தமிழ் நடிகைகள் முதல் முதல்வர்கள் வரை - விமான விபத்தில் உயிரிழந்த இந்திய பிரபலங்கள்

விமான விபத்தில் உயிரிழந்த இந்திய பிரபலங்கள் குறித்து இந்த பதிவில் காணலாம்.

விமான விபத்தில் அஜித் பவார் உயிரிழப்பு

மகாராஷ்டிரா மாநில துணை முதல்வரும், தேசிய வாத காங்கிரஸ் கட்சியின் தலைவருமான அஜித் பவார் சென்ற தனி விமானம், பாராமதி விமான நிலையத்தில் காலை 8;45 மணியளவில் விமானம் தரையிறங்கும் போது விபத்துக்குள்ளாகி உயிரிழந்துள்ளார். 

பாராமதி விமான ஓடுதளத்தில் தரையிறங்கும்போது கட்டுப்பாட்டை இழந்ததால் தொழில்நுட்ப கோளாறு ஏற்பட்டு விமானம் விபத்துக்குள்ளானதாக முதற்கட்ட தகவல் வெளியாகியுள்ளது. விபத்து தொடர்பாக விசாரணை நடத்த உத்தரவிடப்பட்டுள்ளது. 

அஜித் பவார் மரணத்திற்கு பிரதமர் மோடி, தமிழக முதல்வர் மு.க.ஸ்டாலின் உள்ளிட்ட அரசியல் தலைவர்கள் இரங்கல் தெரிவித்துள்ளனர். 

சினிமா முதல் துணை முதல்வர் வரை - யார் இந்த அஜித் பவார்?

விமான விபத்தில் இதுவரை உயிரிழந்த இந்திய அரசியல் தலைவர்கள் மற்றும் பிரபலங்கள் குறித்து இந்த பதிவில் காணலாம்

சுபாஷ் சந்திர போஸ்

இரண்டாம் உலகப் போரின் முடிவில் ஜப்பானிய ஆக்கிரமிப்புப் பகுதிகளை விட்டு வெளியேறும்போது, ஆகஸ்ட் 18 ​​1945 அன்று தைவானில் ஏற்பட்ட விமான விபத்தில் சுதந்திர போராட்ட வீரர் சுபாஷ் சந்திர போஸ் உயிரிழந்ததாக அதிகாரபூர்வமாக அறிவிக்கப்பட்டது.  

கடுமையான தீக்காயங்களுக்கு ஆளான சுபாஷ் சந்திர போஸ், நான்மோன் இராணுவ மருத்துவமனைக்கு கொண்டு செல்லப்பட்டார். ஆனால் அன்று மாலையே உயிரிழந்தார். ஆனால் அவரின் மரணம் குறித்து பல்வேறு கருத்துகள் மக்களிடையே நிலவி வருகிறது.

பல்வந்த்ராய் மேத்தா

1965 ஆம் ஆண்டு இந்திய-பாகிஸ்தான் போரின் போது, குஜராத்தின் அப்போதைய முதல்வராக இருந்த பல்வந்த்ராய் மேத்தா இந்தியா-பாகிஸ்தான் எல்லைக்கு அருகே விமானத்தில் பயணம் செய்து கொண்டிருந்தார். 

இந்த விமானத்தை முன்னாள் இந்திய விமானப்படை விமானியான ஜஹாங்கிர் பொறியாளர் ஓட்டினார். அதனை உளவு விமானம் என நினைத்த பாகிஸ்தானின் விமான படை சுட்டு வீழ்த்தியது.

இதில், பல்வந்த்ராய் மேத்தா, அவரது மனைவி, 3 உதவியாளர்கள், ஒரு பத்திரிக்கையாளர், 2 விமான ஊழியர்கள் என அனைவரும் உயிரிழந்தனர்.

