மொத்தமாக சொதப்பிய பஞ்சாப்: அதிரடி காட்டிய லக்னோ அணி

15-வது ஐ.பி.எல். கிரிக்கெட் தொடரின் 42-வது லீக் ஆட்டத்தில் லக்னோ அணி 20 ஓட்டங்கள் வித்தியாசத்தில் பஞ்சாப் அணியை வீழ்த்தி 6-வது வெற்றியை பெற்றுள்ளது.

நாணய சுழற்சியில் வென்ற பஞ்சாப் அணி பந்துவீச்சை தெரிவு செய்தது. இதனையடுத்து லக்னோ அணி முதலில் துடுப்பாட்டம் செய்ய களமிறங்கியது. தொடக்க வீரர்களாக கே.எல் ராகுல் - டி காக் களமிறங்கினர்.

நடப்பு தொடரில் சிறப்பாக விளையாடி வந்த ராகுல் இந்த முறை 6 ஓட்டங்களில் ரபாடா பந்துவீச்சில் ஆட்டமிழந்து ஏமாற்றம் அளித்தார். இதனையடுத்து தீபக் ஹூடா - டி காக் ஜோடி சிறப்பான ஆட்டத்தை வெளிப்படுத்தினர்.

அரைசதம் அடிப்பார் என எதிர்பார்க்கபட்ட நிலையில் டி காக் 46 ஓட்டங்களில் சந்தீப் சர்மா பந்துவீச்சில் ஜிதேஷ் சர்மாவிடம் கேட்ச் கொடுத்து ஆட்டமிழந்தார். அவரை தொடர்ந்து ஹூடா 34 ஓட்டங்களில் ரன் அவுட்டாக, அடுத்து வந்த வீரர்கள் ஒற்றை இலக்க ரன்களில் வெளியேறினர்.

ஆனால் ஹோல்டர் - சமீரா ஜோடி சிக்சர்களை விரட்டி அதிரடி காட்டினர். இறுதியில் 20 ஓவர்கள் முடிவில் லக்னோ அணி 8 விக்கெட் இழப்பிற்கு 153 ஓட்டங்கள் எடுத்தது. பஞ்சாப் அணி தரப்பில் சிறப்பாக பந்துவீசிய ரபாடா 4 விக்கெட்களை கைப்பற்றி அசத்தினார். 154 ஓட்டங்கள் எடுத்தால் வெற்றி என்ற இலக்குடன் பஞ்சாப் அணி களமிறங்கியது.

தொடக்க வீரராக களமிறங்கிய கேப்டன் மயங்க் அகர்வால் 25 ஓட்டங்களில் வெளியேறினார். தவான் 15 பந்துகளை சந்தித்த நிலையில் 5 ஓட்டங்கள் மட்டுமே எடுத்து ரவி பிஷ்னாய் பந்தில் ஆட்டமிழந்தார்.

அவரை தொடர்ந்து ராஜபக்சா 9 ஓட்டங்களில் க்ருனால் பாண்டியா பந்துவீச்சில் ஆட்டமிழந்தார். இதன் பின் பஞ்சாப் அணி தொடர்ந்து சரிவை நோக்கி சென்றது. அடுத்தடுத்து பஞ்சாப் வீரர்கள் லிவிங்ஸ்டோன் (18) , ஜிதேஷ் சர்மா (2) ஆகியோர் ஆட்டமிழந்தனர்.

ஒரு முனையில் நிதானமாக விளையாடி வந்த பேர்ஸ்டோவ் 32 ரன்களில் சமீரா பந்துவீச்சில் ஆட்டமிழந்தார். இதனால் பஞ்சாப் அணி 16 ஓவர்களில் 105 ரன்களுக்கு 6 விக்கெட்களை இழந்து தடுமாறியது.

கடைசி 4 ஓவர்களில் வெற்றிக்கு 49 ஓட்டங்கள் தேவைப்பட ரபாடா 2 ஓட்டங்களில் ஆட்டமிழந்தார். கடைசி ஓவரில் 31 ஓட்டங்கள் தேவைப்பட ஆவேஸ் கான் வீசிய அந்த ஓவரின் முதல் பந்தில் சிக்சர் விளாசிய ரிஷி தவன் 2-வது பந்தை பவுண்டரி விரட்ட கடைசி 4 பந்தில் 21 ஓட்டங்கள் தேவைப்பட்டது.

இறுதியில் பஞ்சாப் அணி 20 ஓவர்கள் முடிவில் 8 விக்கெட் இழப்பிற்கு 133 ஓட்டங்கள் மட்டுமே எடுத்து தோல்வி அடைந்தது. லக்னோ அணி தரப்பில் மொஹ்சின் கான் 3 விக்கெட்களும் க்ருனால் பாண்டியா, சமீரா ஆகியோர் தலா 2 விக்கெட்களும் கைப்பற்றினர்.

இதன் மூலம் லக்னோ அணி 20 ஓட்டங்கள் வித்தியாசத்தில் பஞ்சாப் அணியை வீழ்த்தி 6-வது வெற்றியை பெற்றது.