ஐபிஎல் ஏலத்தில் பாகிஸ்தான் வீரர்கள் அனுமதிக்கப்பட்டால் எப்படி இருக்கும்? யாரை எடுக்க போட்டி வரும்?

ஐபிஎல் ஏலத்தில் இந்த ஆண்டு பாகிஸ்தான் வீரர்கள் அனுமதிக்கப்பட்டால் எப்படி இருக்கும், யார் யாரை எல்லாம் எடுக்க அணிகள் போட்டி போடும் என்பதை பார்ப்போம்.

இந்தியாவில் நடைபெற்று வரும் உள்ளூர் தொடரான ஐபிஎல் தொடருக்கு உலக அளவில் ரசிகர்கள் உள்ளனர்.

இதற்கு முக்கிய காரணம், உலகில் திறமை வாய்ந்த கிரிக்கெட் வீரர்கள் அனைவரும் ஒரு இடத்தில் சேருவதால், போட்டியில் விறுவிறுப்புக்கு பஞ்சம் இருக்காது, கடைசி ஓவர் வரை போட்டி செல்லும், ஒரு பந்தில் ஆட்டம் எல்லாம் மாறியதை கண்டுள்ளோம்.

அப்படிப்பட்ட இந்த ஐபிஎல்லில் பாகிஸ்தான் வீரர்களுக்கு அனுமதி இல்லை. ஒருவேளை இந்த ஐபிஎல் 2022 ஏலத்தில் பாகிஸ்தான் வீரர்கள் அனுமதிக்கப்பட்டால் போட்டியில் அனல் பறக்கும்.

பாபர் அசாம்

பாகிஸ்தான் அணியின் அதிரடி ஆட்டக்காரரான பாபர் அசாம், டி20-யில் சமீபகாலமாக துவக்க வீரராக கலக்கி வருகிறார். நடைபெற்று முடிந்த உலகக்கோப்பை தொடரில் எதிரணியை தன்னுடைய அதிரடியால் கதி கலங்க வைத்தார்.

முகமது ரிஸ்வான்

இவரைத் தொடர்ந்து அடுத்த படியாக லிஸ்ட்டில் உள்ளவர் என்றால் அது முகமது ரிஷ்வான் தான், இவர் ஐபிஎல் ஏலத்தில் வந்தால் அதிக விலைக்கு வாங்க ஐபிஎல் அணிகள் போட்டி போடும். விக்கெட் கீப்பிங், துவக்க வீரராக அதிரடி காட்டுவது என சமீப காலத்தில், தன்னை ஒரு சிறந்த வீரராக காட்டி வருகிறார்.

ஷாகின் ஷா அப்ரிடி

பாகிஸ்தான் அணியில் தற்போது அபாயகரமான பந்து வீச்சாளராக உருவெடுத்திருப்பவர் தான் ஷாகின் ஷா அப்ரிடி. இவரது பந்து வீச்சை எதிர் கொள்ள முடியாமல் எதிரணியினர் திணறி வருகின்றனர்.

உலகக்கோப்பை தொடரில் இவர் குறிப்பாக கே.எல்.ராகுலை போல்டாக்கி வெளியேற்றியதை யாரும் எளிதில் மறக்க முடியாது. அதுமட்டுமின்றி டி20-யில் ஒரு சிறந்த பவுலராக இவர் விளங்கி வருவதால், இவருக்கும் ஒரு கடும் போட்டி நிலவும்.

ஆசிப் அலி

போட்டியின் முடிவையே மாற்றக் கூடியவர். கடைசி கட்டத்தில் அணிக்கு 2 ஓவரில் 30 ரன் தேவை என்றால் கூட, அதை முடித்து தரும் திறமை கொண்டவர்.

பாகிஸ்தான் அணிக்கு கிடைத்த ஒரு சிறந்த பினிஷர், இது போன்ற ஒரு பினிஷர் கிடைத்தால் ஐபிஎல் அணிகள் சும்மாவா விடுவார்கள், இவர் ஐபிஎல் ஏலத்திற்கு வந்தால், அதிக தொகைக்கு போக வாய்ப்புண்டு. இவர்களைத் தொடர்ந்து, பாகிஸ்தான் அணியில் ஷதாப் கான், பகர் சமான் , முகமது ஹபீஸ் ஆகியோருக்கும் வாய்ப்பு கிடைக்கும்.