பிரித்தானியா மீது மில்லியன் கணக்கான பவுண்டுகளுக்கு வழக்குத் தொடுத்துள்ள ருவாண்டா

இரு நாடுகளுக்கும் இடையிலான புகலிட ஒப்பந்தத்தை லேபர் அரசாங்கம் ரத்து செய்ததை அடுத்து, ருவாண்டா பிரித்தானியா மீது மில்லியன் கணக்கான பவுண்டுகள் இழப்பீடு கோரி வழக்கு தொடர்ந்துள்ளது.

முதல் நடவடிக்கை

கிழக்கு ஆப்பிரிக்க நாடான ருவாண்டா இந்த விவகாரம் தொடர்பில் சட்ட நடவடிக்கையைத் தொடங்கியுள்ளது. இதன் காரணமாக பிரித்தானியா அரசாங்கம் 50 மில்லியன் பவுண்டுகளுக்கும் அதிகமான ஒரு பெரும் தொகையைச் செலுத்த வேண்டிய நிலை ஏற்படக்கூடும்.

இந்த வழக்கானது நெதர்லாந்தில் உள்ள நிரந்தர நடுவர் நீதிமன்றத்தில் கையாளப்பட்டு வருகிறது. இந்த நிலையில், ருவாண்டாவின் சட்டப்பூர்வ கோரிக்கையானது, ருவாண்டா திட்டத்தை ரத்து செய்வதற்கான லேபர் அரசாங்க முடிவின் மற்றொரு பேரழிவு தரும் விளைவு என்று நிழல் உள்விவகராச் செயலாளர் கிறிஸ் பிலிப் கூறியுள்ளார்.

பிரதமர் கெய்ர் ஸ்டார்மர், பதவியேற்றதும் தனது முதல் நடவடிக்கைகளில் ஒன்றாக, முந்தைய அரசாங்கத்தின் புகலிட ஒப்பந்தத்தை ரத்து செய்தார்.

அந்தத் திட்டத்தின் அடிப்படையில், ஆங்கிலக் கால்வாய் வழியாகச் சிறிய படகுகளில் வந்த புலம்பெயர்ந்தோரை பிரித்தானியாவிலிருந்து கிகாலிக்கு அனுப்புவதற்கு இன்னும் சில நாட்களே எஞ்சியிருந்தன.

சத்தமே இல்லாமல் சம்பவம்... டன் கணக்கில் தங்கத்தை வாங்கும் ஐரோப்பிய நாடு

அங்கு அவர்களுக்குத் தங்குமிடம் வழங்கப்பட்டு, புகலிடம் கோருவதற்கான வாய்ப்பும் அளிக்கப்பட்டிருக்கும். அந்த ஒப்பந்தத்தைக் கைவிடுவதற்கான லேபர் அரசாங்கத்தின் முடிவைத் தொடர்ந்து, வடக்கு பிரான்சிலிருந்து சிறிய படகுகள் மூலம் கடலைக் கடந்து வரும் புலம்பெயர்ந்தோரின் எண்ணிக்கையில் பெரும் அதிகரிப்பு ஏற்பட்டது.

இதன் விளைவாக, உள்விவகார அமைச்சகத்தின் சமீபத்திய தரவுகளின்படி, 36,273 புலம்பெயர்ந்தோருக்கு உணவு உட்பட முழு வசதியுடன் கூடிய ஹொட்டல் தங்குமிடங்கள் அனுமதிக்கப்பட்டது. செப்டம்பர் மாத இறுதியில், லேபர் கட்சி ஆட்சிக்கு வந்ததிலிருந்து இதுவரையில் கிட்டத்தட்ட 7,000 பேர்கள் அதில் அதிகரித்துள்ளனர்.

ரத்து செய்யப்பட்ட திட்டம்

தற்போதைய இந்தச் சட்டச் சிக்கல், 2024-ஆம் ஆண்டில் ஒப்பந்தத்தை முறையாக ரத்து செய்வதில் ஸ்டார்மர் அரசாங்கம் தவறியதாகக் கூறப்படும் குற்றச்சாட்டை மையமாகக் கொண்டிருப்பதாகத் தெரிகிறது.

இதனிடையே, உள்விவகார அமைச்சகத்தின் புள்ளிவிவரங்களின்படி, கைவிடப்பட்ட இந்தத் திட்டம் ஏற்கெனவே பிரித்தானிய அரசாங்கத்திற்கு 715 மில்லியன் பவுண்டுகள் செலவை ஏற்படுத்தியுள்ளது.

கடந்த ஆண்டு, ருவாண்டா அரசாங்கம் ரத்து செய்யப்பட்ட அந்தத் திட்டத்திற்காக மேலும் 50 மில்லியன் பவுண்டுகளைக் கோருவதாகத் தெரிவிக்கப்பட்டது.

2022-ல் பிரதமர் போரிஸ் ஜான்சன் ஆட்சியில் உள்விவகாரச் செயலாளராக இருந்த பிரித்தி படேல் முதலில் கையெழுத்திட்ட ஒப்பந்தத்தின் விதிமுறைகளின்படி, பிரித்தானியா பல தவணைகளாக ருவாண்டாவிற்குப் பணம் செலுத்த வேண்டியிருந்தது.

மொத்தத்தில், இந்த ஒப்பந்தத்தின் கீழ் 290 மில்லியன் பவுண்டுகள் ருவாண்டா அரசாங்கத்திற்கு நேரடியாகச் செலுத்தப்பட்டது. கூடுதலாக 50 மில்லியன் பவுண்டுகள் கடந்த ஆண்டு ஏப்ரல் மாதம் செலுத்தப்பட வேண்டியிருந்தது, இந்தத் தொகைதான் தற்போதைய இந்தத் தகராறின் மையமாக இருப்பதாகக் கருதப்படுகிறது.