உல்லாச பயணம் மேற்கொண்டு வரும் அண்ணாமலை: கடுமையாக தாக்கிய காங்கிரஸ்

தமிழக பாஜக தலைவர் அண்ணாமலை நடைபயணம் என்ற போர்வையில் உல்லாச பயணம் மேற்கொண்டு வருகிறார் என கே.எஸ்.அழகிரி கூறியுள்ளார்.

சேலத்தில் நடைபயணம் மேற்கொண்ட அண்ணாமலை செய்தியாளர்களை சந்தித்தார். அப்போது அவர், "தமிழகத்தின் நிதிநிலை அதல பாதாளத்திற்கு சென்றுவிட்டது. தமிழ்நாட்டின் கடன் தொகை அடுத்த 2 ஆண்டுகளில் 10 லட்சம் கோடியாக உயர்ந்து விடும்’’ எனக் கூறினார்.

இதற்கு பதிலளிக்கும் விதமாக தமிழக காங்கிரஸ் தலைவர் கே.எஸ். அழகிரி ட்விட்டர் எக்ஸ் தளத்தில் தனது கருத்துக்களை தெரிவித்துள்ளார்.

அவர் கூறியது..

அதில் அவர், "இந்தியாவிலேயே எத்தகைய உத்தியை கையாண்டாலும் பா.ஜ.க.வின் வாக்கு வங்கியை விரிவுபடுத்த முடியாத ஒரே மாநிலமாக மதச்சார்பற்ற முற்போக்கு சக்திகளின் எக்கு கோட்டையான தமிழகம் விளங்குகிறது. அமைச்சர்கள் மீதும், எதிர்கட்சித் தலைவர்கள் மீதும் பல்வேறு சோதனைகள், வழக்குகள் என அடக்குமுறைகளை ஏவி விட்டாலும் தமிழகத்தில் பா.ஜ.க.வின் எதிர்காலம் மிகப்பெரிய கேள்விக்குறியாகவே அமைந்துள்ளது.

இந்நிலையில், நடைபயணம் என்ற போர்வையில் உல்லாச பயணம் மேற்கொண்டு வரும் பா.ஜ.க. தலைவர் அண்ணாமலை, வெந்த புண்ணில் வேல் பாய்ச்சுகிற வகையில் உண்மைக்கு புறம்பான, ஆதாரமற்ற அவதூறான கருத்துகளை கூறி வருகிறார். தமிழகத்தின் நிதிநிலை அதல பாதாளத்திற்கு சென்று விட்டதாகவும், தமிழகத்தின் ஒட்டுமொத்த கடன் தொகை அடுத்த 2 ஆண்டுகளில் 10 லட்சம் கோடியாக உயர்ந்து விடும் என்று பேசியிருக்கிறார். தமது முதுகு தனக்கு தெரியாது என்பதால் இத்தகைய கருத்தை அவர் கூறியிருக்கிறார்.

இக்கருத்தை கூறுவதற்கு முன் ஒன்றிய பா.ஜ.க. அரசின் கடன் நிலைமை என்ன என்பது குறித்து அவர் அறிந்திருக்க வேண்டும். ஒன்றிய பா.ஜ.க. அரசின் மொத்த கடன் 31 மார்ச் 2023 நிலவரப்படி ரூபாய் 153 லட்சம் கோடியாக இருந்தது. இது வருகிற 31 மார்ச் 2024 இல் 169 லட்சம் கோடி ரூபாயாக 2023-24 நிதியாண்டில் உயர்ந்துவிடும் என்று செய்தி வெளிவந்துள்ளது. இதன்மூலம் ஒரே ஆண்டில் 16 லட்சம் கோடி கடன் உயர்ந்துவிடும் என்று கூறப்பட்டிருக்கிறது.

உதயநிதி தாத்தா வீட்டு காசில் பேருந்து நிலையம் கட்டப்பட்டதா என்ற சீமானின் கேள்விக்கு அமைச்சரின் பதில்

நிதியமைச்சர் நிர்மலா சீதாராமனின் திறமையற்ற பொருளாதார நிர்வாகத்தின் காரணமாகவே இத்தகைய கடன் சுமை ஏற்பட்டிருப்பதை அண்ணாமலையால் மறுக்க முடியுமா ? தொலைக்காட்சி ஊடகங்கள் மைக்கை நீட்டினால் அற்ப விளம்பரத்திற்காக எத்தகைய அவதூறையும் பேசிவிடலாம் என்று அண்ணாமலை நினைத்தால் அதிலிருந்து அவர் தப்பிக்க முடியாது. மக்கள் மன்றத்தில் அவர் பதில் கூறியே ஆக வேண்டும்.

சமீபத்தில் மிக்ஜாம் புயல் பாதிப்பிலிருந்து மக்களை மீட்க ஒன்றிய அரசிடம் கேட்ட மொத்த நிவாரண தொகை ஏறத்தாழ ரூபாய் 20 ஆயிரம் கோடி. ஆனால், இதுவரை பா.ஜ.க. அரசு ஒரு ரூபாய் நிதி கூட தேசிய பேரிடர் நிவாரண நிதியிலிருந்து வழங்கவில்லை.

ஆனாலும், முதலமைச்சர் மு.க. ஸ்டாலின் பாதிக்கப்பட்டவர்களுக்கு ரூபாய் 6,000 வீதம் மொத்தம் ரூபாய் 1487 கோடி உதவித்தொகை வழங்கியிருக்கிறார். இயற்கை பேரிடரினால் கடுமையாக பாதிக்கப்பட்டிருக்கிற மக்களின் துயரத்தில் எந்த பங்கையும் ஏற்றுக் கொள்ள மறுக்கிற பா.ஜ.க. அரசின் பாரபட்ச போக்கிற்கு தமிழ்நாட்டு மக்கள் உரிய பாடத்தை புகட்டுவார்கள்" என்று கூறியுள்ளார்.