உங்கள் மீது இரக்கமா? வாய்ப்பே இல்லை: ஜேர்மனியை கேலி செய்யும் பிரித்தானியர்கள்
ஐரோப்பிய ஒன்றியத்திலிருந்து பிரித்தானியா வெளியேறியதற்கான காரணங்களில் ஒன்று, அது ஆண்டுதோறும் ஐரோப்பிய ஒன்றியத்துக்கு பெருந்தொகை ஒன்றை செலுத்த வேண்டியிருந்ததாலேயே என்பது பலருக்கு தெரிந்திருக்கலாம்.
அதாவது, பிரெக்சிட் நடக்க அதுவும் ஒரு காரணம்...
இப்போது, அதேபோன்றதொரு சூழ்நிலையை ஜேர்மனியும் சந்தித்துவருகிறது.
அதாவது, ஐரோப்பிய ஒன்றியத்தின் உறுப்பு நாடுகள், ஆண்டுதோறும் ஒரு குறிப்பிட்ட தொகையை ஐரோப்பிய ஒன்றியத்துக்கு செலுத்தவேண்டும். தேவையிலிருக்கும் நாடுகளுக்கு உதவ அந்த தொகை பயன்படுத்தப்படும்.
அதன்படி, ஜேர்மனி கடந்த ஆண்டு மட்டுமே 16.4 பில்லியன் பவுண்டுகளை ஐரோப்பிய ஒன்றியத்துக்கு செலுத்தியுள்ளது. ஜேர்மனியுடன் ஒப்பிடும்போது, பிரான்ஸ் செலுத்தியது தொகை 8 பில்லியன் பவுண்டுகள் மட்டுமே.
அப்படி செலுத்தப்பட்ட தொகையால் பயனடைந்த நாடுகளில் அதிக பயனடைந்த நாடு போலந்து. அது ஐரோப்பிய ஒன்றியத்திடமிருந்து 10.5 பில்லியன் பவுண்டுகளைப் பெற்றுள்ளது. ஹங்கேரியும் அதேபோல் பெருந்தொகை ஒன்றை பெற்றுள்ளது.
இந்த இரண்டு நாடுகளும், தாங்கள் ஐரோப்பிய ஒன்றியத்துக்கு செலுத்தும் தொகையைவிட அதிகம் ஐரோப்பிய ஒன்றியத்திடமிருந்து பெற்றுள்ளன. அத்துடன், இந்த இரண்டு நாடுகள் மீதும் ஐரோப்பிய ஒன்றிய விதிகளைப் பின்பற்றவில்லை என்ற குற்றச்சாட்டு வேறு உள்ளது.
இப்படிப்பட்ட ஒரு சூழலில், இப்படி விதிகளுக்கு அடங்காத நாடுகளுக்கு செலவிடுவதற்காக பட்ஜெட்டில் பெரும் தொகை ஒன்றை ஜேர்மனி ஒதுக்கியுள்ள விடயம், ஜேர்மன் அரசியல்வாதிகளை கொந்தளிக்கச் செய்துள்ளது.
இதைத்தான் பிரித்தானியர்கள் இப்போது கேலி செய்கிறார்கள். தங்கள் நாட்டிலிருந்து பெரிய தொகையை பெற்றுக்கொண்டு, தங்களுக்கு பெரிதாக ஒன்றையும் செய்யாத ஐரோப்பிய ஒன்றியத்தை எதிர்த்துதான் பிரித்தானியா ஐரோப்பிய ஒன்றியத்திலிருந்து வெளியேறியது. இப்போது அதே நிலை ஜேர்மனிக்கு ஏற்பட்டுள்ளதைத் தொடர்ந்து, பிரித்தானியர்கள் சமூக ஊடகங்களில் ஜேர்மனியை கேலி செய்து வருகிறார்கள்.
ஜேர்மனியின் நிலை கண்டு அதன் மீது இரக்கப்படுவதா? வாய்ப்பேயில்லை என்கிறார் ஒரு பிரித்தானியர்.
மற்றொரு பிரித்தானியரோ, கேட்ட போதெல்லாம் வாரு வாரி வழங்கிய வள்ளலான பிரித்தானியா ஐரோப்பிய ஒன்றியத்திலிருந்து வெளியேறிவிட்டதே உங்களுக்குத் தெரியாதா என்கிறார் கிண்டலாக.
இதனால்தான் நாங்கள் ஐரோப்பிய ஒன்றியத்திலிருந்து வெளியேறினோம், இல்லையா என்கிறார் வேறொருவர்.
இப்போது பிரித்தானியா ஐரோப்பிய ஒன்றியத்திலிருந்திருந்தால், இந்த ஆண்டு நாம் 14 பில்லியன் பவுண்டுகள் ஐரோப்பிய ஒன்றியத்துக்கு செலுத்த வேண்டியிருந்திருக்கும், நல்ல வேளை தப்பினோம் என்கிறார் மற்றொருவர். இப்படியே பிரித்தானியர்கள் ஆளாளுக்கு சமூக ஊடகங்களில் ஜேர்மனியை கேலியும் கிண்டலும் செய்து வருகிறார்கள்.