ஹோமி பாபா

இந்தியா அணுசக்தி துறையின் தந்தையாக கருதப்படும் ஹோமி பாபா, 1966 ஆம் ஆண்டு ஜெனீவாவில் ஒரு மாநாட்டிற்கு சென்று கொண்டிருந்தபோது, பிரான்சின் மான்ட் பிளாங் மலைப்பகுதியில் அவர் பயணித்த ஏர் இந்தியா விமானம் விபத்துக்குள்ளானதில் உயிரிழந்தார். 

ஹோமி பாபா உடன் பயணித்த 117 பயணிகளும் உயிரிழந்தனர்.

மோகன் குமாரமங்கலம்

மதராஸ் மாகாணத்தின் முதலமைச்சராக இருந்த பி.சுப்பராயனின் மகனும், முன்னாள் மத்திய அமைச்சருமான மோகன் குமாரமங்கலம், 1973 ஆம் ஆண்டு டெல்லியில் நடைபெற்ற இந்தியன் ஏர்லைன்ஸ் விமான விபத்தில் உயிரிழந்தார். 

இவரது பேரன் முக்தேஷ் முகர்ஜி மற்றும் அவரது மனைவி சியாவோமாவோ பாய் ஆகியோர், 2014 ஆம் ஆண்டு காணாமல் போன மலேசியா ஏர்லைன்ஸ் விமானம் 370 இல் இருந்த 2 கனேடிய பயணிகளில் அடங்குவர்.

ராணி சந்திரா

தமிழ் மற்றும் மலையாள படங்களில் நடித்துவரும், மிஸ் கேரளாவுமான ராணி சந்திரா, 1976 ஆம் ஆண்டு நடைபெற்ற இந்தியன் ஏர்லைன்ஸ் விமான விபத்தில் தனது 27 வயதில் உயிரிழந்தார். 

துபாயில் கலை நிகழ்ச்சியை முடித்து விட்டு மும்பை வழியாக சென்னை திரும்பும் போது, அவர்கள் பயணித்த விமானம் தீப்பற்றியது. இதில், ராணி சந்திரா, அவரது தாய், 3 சகோதரிகள் மற்றும் அவரின் குழுவினர் ஆகியோரும் உயிரிழந்தனர்.

சிவகுமார் மற்றும் ராணி சந்திரா நடிப்பில், இளையராஜா இசையமைப்பில் பத்ரகாளி திரைப்படம் 1976 ஆம் ஆண்டு வெளியானது. படத்தின் படப்பிடிப்பு 60% முடிவடைந்த நிலையில் ராணி சந்திரா உயிரிழந்ததால், அவரை போன்ற தோற்றம் கொண்ட மற்றவரை வைத்து படப்பிடிப்பு நடத்தப்பட்டது.

சஞ்சய் காந்தி

முன்னாள் பிரதமர் இந்திரா காந்தியின் அரசியல் வாரிசாக கருதப்பட்ட அவரது இளைய மகன் சஞ்சய் காந்தி, 1980 ஆம் ஆண்டு டெல்லியில் குட்டி விமானத்தில் சாகசத்தில் ஈடுபட்ட போது, விபத்தை சந்தித்து, தனது 33 வயதில் உயிரிழந்தார். 

என்.வி.என் சோமு

திமுகவை சேர்ந்த என்.வி.என் சோமு, மத்திய பாதுகாப்புத்துறை இணையமைச்சராக பதவி வகித்தார். 1997 ஆம் ஆண்டு நவம்பர் 14 ஆம் திகதி, ராணுவ முகாமிற்கு ஹெலிகாப்டரில் சென்றபோது நடந்த விமான விபத்தில் சிக்கி உயிரிழந்தார். 

இவரது மகள் கனிமொழி சோமு, தற்போது திமுக ராஜ்யசபா எம்.பியாக உள்ளார்.

மாதவ்ராவ் சிந்தியா

முன்னாள் மத்திய ரயில்வே அமைச்சரும், குவாலியர் அரச குடும்பத்தை சேர்ந்தவருமான மாதவ்ராவ் சிந்தியா, 2001 ஆம் ஆண்டு பேரணி ஒன்றில் உரையாற்றுவதற்காக தனி விமானத்தில் சென்ற போது, உத்தரபிரதேசத்தில் விமான விபத்தை சந்தித்து, அதில் உயிரிழந்தார்.  

