ரூ 87 கோடி இழப்பீடு கோரி பிரித்தானியா உள்விவகார அமைச்சகத்தின் மீது வழக்குத் தொடர்ந்த இலங்கையர்

Sri Lankan migrant sued the Home Office for more than £7million: இலங்கையிலிருந்து புலம்பெயர்ந்த ஒருவர், உள்விவகார அமைச்சகத்தின் மீது 7 மில்லியன் பவுண்டுகள் இழப்பீடு கோரி வழக்குத் தொடர்ந்தார்.

பிரித்தானியாவில் தடுப்பு முகாம் ஒன்றில் செலவிட்ட நாட்களில் தாம் உளவியல் ரீதியாக பாதிக்கப்பட்டதாகக் குறிப்பிட்டு, உள்விவகார அமைச்சகம் மீது 7 மில்லியன் பவுண்டுகளுக்கும் அதிகமானத் தொகையை இழப்பீடாகக் கோரியுள்ளார்.

திரட்டிய ஆதாரங்கள்

குறித்த விவகாரத்தில் விசாரணை மேற்கொண்ட நீதிமன்றத்தால், வெங்கடேஸ்வர ராவ் கோபாலகிருஷ்ணன் என்ற அந்த நபர் திட்டமிட்டுப் பொய்யான குற்றச்சாட்டுகளை உருவாக்கியது கண்டறியப்பட்டது.

செப்டம்பர் 2013 முதல் பிப்ரவரி 2014 வரையில் கோபாலகிருஷ்ணன் தடுப்பு முகாமில் தடுத்து வைக்கப்பட்டிருந்தார். 2010ல் பிரித்தானியாவுக்கு வந்த கோபாலகிருஷ்ணன், விசா காலாவதியான பின்னரும் நாட்டில் தங்கியிருந்தார்.

இதனிடையே அவரது புகலிடக் கோரிக்கையும் நிராகரிக்கப்பட்டது. இந்த நிலையில், 2023-ல், கோபாலகிருஷ்ணனுக்கு பிரித்தானியாவில் காலவரையின்றித் தங்குவதற்கான அனுமதி வழங்கப்பட்டது.

இதன் பின்னரே அவர் உள்விவகார அமைச்சகத்தின் மீது வழக்குத் தொடர்ந்ததுடன், 7 மில்லியன் பவுண்டுகளுக்கும் (இந்திய மதிப்பில் கிட்டத்தட்ட ரூ 87 கோடி) அதிகமானத் தொகையை இழப்பீடாகக் கோரியுள்ளார்.

நீலப் பேரலை...... ரணகளமானப் பங்குச் சந்தை: 2.5 டிரில்லியன் டொலர் இழப்பு

ஆனால், கோபாலகிருஷ்ணன் தற்போது கடுமையான உளவியல் பிரச்சினையால் பாதிக்கப்படவில்லை என்றும், ஒருவேளை ஒருபோதும் பாதிக்கப்பட்டிருக்க வாய்ப்பில்லை என்றும் இந்த ஆண்டின் தொடக்கத்தில் உள்விவகார அமைச்சகம் திரட்டிய ஆதாரங்கள் நிரூபிக்கின்றன.

காயங்கள் போலியானவை என்பதை நிரூபிப்பதற்காக, கோபாலகிருஷ்ணன் கார் ஓட்டுவதும், உடற்பயிற்சி கூடத்தில் ஒரு மணி நேரம் உடற்பயிற்சி செய்வதும் காணொளியாகப் பதிவு செய்யப்பட்டது.

மட்டுமின்றி, அந்தக் கோரிக்கையை முன்னெடுத்துச் செல்வதற்கான மனத்திறன் தனக்கு இல்லை என்றும், ரீனா மேத்யூ என்ற பெண்மணி தானாக முன்வந்து தன்னைக் கவனித்துக்கொண்டதாகவும் கோபாலகிருஷ்ணன் கூறியுள்ளார்.

ஆனால், கோபாலகிருஷ்ணனும் ரீனா மேத்யூவும் 10 ஆண்டுகளுக்கும் மேலாக உறவில் இருந்ததற்கும், அவர்களுக்கு மூன்று குழந்தைகள் இருப்பதற்கும் ஆதாரங்கள் வெளியானதால், தவறான இழப்பீடு கோரிக்கையில் இருவரும் திட்டமிட்டு செயல்பட்டனர் என்று நீதிபதி மான்ஸ்ஃபீல்ட் கண்டறிந்தார்.

