லங்காசிறி FM
தோல்வி நிலைக்கு சென்ற பாகிஸ்தான்: ட்விஸ்ட் கொடுத்த ஃபஹீம் அஷ்ரப்..டி20 உலகக்கிண்ணத்தில் வெற்றி
Sivaraj
in கிரிக்கெட்
2026 டி20 உலகக்கிண்ணத்தின் முதல் போட்டியில் பாகிஸ்தான் அணி 3 விக்கெட்டுகள் வித்தியாசத்தில் நெதர்லாந்தை வீழ்த்தியது.
ஸ்கொட் எட்வார்ட்ஸ் 37 ஓட்டங்கள்
கொழும்பில் பாகிஸ்தான் மற்றும் நெதர்லாந்து அணிகளுக்கு இடையிலான டி20 உலகக்கிண்ணப் போட்டி நடந்தது.
முதலில் துடுப்பாட்டத்தை தொடங்கிய நெதர்லாந்து அணி 19.5 ஓவர்களில் 147 ஓட்டங்களுக்கு ஆல்அவுட் ஆனது.
அதிகபட்சமாக அணித்தலைவர் ஸ்கொட் எட்வார்ட்ஸ் (Scott Edwards) 29 பந்துகளில் 37 ஓட்டங்கள் விளாசினார்.
பாஸ் டி லீட் 30 ஓட்டங்களும், லெவிட் 24 ஓட்டங்களும் எடுத்தனர். பாகிஸ்தான் தரப்பில் சல்மான் மிர்ஸா 3 விக்கெட்டுகளும், நவாஸ், அப்ரார் மற்றும் அயூப் தலா 2 விக்கெட்டுகளும் கைப்பற்றினர்.
ஃபர்ஹான் அதிரடி
பின்னர் களமிறங்கிய பாகிஸ்தான் அணியில் சைம் அயூப் 13 பந்துகளில் 24 ஓட்டங்கள் எடுத்து வெளியேற, சல்மான் அஹா 12 ஓட்டங்களில் ஆட்டமிழந்தார்.
பாபர் அஸாம் ஓட்டங்கள் எடுக்க தடுமாற, நெதர்லாந்து பந்துவீச்சை சாஹிப்ஸதா ஃபர்ஹான் அடித்து நொறுக்கினார். அவர் 31 பந்துகளில் 2 சிக்ஸர், 4 பவுண்டரிகளுடன் 47 ஓட்டங்கள் விளாசினார்.
அடுத்து உஸ்மான் கான் டக்அவுட் ஆக, பாபர் அஸாம் 18 பந்துகளில் 15 ஓட்டங்களே எடுத்த நிலையில் ஆட்டமிழந்தார்.
அதன் பின்னர் விக்கெட்டுகள் சரிய, பாகிஸ்தான் 16.1 ஓவர்களில் 7 விக்கெட்டுகள் இழப்பிற்கு 114 ஓட்டங்கள் என தடுமாறியது.
சிக்ஸர்களை பறக்கவிட்ட அஷ்ரப்
இதனால் பாகிஸ்தான் தோல்வி நிலையில் ஊசலாட, ஃபஹீம் அஷ்ரப் (Faheem Ashraf) 19வது ஓவரில் 3 சிக்ஸர், 1 பவுண்டரி என 24 ஓட்டங்கள் விளாசினார்.
கடைசி ஓவரின் 3வது பந்தில் அவர் பவுண்டரி அடிக்க, பாகிஸ்தான் 7 விக்கெட்டுகள் இழப்பிற்கு 148 ஓட்டங்கள் எடுத்து வெற்றி பெற்றது.
இக்கட்டான சூழலில் 11 பந்துகளில் 29 ஓட்டங்கள் (3 சிக்ஸர், 2 பவுண்டரிகள்) விளாசி அணியை வெற்றி பெற வைத்த ஃபஹீம் அஷ்ரப் ஆட்டநாயகன் விருது பெற்றார்.
| உள்நாட்டு மற்றும் வெளிநாட்டு செய்திகளை உடனுக்குடன் அறிந்துக்கொள்ள லங்காசிறி WHATSAPP CHANNEL இல் இணையுங்கள். |
