பிரித்தானியாவுக்குள் நுழையும் நிலையில் உடல் நசுங்கி பலியான பெண்: மீட்கப்பட்ட 34 பேர்கள்

பிரான்சில் இருந்து பிரித்தானியாவுக்குள் நுழையும் பொருட்டு பிரிட்டிஷ் கால்வாயை கடக்க முயன்ற சிறு படகு ஒன்றில் பெண் ஒருவர் உடல் நசுங்கி பலியானதாக தகவல் வெளியாகியுள்ளது.

இறப்பு எண்ணிக்கை

குறித்த சம்பவத்தில் அவசர உதவிக் குழுக்களால் 34 பேர்கள் மீட்கப்பட்டுள்ளதாகவும் தகவல்கள் தெரிவிக்கின்றன. பிரெஞ்சு கடலோர காவல்படை வெளியிட்டுள்ள தகவலின்படி, கடலில் இன்னும் பல படகுகள் காணப்படுவதாக தெரியவந்துள்ளது.

சமீப மாதங்களில் சிறு படகுகள் பிரிட்டிஷ் கால்வாயை கடக்க முயற்சிப்பது அதிகரித்துள்ளதாகவே கூறப்படுகிறது. மட்டுமின்றி, சமீபத்திய வாரங்களில் இறப்பு எண்ணிக்கையும் அதிகரித்தே காணப்படுகிறது.

ஜூலை 21 வரையான தரவுகளின் அடிப்படையில் ஒரு வார காலத்தில் மட்டும் 27 படகுகளில் மொத்தம் 1,500 பேர்கள் பிரிட்டிஷ் கால்வாயை கடந்துள்ளதாக பிரித்தானியா தரப்பில் தகவல் வெளியாகியுள்ளது.

அதாவது ஒவ்வொரு படகிலும் சராசரியாக 55 முதல் 56 பேர்கள் பயணித்துள்ளனர். இதே காலகட்டத்தில், 33 படகுகளில் 1,007 பேர்கள் திருப்பி அனுப்பப்பட்டுள்ளதாகவும் தகவல் தெரிவிக்கின்றன.

சனிக்கிழமை மட்டும் 6 படகுகளில் 370 பேர்கள் பிரிட்டிஷ் கால்வாயை கடந்துள்ளனர். இந்த ஆண்டு மட்டும் பிரிட்டிஷ் கால்வாயை கடந்த மக்களின் எண்ணிக்கை 15,000 கடந்துள்ளதாக பிரித்தானியா தரப்பு தகவல் வெளியிட்டுள்ளது.

மயங்கிய நிலையில் பெண் ஒருவர்

இதனிடையே, பிரெஞ்சு கடலோர காவல்படை வெளியிட்டுள்ள தகவலின் அடிப்படையில், படகு ஒன்று சிக்கலில் இருப்பதைக் கண்டு, ​​​​அதிகாலை 5.30 மணியளவில் மீட்பு நடவடிக்கையை முன்னெடுத்துள்ளதாக குறிப்பிட்டுள்ளனர்.

படகில் இருந்தவர்கள் உதவிக்கு அழைப்பு விடுத்துள்ளதாகவும், கடலோர காவல்படையினர் படகினை நெருங்கியபோது மயங்கிய நிலையில் பெண் ஒருவரை கண்டதாகவும் குறிப்பிட்டுள்ளனர்.

ஆனால் அவரை மீட்டு மருத்துவமனைக்கு கொண்டுசெல்லும் வழியில் அவர் மரணமடைந்துள்ளதாக தெரிவித்துள்ளனர். மட்டுமின்றி, குறித்த படகில் இருந்து 34 பேர்கள் மீட்கப்பட்டுள்ளதாகவும் தெரிவித்துள்ளனர்.

பொதுத் தேர்தல் மற்றும் ஆட்சி மாற்றத்திற்குப் பிறகு, சட்டவிரோத குடியேற்றத்தைக் கையாள்வதில் பிரித்தானியாவின் அணுகுமுறை மாறியுள்ளதாகவே கூறப்படுகிறது.

சர் கெய்ர் ஸ்டார்மர் அரசாங்கம் ருவாண்டா திட்டத்தை கைவிட்டதுடன், ஆப்பிரிக்கா மற்றும் மத்திய கிழக்கு நாடுகளில் இருந்து மக்கள் பிரித்தானியாவுக்கு சட்டவிரோதமாக புலம்பெயர்வதை தடுக்க சுமார் 84 மில்லியன் பவுண்டுகள் ஒதுக்கியுள்ளதாகவும் தகவல் வெளியாகியுள்ளது.