சந்தேகத்தை ஏற்படுத்தும் இந்தியாவின் 500 பில்லியன் டொலர் அமெரிக்க இறக்குமதி

வர்த்தக ஒப்பந்தத்தின் கீழ் ஐந்து ஆண்டுகளுக்கு 500 பில்லியன் டொலர் மதிப்புள்ள அமெரிக்க பொருட்களின் இறக்குமதி தொடர்பில் இந்தியாவின் நோக்கம் சந்தேகத்தை ஏற்படுத்தியுள்ளது.

இறக்குமதியை இரட்டிப்பாக்க

இது வணிக கொள்முதலை சிதைத்து, இந்தியாவின் வர்த்தக சமநிலையை மோசமாக மாற்றியமைக்கக்கூடும் என்று பொருளாதார வல்லுநர்கள் எச்சரிக்கின்றனர்.

இந்தியப் பொருட்களுக்கான வரியை 50 சதவீதத்திலிருந்து 18 சதவீதமாகக் குறைப்பதாக அமெரிக்க ஜனாதிபதி டொனால்ட் ட்ரம்ப் கடந்த வாரம் கூறியது, இந்தியாவில் நிம்மதியை ஏற்படுத்தியது.

ஆனால் ட்ரம்ப் ஜனாதிபதி பொறுப்புக்கு வரும் முன்னர், இந்திய இறக்குமதிக்கான வரி வெறும் 3 முதல் 4 சதவீதமாகவே இருந்துள்ளது. தற்போது 18 சதவீதமாக திருத்தியதுடன் அதற்கு ஈடாக, அமெரிக்கப் பொருட்களின் வருடாந்திர இறக்குமதியை இரட்டிப்பாக்குமாறு ட்ரம்ப் இந்தியாவைக் கேட்டுக் கொண்டார்.

2024-25 ஆம் ஆண்டில் இருதரப்பு வர்த்தகம் என்பது 132 பில்லியன் டொலர்களாக இருந்தது, இந்தியாவுக்கு சாதகமாக தோராயமாக 41 பில்லியன் டொலர் உபரி இருந்தது.

தீவிரமடையும் ரஷ்ய அச்சுறுத்தல்... நோர்வேயில் துருப்புக்களை அதிகரிக்கும் பிரித்தானியா

இந்த நிலையில், அமெரிக்க வணிகங்களை நோக்கி நிறுவனங்களைத் திசைதிருப்பும் வெளிப்படையான கொள்கை உந்துதல் இல்லாமல், ஆண்டுக்கு 100 பில்லியன் டொலர் இறக்குமதி சாத்தியமா என்று வர்த்தக நிபுணர்களும் பொருளாதார வல்லுநர்களும் கேள்வி எழுப்பியுள்ளனர்.

இரு நாடுகளும் வெளியிட்ட கூட்டு அறிக்கையில், இந்தியா 500 பில்லியன் டொலர் மதிப்புள்ள அமெரிக்க பொருட்களை வாங்க திட்டமிட்டுள்ளதாகக் கூறப்பட்டுள்ளது. ஆனால், அதற்கான விரிவான விளக்கம் ஏதும் முன்வைக்கப்படவில்லை.

இதனிடையே, தென் கொரியா முந்தைய ஒப்பந்தத்தை இறுதி செய்யத் தவறிவிட்டதாகக் கூறி, ஜனவரி மாத இறுதியில் தென் கொரியப் பொருட்களின் மீதான வரிகளை 15 சதவீதத்திலிருந்து 25 சதவீதமாக உயர்த்தியது உட்பட, ட்ரம்ப் தமது பொறுமையை சோதிக்க வேண்டாம் என மறைமுகமாக எச்சரிக்கையும் விடுத்துள்ளார்.

வர்த்தக பற்றாக்குறை

இந்த நிலையில், அமெரிக்காவிலிருந்து எண்ணெய், எரிவாயு, நிலக்கரி மற்றும் விமானங்களை வாங்குவதை இந்தியா விரைவுபடுத்துவதை நோக்கமாகக் கொண்டுள்ளது என்று இரு நாடுகளும் கூட்டு அறிக்கையில் தெரிவித்துள்ளன.

இருப்பினும், இந்த 500 பில்லியன் டொலர் இறக்குமதி தொடர்பில் முதலீட்டாளர்கள் எச்சரிக்கையாக இருப்பதாகவே பொருளாதார வல்லுநர்கள் தெரிவித்துள்ளனர்.

2024-25 நிதியாண்டில் ஆசிய நாட்டின் மொத்த ஏற்றுமதியில் கிட்டத்தட்ட ஐந்தில் ஒரு பங்கை அமெரிக்கா கொண்டுள்ளது, இது இந்தியாவின் முதன்மையான ஏற்றுமதி இடமாகும். ஏற்றுமதிகள் வரிக்கு முந்தைய நிலைகளுக்கு அருகில் இருந்தால் மற்றும் இறக்குமதிகள் சாதகமாக உயர்ந்தால், இந்தியாவின் மிகப்பெரிய இருதரப்பு உபரி சுருங்கி அதன் ஒட்டுமொத்த வர்த்தக பற்றாக்குறையை விரிவுபடுத்தக்கூடும்.

2024-25 ஆம் ஆண்டில் இந்தியாவின் மொத்த பொருட்கள் வர்த்தக பற்றாக்குறை 283.5 பில்லியன் டொலராக இருந்தது. இது ஒவ்வொரு ஆண்டும் 100 பில்லியன் டொலர்களாக இருந்தால், அது இந்தியாவின் வர்த்தக சமநிலையை முற்றிலுமாக சீர்குலைக்கும் என்றே நிபுணர்களின் கருத்தாக உள்ளது.