ஷிகர் தவான்- லிவிங்ஸ்டன் அதிரடி: குஜராத் அணியை துவம்சம் செய்த பஞ்சாப்

15வது ஐ.பி.எல் தொடரின் 48-வது லீக் ஆட்டத்தில் குஜராத் அணியை 8 விக்கெட்கள் வித்தியாசத்தில் வீழ்த்தி பஞ்சாப் அணி 5-வது வெற்றியை பதிவு செய்துள்ளது.

நாணய சுழற்சியில் வென்ற குஜராத் அணி துடுப்பாட்டம் செய்ய முடிவு செய்தது. தொடக்க வீரராக களமிறங்கிய சுப்மன் கில் 9 ஓட்டங்கள் எடுத்திருந்த போது ரிஷி தவனால் ரன் அவுட் செய்யப்பட்டார். அதை தொடர்ந்து சாஹா - சாய் சுதர்ஷன் ஜோடி நிதான ஆட்டத்தை வெளிப்படுத்தினர்.

ரபாடா பந்துவீச்சில் சாஹா, அகர்வாலிடம் கேட்ச் கொடுத்து 21 ஓட்டங்களில் வெளியேறினார். அணித்தலைவர் ஹார்திக் பாண்டியா 1 ரன்களில் ஆட்டமிழந்து ஏமாற்றம் அளித்தார். ஒரு முனையில் விக்கெட்கள் மளமளவென சரிய தொடங்கியது. இருப்பினும் ஒரு முனையில் நிதானமாக விளையாடிய சாய் சுதர்சன் 42 பந்துகளில் அரைசதம் கடந்து அசத்தினார்.

சாய் சுதர்சன் இறுதிவரை ஆட்டமிழக்காமல் 50 பந்துகளில் 65 ஓட்டங்கள் குவித்து அசத்தினார். டேவிட் மில்லர் 11 ஓட்டங்களுடனும் ராகுல் தெவாட்டியா 11 ஓட்டங்களுடனும் வெளியேற, இறுதியில் குஜராத் அணி 20 ஓவர்கள் முடிவில் 8 விக்கெட் இழப்பிற்கு 143 ஓட்டங்கள் எடுத்தது.

பஞ்சாப் அணி தரப்பில் ரபாடா 4 விக்கெட்களை கைப்பற்றி அசத்தினார். இதனையடுத்து 144 ஓட்டங்கள் எடுத்தால் வெற்றி என்ற இலக்குடன் பஞ்சாப் அணி களமிறங்கியது. தொடக்க வீரர்களாக ஷிகர் தவான் - பேர்ஸ்டோவ் களமிறங்கினர். ஷமி பந்துவீச்சில் சங்வான்-யிடம் கேட்ச் கொடுத்து பேர்ஸ்டோவ் ஒரு ரன்களில் வெளியேறினார்.

அவரை தொடர்ந்து களமிறங்கிய பனுக ராஜபக்சா, தவான் உடன் ஜோடி சேர்ந்தார். அதிரடியாக விளையாடிய ராஜபக்சா குஜராத் அணியின் பந்துவீச்சை நாலாபுறமும் சிதறடித்து கடும் சவால் அளித்தார். மறுமுனையில் சிறப்பாக விளையாடி வந்த தவான் 53 பந்துகளில் 62 ஓட்டங்கள் குவித்தார்.

இதனிடையே, 5 பவுண்டரி 1 சிக்சருடன் 28 பந்துகளில் 40 ஓட்டங்கள் குவித்து ராஜபக்சா ஆட்டமிழந்தார். தொடர்ந்து லிவிங்ஸ்டோன் களமிறங்கினார். ஷமி வீசிய 16-வது ஓவரில் தொடர்ந்து 3 சிக்சர்களை அவர் பறக்கவிட்டார்.

இறுதியில் 16 ஓவர்களில் பஞ்சாப் அணி 2 விக்கெட்களை மட்டுமே இழந்து 145 ஓட்டங்கள் அடித்து வெற்றி பெற்றது. குஜராத் அணியை 8 விக்கெட்கள் வித்தியாசத்தில் வீழ்த்தி பஞ்சாப் அணி 5-வது வெற்றியை பதிவு செய்தது. இதன் மூலம் நடப்பு தொடரில் குஜராத் அணி 2-வது தோல்வியை சந்தித்துள்ளது.