பிரான்ஸ் முழுவதும் பரவிய மாணவர் போராட்டங்கள்... அதிகரிக்கும் பாதிக்கப்பட்டவர்கள் எண்ணிக்கை

School protests sweeping France: பிரான்ஸ் முழுவதும் பள்ளிப் போராட்டங்கள் பரவி வருகின்றன.

ஆசிரியர்களும் பெற்றோர்களும் உயர்நிலைப் பள்ளி மாணவர்களுடன் இணைந்து வீதிகளில் இறங்கிப் போராடியதால், செவ்வாய்க்கிழமையன்று பிரான்ஸ் முழுவதும் போராட்டங்கள் பரவின.

பொதுமக்களின் கோபம்

பிரான்சில் பல தசாப்தங்களில் மிகவும் வன்முறைமிக்க மாணவர் போராட்டங்கள் இது என்று பிரதமர் செபாஸ்டியன் லெகோர்னு குறிப்பிட்டுள்ளார்.

பாரிஸ், ஸ்ட்ராஸ்பர்க், ரென்னஸ் மற்றும் டூலூஸ் உள்ளிட்ட நகரங்களில் நடைபெற்ற பேரணிகளின் இடையே வன்முறையில் ஈடுபட்ட குழுக்களைக் கலைக்க, காவல்துறையினர் கண்ணீர்ப்புகை மற்றும் நீர்ப்பீச்சிகளைப் பயன்படுத்தினர்.

டசின் கணக்கான நகரங்களில் நடைபெற்ற இந்தப் பேரணிகளில் 2,50,000-க்கும் மேற்பட்டோர் கலந்துகொண்டதாக உள்விவகார அமைச்சகம் தெரிவித்தது; எனினும், 4,50,000 பேர் பங்கேற்றதாக ஏற்பாட்டாளர்கள் கூறியுள்ளனர்.

வசந்த காலத்தில் நடைபெறவுள்ள ஜனாதிபதி தேர்தலுக்கு முன்னதாக, தீவிர வலது மற்றும் தீவிர இடதுசாரி மக்கள் ஆதரவுவாதக் கட்சிகளுக்கான ஆதரவு அதிகரித்துள்ள ஒரு நாட்டில், திங்களன்று நடைபெற்ற போராட்டங்களின்போது பதின்ம வயதுடைய ஒருவர் தனது கையை இழந்த சம்பவம், அங்கு நிலவும் பொதுமக்களின் கோபத்தின் மிக அண்மைய வெளிப்பாடாக அமைந்தது.

பல்கேரியா அருகே கப்பல் மீது ட்ரோன் தாக்குதல்... கப்பல் மூழ்கியதால் பணியாளர்கள் மாயம்

பலவீனமான வளர்ச்சிக்கு மத்தியில் பொதுக் கடனைக் கட்டுப்படுத்த அரசாங்கம் அழுத்தத்தில் உள்ளது. மேலும், 2024 நாடாளுமன்றத் தேர்தலில் ஜனாதிபதி இமானுவல் மேக்ரானின் கூட்டணி பெரும்பான்மையை இழந்ததிலிருந்து, வரவுசெலவுத் திட்டத்தை நிறைவேற்றுவது போன்ற அடிப்படைப் பணிகளைச் செய்வதற்கே அரசாங்கம் சிரமப்பட்டு வருகிறது.

இந்த நிலையில், கலவரங்கலில் இதுவரை குறைந்தது 215 பதின்ம வயதினரும் 85 பள்ளிப் பணியாளர்களும் காயமடைந்துள்ளதாக பிரதமர் லிகோர்னு நாடாளுமன்றத்தில் தெரிவித்தார்; இது பல தசாப்தங்களில் பள்ளி அமைப்பு சந்தித்த மிகக் கடுமையான பாதிப்பாகும்.

700-க்கும் மேற்பட்ட காவலர்களும் காயமடைந்துள்ளதாக அவரது அலுவலகம் தெரிவித்தது. இதனிடையே, ஜனாதிபதி மேக்ரான் பிரதமர் உட்பட மூத்த அமைச்சர்களின் கூட்டத்திற்கு அழைப்பு விடுத்திருந்தார்.

