இந்தியாவில் கிரிப்டோகரன்சி வைத்திருப்பவர்களுக்கு மகிழ்ச்சியான தீர்ப்பை வழங்கிய நீதிமன்றம்

கிரிப்டோகரன்சியை சொத்தாக கருதலாம் என சென்னை உயர்நீதிமன்றம் தெரிவித்துள்ளது.

கிரிப்டோகரன்சி

கிரிப்டோகரன்சி எனப்படும் டிஜிட்டல் கரன்சியை உலகளவில் பல்வேறு நாடுகள் அங்கீகரித்துள்ளன. கோடிக்கணக்கானோர் அதில் முதலீடு செய்து வருகின்றனர். 

ஆனால், இந்திய அரசு தற்போது வரை கிரிப்டோகரன்சியை அங்கீகரிக்கவில்லை. அதேவேளையில், கிரிப்டோகரன்சி மூலம் பெறப்படும் வருமானங்களுக்கு 30% வரி விதித்துள்ளது.

இந்நிலையில், இந்தியாவில் கிரிப்டோகரன்சியை இந்திய சட்டத்தின் கீழ் ஒரு சொத்தாக கருதலாம் என உயர்நீதிமன்றம் தெரிவித்துள்ளது.

கிரிப்டோகரன்சியை சொத்தாக கருதலாம்

2024 ஆம் ஆண்டு சைபர் தாக்குதலுக்குப் பின்னர் WazirX தளத்தில் XRP பங்குகள் முடக்கப்பட்ட ஒரு முதலீட்டாளர் தாக்கல் செய்த மனுவில் இந்த தீர்ப்பு வெளியாகியுள்ளது.

ஜனவரி 2024 இல் ஒரு முதலீட்டாளர் ரூ.1,98,516 மதிப்புள்ள 3,532.30 XRP நாணயங்களை வாங்கினார். அந்த ஆண்டு ஜூலை மாதம், வாசிர்எக்ஸ் அதன் கோல்ட் வாலட்களில் ஒன்று ஹேக் செய்யப்பட்டதாக தெரிவித்தது. 

இதனால் Ethereum மற்றும் ERC-20 டோக்கன்களில் சுமார் $230 மில்லியன் இழப்பு ஏற்பட்டது. தாக்குதலுக்குப் பிறகு, முதலீட்டாளரின் கணக்குகள் உட்பட அனைத்து பயனர் கணக்குகளும் முடக்கப்பட்டன.

இதனால் அவர் தனது XRP பங்குகளை அணுகவோ அல்லது வர்த்தகம் செய்யவோ முடியவில்லை.  

2025-ல் பரபரப்பை ஏற்படுத்தும் 5 சிறந்த Meme Coins

ஹேக் செய்யப்பட்டது Ethereum மற்றும் ERC-20 நாணயங்கள் தான். தனது XRP நாணயம் அதிலிருந்து வேறுபட்டது. WazirX அந்த நாணயங்களை வைத்துள்ளதாகவும், அதனை நிறுவனம் மறுபகிர்வு செய்வதையோ அல்லது மறு ஒதுக்கீடு செய்வதையோ தடுக்க வேண்டும் என மனுதாரர் வாதிட்டார். 

இந்த மனுவை எதிர்த்த ஜான்மாய் லேப்ஸ் இயக்குநர்கள், சிங்கப்பூரை தளமாகக் கொண்ட தாய் நிறுவனமான ஜெட்டாய் பிரைவேட் லிமிடெட் மறுசீரமைப்பு நடவடிக்கைகளைத் தொடங்கியுள்ளதாக தெரிவித்தது.

மேலும், சிங்கப்பூர் உயர் நீதிமன்றத்தால் அங்கீகரிக்கப்பட்ட ஒரு ஏற்பாட்டுத் திட்டத்தின்படி, அனைத்து பயனர்களும் இழப்புகளைப் பகிர்ந்து கொள்ள வேண்டும் என வாதிட்டனர்.

சட்டப்பாதுகாப்பு

இந்திய சட்டத்தின் படி, கிரிப்டோ நாணயம் ஒரு மெய்நிகர் டிஜிட்டல் சொத்தாகக் கருதப்படுகிறது. பயனரால் செய்யப்படும் முதலீடு கிரிப்டோ நாணயமாக மாற்றப்படுகிறது. 

இது சேமிக்க, வர்த்தகம் செய்ய மற்றும் விற்கக்கூடிய திறன் கொண்டது என்பதைக் கருத்தில் கொண்டு கிரிப்டோ நாணயம் ஒரு மெய்நிகர் டிஜிட்டல் சொத்து என்று அழைக்கப்படுகிறது. மேலும் இது வருமான வரிச் சட்டம், 1961 இன் பிரிவு 2(47A) இன் கீழ் நிர்வகிக்கப்படுகிறது" என நீதிபதி வெங்கடேஷ் தெரிவித்தார்.

மேலும், வருமான வரிச் சட்டம், 1961 இன் பிரிவு 2(47A) கிரிப்டோகரன்சிகளை மெய்நிகர் டிஜிட்டல் சொத்துக்களாக அங்கீகரிக்கிறது என்பதையும் தீர்ப்பில் பதிவு செய்யப்பட்டுள்ளது.

2024 சைபர் தாக்குதலில் விண்ணப்பதாரரின் XRP பங்குகள் பாதிக்கப்படவில்லை. எனவே சிங்கப்பூர் மறுசீரமைப்பு திட்டத்தில் தொடர்பில்லாத சொத்துக்களை பயன்படுத்துவது நீடிக்க முடியாதது.

மறுசீரமைப்பு திட்டத்தின் கீழ் மனுதாரரின் நாணயங்கள் பகிரப்பட்டால், அவர் பாதிக்கப்பட்ட நபராக கருதப்படுவார்.எனவே நடுவர் தீர்ப்பாயம் இந்த சர்ச்சையை தீர்மானிக்கும் வரை, மனுதாரரின் பங்குகளை மறுபகிர்வு செய்ய தடை விதித்து நீதிமன்றம் உத்தரவிட்டுள்ளது.