சோனியா காந்தியின் வெளிநாட்டு வம்சாவளி குறித்த சர்ச்சைக்குப் பின்னர், 1999 நாடாளுமன்றத் தேர்தலுக்கு முன்பு எதிர்கால பிரதமர் வேட்பாளராக மாதவ்ராவ் சிந்தியா கருதப்பட்டார்.

ஜிஎம்சி பாலயோகி

அப்போதைய மக்களவை சபாநாயகரும், தெலுங்கு தேசம் கட்சி (TDP) தலைவருமான ஜிஎம்சி பாலயோகி , மார்ச் 3, 2002 அன்று ஆந்திர மாநிலம் மேற்கு கோதாவரி மாவட்டத்தில் நடுவானில் ஹெலிகாப்டரில் ஏற்பட்ட கோளாறால், ஹெலிகாப்டர் விபத்தில் உயிரிழந்தார்.

சௌந்தர்யா

பிரபல தென்னிந்திய நடிகையான சௌந்தர்யா, 2004 ஆம் ஆண்டு பாஜகவிற்கு ஆதரவாக பிரச்சாரம் செய்ய பெங்களூருவில் இருந்து கரீம் நகருக்கு தனது சகோதரருடன் பயணித்தார். 

2 மாத கர்ப்பமாக இருந்த சௌந்தர்யா, விமானம் வெடித்து சிதறிய விபத்தில் பரிதாபமாக உயிரிழந்தார்.

ஓ.பி.ஜிண்டால் மற்றும் சுரேந்தர் சிங்

ஜிண்டால் குழும தலைவரும், ஹரியானா மாநில முன்னாள்அமைச்சருமான ஓ.பி. ஜிண்டால் மற்றும் முன்னாள் மத்திய அமைச்சர் சுரேந்தர் சிங் (முன்னாள் ஜனாதிபதி சங்கர் தயாள் சர்மாவின் மகன்) மார்ச் 31, 2005 அன்று உத்தரபிரதேசத்தின் சஹரன்பூரில் நடந்த ஹெலிகாப்டர் விபத்தில் உயிரிழந்தனர். 

ஒய்.எஸ். ராஜசேகர ரெட்டி

ஆந்திரப் பிரதேசத்தின் அப்போதைய முதல்வராக இருந்த ஒய்.எஸ். ராஜசேகர ரெட்டி, செப்டம்பர் 2, 2009 அன்று நல்லமலா மலைகளில் நடந்த ஹெலிகாப்டர் விபத்தில் உயிரிழந்தார். 

டோர்ஜி காண்டு

அருணாச்சலப் பிரதேசத்தின் அப்போதைய முதல்வராக இருந்த டோர்ஜி காண்டு, ஏப்ரல் 30, 2011 அன்று சீன எல்லைக்கு அருகிலுள்ள ஒரு தொலைதூரப் பகுதியில் தனது பவன் ஹான்ஸ் ஹெலிகாப்டர் விபத்துக்குள்ளானதில் உயிரிழந்தார்.

5 நாட்களுக்குப் பிறகு இடிபாடுகளில் அவரது உடல் கண்டுபிடிக்கப்பட்டது.

பிபின் ராவத்

இந்தியாவின் முப்படை தளபதியாக இருந்த பிபின் ராவத், டிசம்பர் 8, 2021 அன்று குன்னூரில் விமானப்படைக்கு சொந்தமான ஹெலிகாப்டர் ஒன்றில் பயணம் செய்தபோது நடந்த விபத்தில் உயிரிழந்தார்.

விஜய் ரூபானி

2025 ஆம் ஆண்டில் அகமதாபாத்தில் நடைபெற்ற ஏர் இந்தியா விமான விபத்தில், குஜராத் மாநில முன்னாள் முதல்வர் விஜய் ரூபானி உட்பட 241 பேர் உயிரிழந்தனர். இந்த விபத்தில் ஒருவர் மட்டும் உயிர் பிழைத்தார்.