குழந்தையை மார்புடன் கட்டிக்கொண்டு 118 அடி உயரத்திலிருந்து குதித்த தந்தை... வெளியிட்ட கடைசி வீடியோ

நேற்று மாலை தனது குழந்தையை மார்புடன் சேர்த்துக் கட்டிக்கொண்டு சுற்றுலாப்பயணிகள் கண் முன்னே 118 அடி உயரத்திலிருந்து குதித்த தந்தை வெளியிட்ட கடைசி வீடியோ வெளியாகியுள்ளது.

தெற்கு அவுஸ்திரேலியாவிலுள்ள Whispering Wall என்னும் பிரபல சுற்றுலாத்தலத்தில் சிறுவர்கள் முதல் ஏராளம் சுற்றுலாப்பயணிகள் பலர் கூடியிருந்த ஒரு நிலையில், Henry Shepherdson (38) என்பவர், தன் உடலுடன் பொருத்தப்பட்டிருந்த ஒரு பை போன்ற அமைப்பில் தன் மகளான Kobi என்னும் ஒன்பது மாதக் குழந்தையை வைத்துக்கொண்டு, திடீரென அணையின் சுவரில் ஏறியிருக்கிறார்.

அக்கம் பக்கத்திலுள்ளவர்கள் அவரிடம் பேசி அவரை சமாதானப்படுத்த முயன்றும், அவர்களுக்கு செவி கொடுக்காமல் குழந்தையுடன் 118 அடி பள்ளத்திற்குள் குதித்திருக்கிறார் Henry.

குழந்தைகள் அலற, பதறிப்போன சிலர் பொலிசாருக்கு தகவலளித்துள்ளார்கள். அவசர உதவிக்குழுவினர் வந்து பார்க்கும் நேரத்தில் Henry உயிரிழந்துவிட்டிருக்கிறார். குழந்தை Kobiயைக் காப்பாற்ற அவசர உதவிக்குழுவினர் முயற்சி மேற்கொண்டும் அவளைக் காப்பாற்ற முடியவில்லை.

இந்நிலையில், Henry தன் குழந்தை Kobiயைக் கொஞ்சும் வீடியோ ஒன்று வெளியாகியுள்ளது. சமூக ஊடகங்களில் தன் குழந்தையின் வீடியோக்களை வெளியிடும் வழக்கம் கொண்டவராம் Henry.

அப்படி அவர் கடைசியாக வெளியிட்ட வீடியோ ஒன்றில், அவர் குழந்தையைக் கொஞ்ச, அந்த குழந்தை சிரித்து மகிழும் காட்சியைக் காணலாம். சமூக ஊடகங்களில் இப்படி ஒரு அன்புத் தந்தையாக காட்டிக்கொள்ளும் Henryக்கு இன்னொரு முகம் இருப்பது பலருக்குத் தெரியாது. கொலை மிரட்டல் விடுத்தது உட்பட பல குற்றச்சாட்டுகளுக்காக நீதிமன்றம் சென்றுள்ளார் Henry.

தன் குழந்தையையும் அதன் தாயையுமே கொன்று விடுவதாக மிரட்டியதற்காக மூன்று வாரங்களுக்கு முன்புதான் நீதிமன்றம் சென்றிருக்கிறார் Henry. முன்னாள் கால்பந்து வீரரான Kobe Bryant நினைவாகவே தன் குழந்தைக்கு Kobi என பெயர் வைத்துள்ளார் Henry.

ஆனால், குழந்தையின் புகைப்படங்கல் வீடியோக்கள் என பல விடயங்களை சமூக ஊடகங்களில் பகிர்ந்துகொள்ளும் Henry, தனது புகைப்படங்களை பதிவேற்றம் செய்ய தயங்குபவராம்.