பெர்லின் தூதரகத்திற்கு வெளியே இறந்து கிடந்த நபர் யார்? வெளியான அதிர்ச்சி தகவல்!

ஜேர்மன் தலைநகர் பெர்லினில் தூதரகத்திற்கு வெளியே இறந்து கிடந்த நபர் ரஷ்யாவின் இரகசிய முகவர் என தெரிவானதுள்ளது.

கடந்த மாதம் பெர்லினில் உள்ள ரஷ்ய தூதரகத்திற்கு வெளியே ஒரு தெருவில் இறந்து கிடந்த ஒரு நபர் ரஷ்யாவின் FSB உளவுத்துறையின் இரகசிய முகவர் என்று ஜேர்மன் பாதுகாப்பு சேவைகள் நம்புவதாக Der Spiegel வார இதழில் வெள்ளிக்கிழமை தெரிவிக்கப்பட்டுள்ளது.

கடந்த அக்டோபர் 19-ஆம் திகதி அதிகாலை தூதரக கட்டிடத்திற்கு காவலாக இருந்த பெர்லின் காவல்துறை அதிகாரிகளால் ஒரு 35 வயது ஆணின் சடலம் கண்டெடுக்கப்பட்டது.

அங்கிருந்த பாதுகாவர்கள் கூற்றுப்படி, அந்த நபர் தூதரகத்தின் மேல் மாடியில் இருந்து விழுந்ததாக கூறப்பட்டது.

சம்பவத்தின்போது அதிகாரிகள் ஆம்புலன்சை அழைத்தனர், ஆனால் மருத்துவர்கள் அவரை உயிர்ப்பிக்க முடியவில்லை என தூதரகம் கூறியுள்ளது.

Photo: REUTERS/Fabrizio Bensch

இந்நிலையில், இன்டர்ஃபாக்ஸ் செய்தி நிறுவனத்திற்கு ரஷ்ய தூதரகம் அளித்த அறிக்கையில் ரஷ்ய தூதரக அதிகாரி ஒருவர் இறந்துவிட்டதாக உறுதிப்படுத்தியது, ஆனால் "நெறிமுறை காரணங்களுக்காக இந்த சோகமான நிகழ்வு குறித்து கருத்து தெரிவிக்கவில்லை" என்று கூறியது.

அதேபோல், கருத்து தெரிவிக்க மறுத்த பெர்லின் பொலிசார், அனைத்து கேள்விகளையும் அரசு வழக்கறிஞர்களுக்கு அனுப்பினர், அவர்கள் Der Spiegel அறிக்கையை உறுதிப்படுத்தவோ மறுக்கவோ முடியாது என்று கூறினர்.

முன்னதாக ரஷ்ய தூதரகத்திற்கு வெளியே ஒரு உடல் கண்டுபிடிக்கப்பட்டதாக எந்த தகவலும் தெரிவிக்கப்படவில்லை.

இராஜதந்திரி எப்படி விழுந்தார் மற்றும் அவரது மரணத்திற்கு என்ன காரணம் என்பது தெளிவாக தெரியவில்லை என்று பாதுகாப்பு வட்டாரங்கள் பத்திரிகைக்கு தெரிவித்தன.

பிரேத பரிசோதனைக்கு ரஷ்ய தூதரகம் ஒப்புக்கொள்ளவில்லை என்று டெர் ஸ்பீகல் இதழில் தெரிவிக்கப்பட்டுள்ளது.

"இராஜதந்திரியின் உடலை திருப்பி அனுப்புவது தொடர்பான அனைத்து சம்பிரதாயங்களும் ஜேர்மனியின் பொறுப்பான சட்ட அமலாக்க மற்றும் மருத்துவ அதிகாரிகளுடன் நடைமுறையில் உள்ள நடைமுறைகளுக்கு ஏற்ப உடனடியாக தீர்வு காணப்பட்டன" என்று தூதரகம் Interfax-க்கு அளித்த அறிக்கையில் தெரிவித்துள்ளது.

பெயரிடப்படாத அந்த நபர், தூதரகத்தில் இரண்டாவது செயலாளராக அதிகாரப்பூர்வமாக பட்டியலிடப்பட்டதாக கூறப்படுகிறது. அவர் ரஷ்யாவை தளமாகக் கொண்ட, பயங்கரவாதத்திற்கு எதிராக செயல்படும் FSB-ன் இரண்டாவது இயக்குநரகத்தின் மூத்த அதிகாரியின் உறவினராகவும் இருந்தார் என கூறப்படுகிறது.

இது குறித்து கேட்கப்பட்ட கருத்துக்கு ரஷ்ய தூதரகம் உடனடியாக பதிலளிக்கவில்லை என ராய்ட்டர்ஸ் செய்தி நிறுவனம் தெரிவித்துள்ளது.

ஜேர்மன் வெளியுறவு அமைச்சக செய்தித் தொடர்பாளர் வெள்ளிக்கிழமை வழக்கமான செய்தி மாநாட்டில், பேர்லினில் ஒரு ரஷ்ய இராஜதந்திரியின் மரணம் குறித்து ஜேர்மன் அரசாங்கம் அறிந்திருந்தது, ஆனால் எந்த விவரங்களையும் கொடுக்க முடியவில்லை என கூறினார்.