மர்மமான முறையில் மாயமான அமெரிக்க இளம்பெண்... காதலரை வலைவீசித் தேடிவந்த பொலிசார்: வழக்கில் அதிரடி திருப்பம்

அமெரிக்காவில் பெரும் பரபரப்பை ஏற்படுத்திய இளம்பெண் கொலை வழக்கு ஒன்றில் எதிர்பாராத விதமாக அதிரடி திருப்பம் ஒன்று ஏற்பட்டுள்ளது.

தம்பதியரான நியூயார்க்கைச் சேர்ந்த Gabby Petito (22) என்ற இளம்பெண்ணும், ப்ளோரிடாவைச் சேர்ந்த Brian Laundrie (23) என்ற இளைஞரும், ஜூலை மாதம் 1ஆம் திகதி வேன் ஒன்றில் நீண்ட சுற்றுலா புறப்பட்டார்கள். ஆகத்து மாதம் 12ஆம் திகதி இருவருக்கும் சண்டை ஏற்பட்டதாக பொலிசாருக்கு தகவல் கிடைத்துள்ளது. செப்டம்பர் 1ஆம் திகதி, தன் காதலி இல்லாமல் Laundrie மட்டும் தன் பெற்றோரின் வீட்டுக்குத் திரும்பியுள்ளார்.

Gabby எங்கே என்ற கேள்விக்கு அவரோ, அவரது பெற்றோரோ பதிலளிக்கவில்லை. Gabby தன் பெற்றோருக்கு கடைசியாக குறுஞ்செய்தி அனுப்பிய இடமான Grand Teton தேசிய பூங்காவுக்குச் சென்று பொலிசார் அவரைத் தேட, நீண்ட தேடுதல் வேட்டைக்குப் பின் செப்டம்பர் மாதம் Gabbyயின் உயிரற்ற உடலை மட்டுமே அவர்களால் கண்டுபிடிக்கமுடிந்தது. செப்டம்பர் 21 அன்று வெளியான உடற்கூறு ஆய்வில் அவர் கழுத்து நெறிக்கப்பட்டு கொல்லப்பட்டிருந்தது தெரியவந்தது.

பொலிசாரின் முழுக்கவனமும் Laundrie மீது திரும்ப, அவரோ ஏற்கனவே தலைமறைவாகி விட்டிருந்தார்.

செப்டம்பர் 14ஆம் திகதிதான், தாங்கள் Laundrieயைக் கடைசியாக பார்த்ததாக அவரது பெற்றோர் தெரிவித்திருந்தார்கள். பொலிசார் அவரை வலைவீசித் தேடிவந்தார்கள்.

இதற்கிடையில், வழக்கில் முக்கிய முன்னேற்றம் ஒன்று நிகழ்ந்தது. தொடர்ந்து மௌனம் காத்துவந்த Laundrieயின் பெற்றோர் முதன்முறையாக தங்கள் மகன் ப்ளோரிடாவில் உள்ள Carlton Reserve என்ற இடத்துக்கு அடிக்கடி செல்வதுண்டு என்றும், ஒருவேலை அவர் அங்கு ஒளிந்திருக்கலாம் என்றும் பொலிசாருக்கு தகவலளித்தனர்.

அத்துடன், நேற்று முதன்முறையாக Laundrieயின் பெற்றோர் பொலிசாருடன் இணைந்து தேடுதல் வேட்டையில் பங்குகொள்ள, அவர்கள் குறிப்பிட்ட இடத்தில் Laundrieயின் பை, மொபைல் முதலான பொருட்கள் சிக்கின.

அடுத்ததாக ஒரு பெரும் அதிர்ச்சியும் காத்திருந்தது. ஆம், Laundrieயின் பொருட்கள் கிடைத்த இடத்துக்கு சற்று தொலைவில் ஒரு உடல் கிடைத்தது. அது Laundrieயுடையதாக இருக்கலாம் என நம்பப்படுகிறது. உயிருடன் ஒளிந்திருப்பார் என நம்பப்பட்ட Laundrie, சடலமாக கண்டுபிடிக்கப்பட்டதால் பெரும் அதிர்ச்சியும் ஏமாற்றமும் ஏற்பட்டுள்ளது.

அதிகாரிகளைப் பொருத்தவரை அது Laundrieயின் உடல்தான் என அவர்கள் கிட்டத்தட்ட கண்டுபிடித்துவிட்டாலும், அவர்கள் முறைப்படியான உடற்கூறு ஆய்வு முடிவுக்காக காத்திருக்கிறார்கள்.

ஆக, கடைசிவரை Gabbyயின் மரணம் மர்மமாகவே தொடர்கிறது. அவரைக் கொலை செய்தது யார், Laundrieயா? அவர் எதற்காக கொல்லப்பட்டார் என்பது போன்ற கேள்விகளுக்கு விடை கிடைக்காமலே வழக்கு முடிவுக்கு வந்துவிட்டதுதான் சோகம்!