சிகரெட் பற்றவைத்ததால் விபத்துக்குள்ளான விமானம்! 6 ஆண்டுகளுக்கு பின் கண்டுபிடிக்கப்பட்ட உண்மை

2016 எகிப்து ஏர் விமான விபத்து, விமானியின் அலட்சிய செயலால் நடந்தது என்பது இப்போது கண்டுபிடிக்கப்பட்டுள்ளது.

66 உயிர்களை பலி வாங்கிய இந்த விமான விபத்து, விமானியின் சிகரெட்டினால் ஏற்பட்ட காக்பிட் தீயினால் ஏற்பட்டதாக விசாரணையில் கண்டறியப்பட்டுள்ளது.

MS804 என்ற விமானத்தின் பைலட் காக்பிட்டில் சிகரெட்டைப் பற்ற வைத்ததால், அவசர முகக்கவசத்தில் இருந்து ஆக்ஸிஜன் கசிந்து எரிய ஆரம்பித்தது என்று பிரெஞ்சு விமானப் போக்குவரத்து நிபுணர்களின் அறிக்கை தெரிவித்துள்ளது. 134 பக்கங்கள் கொண்ட அதிகாரப்பூர்வ அறிக்கை கடந்த மாதம் பாரிஸில் உள்ள மேல்முறையீட்டு நீதிமன்றத்திற்கு அனுப்பப்பட்டது.

எகிப்திய விமானிகள் காக்பிட்டில் தவறாமல் புகைபிடிப்பதாகவும், விபத்து நடந்த போது அந்த நடைமுறையை விமான நிறுவனம் தடை செய்யவில்லை என்றும் அந்த அறிக்கை மேலும் கூறியதாக தி இன்டிபென்டன்ட் செய்தி வெளியிட்டுள்ளது.

Pilot Mohamed Said Shoukair-Photo:The Sun/ Facebook

ஏர்பஸ் A320 ரக விமானம் 2016-ஆம் ஆண்டு மே மாதம் பாரிஸில் இருந்து கெய்ரோ நோக்கி சென்று கொண்டிருந்தது. இந்த விமானம் மர்மமான சூழ்நிலையில் கிரீட் தீவு அருகே கிழக்கு மத்தியதரைக் கடலில் விழுந்து நொறுங்கியது.

இறந்தவர்களில் 40 எகிப்தியர்களும் 15 பிரெஞ்சு பிரஜைகளும் அடங்குவர். விமானத்தில் இரண்டு ஈராக்கியர்கள், இரண்டு கனடியர்கள் மற்றும் அல்ஜீரியா, பெல்ஜியம், பிரிட்டன், சாட், போர்ச்சுகல், சவுதி அரேபியா மற்றும் சூடான் ஆகிய நாடுகளைச் சேர்ந்த தலா ஒரு பயணியும் இருந்தனர்.

விமானம் 2003-ல் தான் அதன் சேவையில் நுழைந்தது, இது 30 முதல் 40 ஆண்டுகள் செயல்பாட்டு ஆயுளைக் கொண்ட ஒரு விமானத்திற்கு ஒப்பீட்டளவில் புதியது.

விபத்தின்போது, இந்த EgyptAir விமானம் 37,000 அடி (11,000 மீட்டர்) உயரத்தில் பறந்து கொண்டிருந்தது மற்றும் கிரேக்க தீவான கார்பத்தோஸில் இருந்து சுமார் 130 கடல் மைல் தொலைவில் காணாமல் போனது. ஒரு பெரிய தேடுதல் நடவடிக்கை தொடங்கப்பட்டது, அதன் பிறகு விமானத்தின் கருப்பு பெட்டி கிரீஸ் அருகே ஆழமான நீரில் கண்டுபிடிக்கப்பட்டது.

விமானம் பயங்கரவாதத் தாக்குதலில் வீழ்த்தப்பட்டதாக எகிப்திய அதிகாரிகள் அப்போது கூறியிருந்தனர், ஆனால் எந்த பயங்கரவாத அமைப்பும் பொறுப்பேற்கவில்லை.

இந்த நிலையில், விபத்து நடந்து கிட்டத்தட்ட 6 ஆண்டுகளுக்குப் பிறகு, விமான விபத்துக்கான உண்மை காரணம் பிரெஞ்சு விமானப் போக்குவரத்து நிபுணர்களால் தெரியவந்துள்ளது.