ஒரே நாளில் 26 சதவீதம் சரிவு... வரலாற்றில் IBM எதிர்கொள்ளும் இரண்டாவது நெருக்கடி

இரண்டாம் காலாண்டிற்கான நிறுவனத்தின் ஆரம்பக்கட்ட விற்பனை விவரங்கள் சந்தை ஆய்வாளர்களின் கணிப்புகளை விடக் குறைவாக இருந்ததைத் தொடர்ந்து, ஒரேநாளில் IBM நிறுவனப் பங்குகள் 26 சதவீதம் சரிந்து ஒரு பங்கின் விலை 215.67டொலராகக் குறைந்தது.

விற்பனை குறைவு

இந்த நெருக்கடிக்கு விளக்கமளித்துள்ள IBM தலைமை நிர்வாக அதிகாரி அரவிந்த் கிருஷ்ணா, வாடிக்கையாளர்கள் செலவு செய்வதைத் தள்ளிப்போடுவதாக கூறியுள்ளார்.

இரண்டாம் காலாண்டிற்கான ஆரம்பக்கட்ட வருவாய் 17.2 பில்லியன் டொலராகப் பதிவாகியுள்ளதாக ஐபிஎம் செவ்வாய்க்கிழமை வெளியிட்ட அறிக்கையில் தெரிவித்துள்ளது; இது ஆய்வாளர்களின் 17.9 பில்லியன் டொலர் மதிப்பீட்டை விடக் குறைவாகும்.

நிறுவனத்தின் உள்கட்டமைப்புப் பிரிவின் விற்பனை குறிப்பாகக் கடுமையாகப் பாதிக்கப்பட்டு, 7 சதவீதம் சரிவைக் கண்டது. ஐபிஎம் தனது இரண்டாம் காலாண்டு முடிவுகளை ஜூலை 22 அன்று வெளியிடும் என்று எதிர்பார்க்கப்படுகிறது.

இதனிடையே, தாங்கள் இன்னும் கணக்கு விவரங்களை ஆய்வு செய்து வருவதாகவும், இறுதி முடிவுகள் ஆரம்பக்கட்ட புள்ளிவிவரங்களிலிருந்து சற்று மாறுபடக்கூடும் என்றும் IBM மேலும் தெரிவித்தது.

இந்த நிலையில், வர்த்தக நேரம் முடியும் வரை இழப்புகள் நீடித்தால், 1980-களுக்குப் பிறகு IBM தனது மிகப்பெரிய 'இன்ட்ராடே' (ஒரே நாள் வர்த்தக நேரத்திற்குள் ஏற்படும்) சரிவைப் பதிவு செய்யும் நிலையில் உள்ளது.

IBM பங்குகள் சரிவு குறித்த தகவல் மற்ற நிறுவன மென்பொருள் நிறுவனங்களையும் பாதித்தது; இதில் Workday நிறுவனத்தின் பங்குகள் 8 சதவீதத்திற்கும் அதிகமாகவும், ServiceNow நிறுவனத்தின் பங்குகள் சுமார் 7.7 சதவீதம் அளவிலும் சரிந்தன.

இதனிடையே, முதலீட்டாளர்களுக்கு எழுதிய கடிதத்தில், எதிர்பார்க்கப்பட்ட விலை உயர்வுகளுக்கு முன்னதாக வாடிக்கையாளர்கள் தங்கள் செலவினங்களை சர்வர்கள், சேமிப்பகம் மற்றும் நினைவகம் ஆகியவற்றின் பக்கம் திருப்பியதே, ஐபிஎம்-இன் மென்பொருள் மற்றும் உள்கட்டமைப்பு வணிகங்களில் எதிர்பார்த்ததை விட செயல்திறன் குறைந்ததற்குக் காரணம் என்று கிருஷ்ணா கூறியுள்ளார்.

விநியோக முறைகளின் இடையூறுகள் தங்களது முடிவுகளில் தாக்கத்தை ஏற்படுத்தும் என நிறுவனம் எதிர்பார்த்திருந்ததாகவும் அவர் கூறினார். செயற்கை நுண்ணறிவு (AI) வளர்ச்சியால் தூண்டப்பட்ட மெமரி சிப் பற்றாக்குறை, உலகளாவிய உற்பத்தித் துறை முழுவதும் எதிரொலித்துள்ளது.

