ஜேர்மனியில் வாழ்பவர்களில் புலம்பெயர்தல் பின்னணி கொண்டவர்கள் எத்தனை பேர் தெரியுமா?: ஆய்வு முடிவுகள்

ஜேர்மனியில் வாழ்வோரில் கிட்டத்தட்ட கால்வாசிப்பேருக்கும் அதிகமானோர், ஒன்றில் வெளிநாட்டில் பிறந்தவர்கள், அல்லது அவர்களுடைய பெற்றோரில் ஒருவராவது புலம்பெயர்ந்தவர் என புதிய ஆய்வு ஒன்றின் முடிவுகள் தெரிவித்துள்ளன.

நேற்று ஜேர்மன் புள்ளிவிவரங்கள் ஏஜன்சி வெளியிட்டுள்ள தரவுகளின்படி, ஜேர்மன் மக்கள்தொகையில் 27.2 சதவிகிதம் பேர் புலம்பெயர்தல் பின்னணி கொண்டவர்கள் என தெரியவந்துள்ளது.

ஜேர்மனியில் சுமார் 82 மில்லியன் மக்கள் வாழும் நிலையில், அவர்களில் சுமார் 22.3 மில்லியன் பேர் ஒன்றில் வெளிநாட்டில் பிறந்தவர்கள் அல்லது, வெளிநாட்டுப் பின்னணி கொண்டவர்கள் என கணக்கிடப்பட்டுள்ளதாக அதிகாரிகள் தெரிவித்துள்ளனர்.

ஜேர்மனியில் வாழும் புலம்பெயர்ந்தோர் எந்த நாடுகளிலிருந்து வந்தவர்கள்? ஜேர்மனியில் வாழும் புலம்பெயர்ந்தோரில் பெரும்பாலானவர்கள் ஐரோப்பா மற்றும் ஆசிய பின்னணி கொண்டவர்கள் ஆவர். சுமார் 7.5 மில்லியன் பேர் பிற ஐரோப்பிய ஒன்றிய நாடுகளுடன் தொடர்புடையவர்கள்.

3.5 மில்லியன் பேர் மத்திய கிழக்கு நாடுகளுடனும், 1.1 மில்லியன் பேர் ஆப்பிரிக்காவுடனும் தொடர்புடையவர்கள் ஆவர். ஜேர்மனியின் பொருளாதாரம் பல ஆண்டுகளாக, பெருமளவில் புலம்பெயர்தல் பணியாளர்களை சார்ந்து காணப்படுகிறது.

சமீபத்திய சில ஆண்டுகளாக, ஜேர்மன் அரசியல்வாதிகள் புலம்பெயர்தலை மேலும் அதிகரிக்க முயற்சிகள் மேற்கொண்டு வருகிறார்கள்.

அதே நேரத்தில், ஜேர்மன் மற்றும் ஐரோப்பிய ஒன்றிய அரசியல்வாதிகள், ஆப்பிரிக்கா மற்றும் மத்திய கிழக்கு நாடுகளிலிருந்து சட்ட விரோதமாக நுழையும் புலம்பெயர்வோரைக் கட்டுப்படுத்த கடும் நடவடிக்கைகள் எடுக்க முயன்று வருவகிறார்கள்.

ஆகவே, அவர்கள் ஆப்பிரிக்கா மற்றும் மத்திய கிழக்கு நாடுகளிலிருந்து வருவோரைத் தடுக்க முயலும் அதே வேளையில், உக்ரைன் அகதிகளுக்கு அவர்கள் ஏகமனதாக இடமளித்து வருவதால் இனவெறுப்புக் குற்றச்சாட்டுகளும் எழுந்துள்ளது குறிப்பிடத்தக்கது.