த ஒரு சம்பவத்தை உதாரணமாகக் காட்டலாம்.

தேர்தல் நேரத்தில், வெறுப்பூட்டும் வகையில் பேசுவதை மக்கள் நிராகரிக்கவேண்டும் என்று கூறி மேகன் முன்னாள் அமெரிக்க அதிபர் ட்ரம்பை மறைமுகமாக விமர்சிக்க, ஆத்திரமடைந்த ட்ரம்ப், மேகனா, அது யார் என்று கேட்டு மேகனை அவமதிக்க முயன்றது நினைவிருக்கலாம். மேகனைப் பொருத்தவரை, மிச்செல் ஒபாமாவின் உடையலங்காரத்தை அவர் அப்படியே பின்பற்றியதற்கு எடுத்துக்காட்டுகள் உண்டு.

இதுபோக, இரண்டு தம்பதியரும் ஒரே மாதிரி வாங்கியிருக்கும் வீடுகள், ஓபரா பேட்டிகள், தொண்டு நிறுவனத்தில் இறங்கி வேலை செய்யும் மிச்செல் மற்றும் மேகன் என பல விடயங்களைக் கூறலாம்.

ஜனாதிபதி பதிவிக்காலம் முடிந்த பிறகு, ஒரு உரையாற்றுவதற்கு ஒபாமா 400,000 டொலர்கள் வாங்கினாராம். ஆனால், அதையே மிஞ்சும் அளவுக்கு ஒரு பெரிய தொகையை தனது உரைக்காக ஹரி வாங்கியதாக கூறப்படுகிறது.

ஹரி பிரித்தானியராக இருந்தாலும், மேகன் ஒரு அமெரிக்க குடிமகள் என்பதால் அவர் அமெரிக்க ஜனாதிபதி பதவிக்கு குறிவைப்பதில் எந்த ஆட்சேபனையும் இருக்க வாய்ப்பில்லையே! ஆக, இதையெல்லாம் பார்க்கும்போது, ஒபாமா தம்பதியரின் அடிச்சுவடுகளைப் பின்பற்றி, ஹரி மேகன் தம்பதியரும், அமெரிக்க ஜனாதிபதி பதவிக்கு குறிவைப்பதாக அரசல் புரசலாக செய்திகள் வெளியாகி வருகின்றன.