விமானம் தரையிறங்கும்போது திடீரென ஏற்பட்ட கோளாறு... தீப்பற்றி எரியும் பகீர் காட்சி

அமெரிக்காவின் மியாமி விமான நிலையத்தில் விமானம் ஒன்று தரையிறங்கும்போது தரையில் உரசி தீப்பற்றி எரியும் திடுக் காட்சி ஒன்றி வெளியாகி மனதைப் பதறவைத்துள்ளது. 

நேற்று மாலை 5.30 மணியளவில், டொமினிக்கன் குடியரசிலிருந்து அமெரிக்காவிலுள்ள மியாமி சர்வதேச விமான நிலையத்துக்கு 126 பயணிகளுடன் விமானம் ஒன்று வந்தது. 

விமான ஓடுதளத்தில் விமானம் இறங்கும்போது, அதன் லேண்டிங் கியர் திடீரென பழுதாக, விமானத்தின் உடல் பகுதி தரையில் உரச, விமானம் சட்டென தீப்பற்றியது.

வெளியாகியுள்ள வீடியோ ஒன்றில் விமானம் தரையில் உரசி தீப்பற்றுவதையும், விமானத்திலிருந்து கரும்புகை எழுவதையும் காணலாம்.

Plane catches fire after crash landing at Miami International Airport from DR. Sources state there were only minor injuries | #ONLYinDADE pic.twitter.com/AtL9vDYF74

— ONLY in DADE (@ONLYinDADE) June 21, 2022

உடனடியாக அங்கு தீயணைப்பு வாகனங்கள் விரைய, மக்கள் பதறியடித்துக்கொண்டு விமானத்திலிருந்து இறங்கி ஓட்டம் பிடித்துள்ளார்கள். தீயணைப்பு வீரர்களின் உடனடி நடவடிக்கையால் விமானத்தில் தீ பரவுவது தவிர்க்கப்பட்டதால் ஏராளம் பயணிகளும் விமானப் பணியாளர்களும் உயிர்தப்பியுள்ளார்கள்.

இந்த அதிர்ச்சியளிக்கும் சம்பவத்தில் மூன்று பேருக்கு காயங்கள் ஏற்பட்டுள்ளதாகவும், அவர்கள் மருத்துவமனைக்குக் கொண்டு செல்லப்பட்டுள்ளதாகவும் விமான நிலைய அதிகாரிகள் தெரிவித்துள்ளார்கள்.

இந்நிலையில், எதனால் திடீரென விமானத்தின் லேண்டிங் கியர் பழுதானது என்பது குறித்து அதிகாரிகள் விசாரணை மேற்கொண்டுவருகிறார்கள்.