பிரித்தானிய கடற்கரையில் நடந்த கொலை சம்பவம்: இரண்டாவது நபர் கைது!

United Kingdom Crime

By Thiru May 22, 2025 06:10 PM GMT

Thiru

in ஐக்கிய இராச்சியம்

Report

வட அயர்ஷயர் கடற்கரையில் நடந்த கொலை வழக்கில் இரண்டாவது நபர் கைது செய்யப்பட்டுள்ளார்.

கடற்கரையில் நடந்த பயங்கரம்

வட அயர்ஷயரில் உள்ள கடற்கரையில் நடந்த ஒரு துயரச் சம்பவத்தில், 16 வயது கெய்டன் மோய்(Kayden Moy) கத்தியால் குத்திக் கொல்லப்பட்ட வழக்கில், இரண்டாவது நபர் கைது செய்யப்பட்டுள்ளார்.

சனிக்கிழமை (மே 17) மாலை இர்வின் கடற்கரையில் ஏற்பட்ட தகராறு குறித்த தகவலையடுத்து, சவுத் லனார்க்ஷயரின் ஈஸ்ட் கில்ப்ரைடைச் சேர்ந்த கெய்டன், பலத்த காயங்களுடன் கண்டெடுக்கப்பட்டார்.

பிரித்தானிய கடற்கரையில் நடந்த கொலை சம்பவம்: இரண்டாவது நபர் கைது! | Second Arrest In Kayden Moy Murder Case

சம்பவ இடத்திலேயே அவருக்கு உடனடி மருத்துவ சிகிச்சை அளிக்கப்பட்டு மருத்துவமனைக்கு கொண்டு செல்லப்பட்டாலும், ஞாயிற்றுக்கிழமை (மே 18) அவர் உயிரிழந்தார்.

கெய்டனின் மரணம் தொடர்பாக 17 வயதுடைய ஆண் ஒருவர் கைது செய்யப்பட்டுள்ளார் என்று ஸ்காட்லாந்து காவல்துறை வியாழக்கிழமை (மே 22) உறுதிப்படுத்தியுள்ளது.

விசாரணைகள் தொடர்ந்து நடைபெற்று வருவதாக அதிகாரிகள் தெரிவித்தனர்.

கைது செய்யப்பட்ட குற்றவாளிகள்

இந்தச் சம்பவம் தொடர்பாக முன்னதாகவே 17 வயதுடைய மற்றொரு சிறுவன் கைது செய்யப்பட்டு குற்றம் சாட்டப்பட்டான்.

ஈஸ்ட் கில்ப்ரைடைச் சேர்ந்த அந்தச் சந்தேக நபர், கில்மார்னாக் ஷெரிப் நீதிமன்றத்தில் கொலை, பொது இடத்தில் தாக்குதல் ஆயுதத்தை வைத்திருந்தது மற்றும் நீதியைத் தடுக்க முயன்றது ஆகிய குற்றச்சாட்டுகளின் கீழ் ஆஜர்படுத்தப்பட்டார்.

அவர் எந்த விதமான மறுப்பும் தெரிவிக்காத நிலையில், அடுத்த நீதிமன்ற விசாரணை வரை காவலில் வைக்கப்பட்டார்.

கைது செய்யப்பட்ட இருவரின் வயதைக் கருதி, அவர்களின் அடையாளங்கள் வெளியிடப்படவில்லை.

கெய்டனின் குடும்பத்தினருக்கு சிறப்பு பயிற்சி பெற்ற அதிகாரிகள் தொடர்ந்து ஆதரவு அளித்து வருகின்றனர்.

முன்னதாக ஸ்காட்லாந்து காவல்துறை மூலம் வெளியிடப்பட்ட அறிக்கையில், தங்கள் குடும்பத்திற்கு ஆதரவு அளித்த அனைவருக்கும் கெய்டனின் குடும்பத்தினர் நன்றி தெரிவித்திருந்தனர்.

உள்நாட்டு மற்றும் வெளிநாட்டு செய்திகளை உடனுக்குடன் அறிந்துக்கொள்ள லங்காசிறி WHATSAPP CHANNEL இல் இணையுங்கள்.