இருப்பினும், எதிர்பார்க்கப்படும் விலை உயர்வுகளைச் சமாளிப்பதற்காக, வாடிக்கையாளர்கள் தங்களின் செலவினங்களை மென்பொருள் மற்றும் உள்கட்டமைப்புத் தயாரிப்புகளிலிருந்து சர்வர்கள், சேமிப்பகம் மற்றும் நினைவகம் ஆகியவற்றின் பக்கம் திருப்புவார்கள் என்பதை ஐபிஎம் நிறுவனத்தால் முன்கூட்டியே கணிக்க முடியவில்லை.

பிப்ரவரி மாதம், IBM மெயின்ஃபிரேம்களில் பரவலாகப் பயன்படுத்தப்படும் ஒரு பழைய நிரலாக்க மொழியை நவீனமயமாக்க உதவும் என்று கூறிய ஒரு கருவியை, செயற்கை நுண்ணறிவு ஸ்டார்ட்அப் நிறுவனமான ஆந்த்ரோபிக் PBC வெளியிட்டதைத் தொடர்ந்து, IBM பங்குகள் கடுமையான விற்பனை அழுத்தத்திற்கு உள்ளாயின.

வருடாந்திர வருவாய்

பெரும்பாலான மென்பொருள் நிறுவனங்களைப் போலவே, IBM-ம் தனது தயாரிப்புகளில் செயற்கை நுண்ணறிவை (AI) ஒருங்கிணைத்துள்ளதுடன், வாடிக்கையாளர்களுக்கு அதிநவீன தொழில்நுட்பத்தை வழங்கும் தனது திறனையும் முன்னிலைப்படுத்தியுள்ளது.

செயற்கை நுண்ணறிவு தனது வணிகத்தை மாற்றியமைப்பதற்குப் பதிலாக அதை வலுப்படுத்தும் என்று முதலீட்டாளர்களுக்கு உணர்த்த அந்நிறுவனம் முயன்றுள்ளது. நீண்ட கால ஏற்றத்திற்குப் பிறகு, சமீபத்திய வாரங்களில் நிறுவனத்தின் பங்குகள் அழுத்தத்திற்கு உள்ளாகியுள்ளன.

ஜூன் மாதத்தில் 6% சரிவுடன் நிறைவடைந்த நிலையில், ஜூலை மாதத்தில் விற்பனை அழுத்தம் மேலும் அதிகரித்தது; இன்றைய வர்த்தக நேரத்தின் குறைந்தபட்ச விலையின் அடிப்படையில் பார்க்கும்போது, ​​IBM பங்குகள் 22 சதவீதத்திற்கும் அதிகமாகச் சரிந்துள்ளது.

மே 2023 மற்றும் நவம்பர் 2025 காலகட்டத்தில், IBM பங்குகள் வலுவான ஏற்றப் பாதையிலேயே நீடித்தது. அவ்வப்போது ஏற்ற இறக்கங்கள் காணப்பட்ட போதிலும், விலை சரிவுகளிலிருந்து அது தொடர்ந்து மீண்டு வந்து, தனது ஏற்றப் போக்கை மீண்டும் தொடர்ந்தது.

இக்காலகட்டத்தில், IBM பங்குகள் விலை 128.59 டொலரிலிருந்து 308 டொலராக உயர்ந்து, கிட்டத்தட்ட 139 சதவீதம் வருவாயை அளித்தது. கடந்த ஐந்து ஆண்டுகளிலும் IBM நேர்மறையான வருடாந்திர வருவாயை ஈட்டியிருந்தாலும், நடப்பாண்டில் இதுவரை அதன் மதிப்பில் 25 சதவீதம் அளவுக்கு சரிவைச் சந்தித்துள்ளது.

இதற்கு முன்பு, 1987 ஆம் ஆண்டு அக்டோபர் மாதம் ஐபிஎம் பங்குகள் அதிகப்படியான 23 சதவீதம் சரிந்தது, அதன் பின்பு தற்போது ஒரே நாளில் 26 சதவீதம் சரிந்து முதலீட்டு சந்தையில் அதிர்வை ஏற்படுத்தியுள்ளது.