இழப்பீட்டுத் தொகை

மேலும், இந்த வழக்கை 12 ஆண்டுகளாகக் கையாண்டதில் பொது வளங்களும் நீதிமன்ற நேரமும் வீணடிக்கப்பட்டது அதிர்ச்சியளிக்கும் செயல் என்று கூறிய நீதிபதி, இந்த சட்ட நடவடிக்கையை எதிர்கொள்வதற்காக உள்விவகார அமைச்சகம் செலவிட்ட அனைத்துத் தொகையையும் கோபாலகிருஷ்ணன் செலுத்த வேண்டும் என்று உத்தரவிட்டார்.

7 மில்லியன் பவுண்டுகளுக்கும் அதிகமான இழப்பீட்டுத் தொகையைப் பெறுவதற்காக, மனுதாரர் ரீனா மேத்யூ என்பவருடன் இணைந்து, தனக்கு உளவியல் பாதிப்பு ஏற்பட்டுள்ளதாக வேண்டுமென்றே புனைந்துள்ளார் அல்லது மிகைப்படுத்திக் காட்டியுள்ளார் என்றும் நீதிபதி குறிப்பிட்டுள்ளார்.

நீதிபதி மேன்ஸ்ஃபீல்ட் கூறுகையில், கோபாலகிருஷ்ணன் 2010-ஆம் ஆண்டு பிரித்தானியாவிற்கு வந்துள்ளார்; ஆனால், 2012-இல் அவரது மாணவர் விசா காலாவதியான பிறகும் அவர் சட்டத்திற்கு புறம்பாக தங்கியிருந்துள்ளார், மேலும் அடுத்த ஆண்டு அவர் கோரிய புகலிடக் கோரிக்கையும் நிராகரிக்கப்பட்டது.

உடல்நலக் காரணங்களுக்காக அவர் புலம்பெயர் தடுப்புக்காவலில் இருந்து விடுவிக்கப்பட்டு, 2023-ல் காலவரையின்றி நாட்டில் தங்குவதற்கான அனுமதியும் வழங்கப்பட்டது.

ஆனால், பின்னர் அவர், தடுப்புக்காவலில் இருந்தபோது தனக்கு ஏற்பட்டதாகக் கூறப்படும் காயங்கள் தொடர்பாக வழக்குத் தொடர்ந்தார்; அதில், 2023 வரை தனக்கு மனப்பிறழ்வு அறிகுறிகளுடன் கூடிய கடுமையான மனச்சோர்வு இருந்ததாகவும், மேலும் அதிர்ச்சிக்குப் பிந்தைய மன அழுத்தக் கோளாறால் தொடர்ந்து அவதிப்படுவதாகவும் பொய்யாகக் கூறியுள்ளார்.

இதன் விளைவாக, அவர் தன்னைத்தானே கவனித்துக்கொள்ளவோ, படிக்கவோ அல்லது வேலை செய்யவோ முடியாத நிலைக்குத் தள்ளப்பட்டதாகவும், வாழ்நாள் முழுவதும் அவருக்கு இடைவிடாத கவனிப்பு தேவைப்படும் சூழல் ஏற்பட்டுள்ளதாகவும் தெரிவித்துள்ளார்.

இதனையடுத்தே ரீனா மேத்யூ அவரை கவனித்துக்கொள்ளும் நண்பராக நீதிமன்றத்தில் அடையாளப்படுத்தப்பட்டார். கோபாலகிருஷ்ணனால் தனக்கான உணவைத் தயாரித்துக்கொள்ளவோ, தனியாக வீட்டை விட்டு வெளியே செல்லவோ, மருத்துவ சந்திப்புகளுக்குச் செல்லவோ, தனது நிதியை நிர்வகிக்கவோ அல்லது வீட்டுவசதி, மருத்துவப் பராமரிப்பு மற்றும் சலுகைகள் போன்ற தனது வாழ்க்கையின் முக்கிய அம்சங்களை ஏற்பாடு செய்யவோ முடியவில்லை என்றும் ரீனா மேத்யூ நீதிமன்றத்தில் கூறியுள்ளார்.

இந்த விவகாரத்தில் உள்விவகார அமைச்சகம் விசாரணை முன்னெடுத்த நிலையில், கோபாலகிருஷ்ணனின் பொய்கள் வெளிச்சத்திற்கு வந்தது.