லாஸ் ஏஞ்சல்ஸ் நகர மேயர் தேர்தல்... நித்யா ராமனை சோம்பேறி என்று அழைத்த கரேன் பாஸ்

Karen Bass calls rival Nithya Raman lazy: லாஸ் ஏஞ்சல்ஸ் மேயர் கரேன் பாஸ், தனது போட்டியாளரான நித்யா ராமனை அவர் முகத்திற்கு நேராகவே சோம்பேறி என்று அழைத்தார்.

லாஸ் ஏஞ்சல்ஸ் மேயர் பதவிக்கான விவாதம், பதவியில் இருக்கும் கரேன் பாஸ் தனது போட்டியாளரான நித்யா ராமனை சோம்பேறி என்று கூறியதைத் தொடர்ந்து அனல் பறக்கும் வகையில் தொடங்கியுள்ளது.

சபாநாயகராக இருந்தபோதுதான் முதல் வரிச் சலுகைக்கான நடவடிக்கையை மேற்கொண்டேன். அப்போது உங்கள் அடையாளமே இல்லை என்று தனக்கு அருகில் அமர்ந்திருந்த ராமனிடம் பாஸ் கூறினார்.

மேலும், பொழுதுபோக்குத் துறை சார்ந்த விடயங்களில் வாக்களிக்க வேண்டிய நேரம் வந்தபோதுகூட, நீங்கள் வாக்களிக்காமல் தவிர்த்துவிட்டீர்கள். சொல்லப்போனால், பணிக்கு வராத காரணத்தினால் நீங்கள் பல ஆயிரம் வாக்குகளைத் தவறவிட்டிருப்பதாகவே நான் கருதுகிறேன் என்றார்.

முன்கூட்டியே வாக்களிப்பு தொடங்குவதற்கு இரண்டு மாதங்களுக்கும் குறைவான காலமே எஞ்சியுள்ள நிலையில், தேர்தல் நாள் நெருங்கிவரும் வேளையில், நகர மேயரான கரேன் பாஸ் புதன்கிழமை இரவு காட்டமான கருத்துகளைப் பதிவு செய்துள்ளார்.

வட கொரியாவின் பெரும் ரகசியம் ஒன்றை பெருமிதப் பேச்சால் அம்பலப்படுத்திய ட்ரம்ப்

கரேன் பாஸ்ஸின் கீழ் பணியாற்றும் நகர மன்ற உறுப்பினரான ராமன், தனது பணி நெறிமுறைகள் மீதான விமர்சனங்களுக்குப் பதிலளிக்க ஒரு வாய்ப்பைக் கோரியதோடு, தான் கூட்டங்களில் கலந்துகொள்ளத் தவறியதையும் ஒப்புக்கொண்டார்.

அத்துடன், முந்தைய மேயராலும், இந்த மேயராலும் நான் நியமிக்கப்பட்ட வெளிவிவகார வாரியங்கள் சில சமயங்களில் நமது மன்ற நாட்களுடன் முரண்படுவதால், வழக்கமான மன்றக் கூட்டங்களைத் தவறவிட நேரிடுகிறது என்பது (பாஸுக்கும்) என்னைப் போலவே தெரியும் என்று மன்ற உறுப்பினர் ராமன் கூறினார்.

ராமனும் கடுமையாகத் தாக்கிப் பேசியதோடு, வீடற்றோர் பிரச்சினையில் மேயரின் செயல்பாடுகளைக் கண்டித்து, அவரது 'இன்சைட் சேஃப்' என்ற வீட்டுவசதித் திட்டம் ஒரு தோல்வி என்றும் குறிப்பிட்டார்.

இந்த மேயர் 'இன்சைடு சேஃப்' திட்டத்திற்காக 400 மில்லியன் டொலர்களைச் செலவிட்டுள்ளார், ஆனால் தணிக்கைகளை மேற்கொள்ள மறுத்துவிட்டார் என்றும் ராமன் குற்றஞ்சாட்டியுள்ளார்.

மட்டுமின்றி, தனது முயற்சிகளின் விளைவாக, தனது நான்காவது கவுன்சில் மாவட்டத்தில் வீடின்றித் தெருக்களில் வசிப்பவர்களின் எண்ணிக்கையில் 49 சதவீதம் குறைவு ஏற்பட்டதையும் ராமன் சுட்டிக்காட்டினார்.

வீடற்றோருக்கான திட்டங்களுக்குப் பயன்படுத்தப்படும் அனைத்து நகர நிதிகளையும் தணிக்கை செய்து, அவற்றின் செயல்திறனைக் கண்காணிப்பதாக ராமன் உறுதியளித்தார்.

பாஸ், 'இன்சைட் சேஃப்' திட்டத்தை ஆதரித்துப் பேசியதோடு, லாஸ் ஏஞ்சல்ஸ் நகரம் வீடற்றோருக்கான முழு அமைப்பையும் மாற்றியமைக்க வேண்டும் என்றும் வாதிட்டார்.

லாஸ் ஏஞ்சல்ஸ் டைம்ஸ் நடத்திய ஓர் ஆய்வில், 'இன்சைட் சேஃப்' திட்டம் தொடங்கப்பட்ட கிட்டத்தட்ட நான்கு ஆண்டுகளில், அதில் பங்கேற்ற வீடற்றவர்களில் ஏறத்தாழ 41 சதவீதத்தினர் மீண்டும் வீடற்ற நிலைக்குத் திரும்பியுள்ளனர் என்பது கண்டறியப்பட்டுள்ளது.

முதல்நிலைத் தேர்தலில் ரியாலிட்டி தொலைக்காட்சி நட்சத்திரமான ஸ்பென்சர் பிராட்டை வீழ்த்தியதன் மூலம், பாஸும் ராமனும் தேர்தலில் தங்களது இடங்களை உறுதி செய்தனர்.

முதன்மைத் தேர்தலில் மேயர் கரேன் பாஸ் 34 சதவீத வாக்குகளும், ராமன் 29 சதவீத வாக்குகளும் பெற்று முன்னிலை வகித்தனர். மேயர் தேர்தலில் பாஸ் பெரும் முன்னிலையில் இருப்பதாகக் காட்டிய கருத்துக்கணிப்பு போலியானது என்பது கண்டுபிடிக்கப்பட்ட நிலையிலேயே இந்தக் கடுமையான விவாதம் ஏற்பட்டுள்ளது.

லாஸ் ஏஞ்சல்ஸ் நகர மேயர் தேர்தல் நவம்பர் 3 ஆம் திகதி நடைபெறும். இதில் இந்தியாவின் கேரள மாநிலத்தில் பிறந்து தற்போது லாஸ் ஏஞ்சல்ஸ் நகர மேயர் பதவிக்கான போட்டியில் களமிறங்கியுள்ள நித்யா ராமனுக்கு வாய்ப்புகள் இருப்பதாகவே கூறப்படுகிறது.