இந்த நிலையில், எரியும் நெருப்பில் எண்ணெய் ஊற்றுவது போல் அமெரிக்க ஜனாதிபதி டொனால்ட் ட்ரம்ப் தமது ட்ரூத் சமூக ஊடகத்தில் பதிவிட்டுள்ள கருத்து விவாதத்தை ஏற்படுத்தியுள்ளது.

இஸ்லாமியர்கள்

பிரான்சில் கட்டுக்கடங்காத குடியேற்றம் காரணமாகவே இப்படியானப் போராட்டங்கள் வெடிப்பதாக ட்ரம்ப் கூறியுள்ளார். மேலும், இது பள்ளிகள் தொடர்பான விவகாரம் அல்ல என்றும், ஒரு காலத்தில் சிறந்த நாடாகத் திகழ்ந்த ஒரு நாட்டைத் தன் கட்டுப்பாட்டில் கொண்டுவர இஸ்லாமியர்கள் விரும்புவது தொடர்பானது என்றும் பதிவு செய்துள்ளார்.

ஆனால், மாணவர்களின் கோரிக்கை என்பது மதம் அல்லது குடியேற்றம் சார்ந்தவை அல்ல; மாறாக, அவை பணியாளர் பற்றாக்குறை மற்றும் நிதி ஒதுக்கீடு இன்மை ஆகியவற்றின் மீதே கவனம் செலுத்துகின்றன.

மார்சேய் மற்றும் நான்டெஸ் நகரங்களில், போராட்டக்காரர்கள், அரசு தேசியக் கல்வியைக் கொன்றுவிட்டது என்பது போன்ற வாசகங்கள் அடங்கிய கையால் செய்யப்பட்ட பதாகைகளை ஏந்தியிருந்தனர்.

தலைநகரில், பெரும்பாலும் முகமூடி அல்லது தலைக்கவசம் அணிந்த சுமார் 300 பேர் பாதுகாப்புப் படையினரை எதிர்கொண்டதன் விளைவாக மோதல்கள் ஏற்பட்டதாகவும், மற்ற இடங்களில் இந்தப் போராட்டம் பொதுவாக பெரிய அசம்பாவிதங்கள் இன்றி நடைபெற்றதாகவும் பாரிஸ் காவல்துறை தெரிவித்தது.

செவ்வாயன்று 488 பேர் கைது செய்யப்பட்டதாகவும், 48 பாதுகாப்புப் படையினர் காயமடைந்ததாகவும் உள்விவகார அமைச்சகம் தெரிவித்துள்ளது. மாணவர் போராட்டங்கள் செப்டம்பர் மாதத்தில் பாரிஸின் பின்தங்கிய புறநகர்ப் பகுதிகளில் தொடங்கி, பின்னர் நாடு முழுவதும் பரவின. பள்ளிகளில் நீர் கசிவு முதல் எலித் தொல்லை வரை அடிப்படைப் பராமரிப்புச் சிக்கல்கள் நிலவுவது குறித்து மாணவர்கள் புகார் தெரிவிக்கின்றனர்.

பிரான்சில் உள்ள பாதிக்கும் மேற்பட்ட உயர்நிலைப் பள்ளிகள் முற்றுகையிடப்பட்டோ அல்லது அன்றைய தினத்திற்கு மூடப்பட்டோ இருந்ததாக உயர்நிலைப் பள்ளி மாணவர் சங்கம் தெரிவித்துள்ளது. சில உள்ளூர் கல்வி அதிகாரிகள் வகுப்புகளை இணையவழியில் நடத்த முயற்சித்துள்ளனர்.

இதனிடையே, மாணவர்கள் மீது அளவுக்கு அதிகமான பலத்தைப் பயன்படுத்தியதாக அதிகாரிகள் மீது மனித உரிமை அமைப்புகள், மாணவர்கள் மற்றும் பெற்றோர் அமைப்புகள் குற்றம் சாட்டியுள்ளன.

குறிப்பிடப்படாத குற்றங்களுக்காக 1,800-க்கும் மேற்பட்டோர் மீது வழக்குத் தொடரப்பட்டு வருவதாகவும், அவர்களில் 1,483 பேர் சிறார்கள் என்றும் நீதி அமைச்சகம் திங்களன்று தெரிவித்தது.