பல்பொருள் அங்காடிகள் மீதான சைபர் தாக்குதல்களுக்கு ஈரானைக் குற்றம் சாட்டும் பிரான்ஸ்

France accuses Iran of supermarket fridge hacking: பல்பொருள் அங்காடிகளின் குளிர்சாதனப் பெட்டிகள் மீதான சைபர் தாக்குதல்களுக்கு ஈரானை பிரான்ஸ் குற்றம் சாட்டுகிறது.

கடந்த மாதம் நாடு முழுவதும் உள்ள பல்பொருள் அங்காடி குளிர்சாதன பெட்டிகள் மற்றும் உறைவிப்பான்களின் வெப்பநிலையை உயர்த்திய சைபர் தாக்குதல்களுக்குப் பின்னால் ஈரானின் இஸ்லாமிய புரட்சிகர காவலர் படை (IRGC) இருப்பதாக பிரான்ஸ் குற்றம் சாட்டியுள்ளது.

தடைகள் விதிக்கப்படும்

வெளிவிவகார அமைச்சர் ஜீன்-நோயல் பாரோட், இந்தத் தாக்குதல் அதன் அளவு மற்றும் ஆக்கிரமிப்பின் தன்மை ஆகிய இரண்டிலும் முன்னெப்போதும் இல்லாத ஒன்றாகும் என்றும், இதற்குப் பொறுப்பானவர்கள் மீது தடைகள் விதிக்கப்படும் என்றும் கூறினார்.

பிரான்சின் குற்றச்சாட்டுகளுக்கு ஈரான் இதுவரை பதிலளிக்காத நிலையில், சில ஈரானிய ஊடகங்கள் இந்தக் குற்றச்சாட்டுகளை ஆதாரமற்றவை என நிராகரித்துள்ளன.

பிரான்சில் டன் கணக்கான உறைந்த மற்றும் குளிரூட்டப்பட்ட உணவுப் பொருட்கள் அழிக்கப்படுவதற்கு வழிவகுத்த பிரெஞ்சு சைபர் தாக்குதலைத் தொடர்ந்து, பல ஐரோப்பிய நாடுகளில் உள்ள பல்பொருள் அங்காடிகள் மீதும் இதேபோன்ற தாக்குதல் நடத்தப்பட்டது.

பிரான்சில் கலவரமாக வெடித்த மாணவர்கள் போராட்டங்கள்... பின்னணியில் அமெரிக்காவும் ரஷ்யாவும்

இந்த நிகழ்வுகளுக்கு இடையே தொடர்பு உள்ளதா என்பது உறுதி செய்யப்படவில்லை. பிரான்சின் பல்பொருள் அங்காடிகள் மீதான தாக்குதல், நமது தேசியப் பிரதேசத்தில் நாசவேலையை நோக்கமாகக் கொண்ட முதல் பெரிய அளவிலான சைபர் தாக்குதல் என்றும், இது நாட்டின் நலன்கள் மற்றும் பிரெஞ்சு மக்களின் பாதுகாப்பு மீதான ஒரு பெரும் தாக்குதல் என்றும் அமைச்சர் பாரோட் கூறியுள்ளார்.

இந்த மிக மோசமான செயலுக்கு எதிராகத் தங்களது கடும் கண்டனத்தைப் பதிவு செய்வதற்காக, பாரிஸில் உள்ள ஈரானியத் தூதரை அரசாங்கம் வரவழைத்ததாகவும் அவர் தெரிவித்துள்ளார்.

மட்டுமின்றி, இந்தச் சம்பவத்திற்குப் பதிலளிக்கவும், இதை மீண்டும் செய்ய முற்படும் எவரையும் தடுக்கவும், பிரான்ஸ் தேவையான மற்றும் பொருத்தமான பிற நடவடிக்கைகளை எடுக்கும் என்று பாரோட் கூறியுள்ளார்.

இந்த நிலையில், IRGC அமைப்புடன் தொடர்புடைய தாக்குதல் நடத்தும் சைபர் பிரிவின் தலைவர் மற்றும் அவரது இரண்டு துணைத் தலைவர்கள் மீது விசாரணை தொடங்கப்பட்டுள்ளதாக பாரிஸ் அரசு சட்டத்தரணி தெரிவித்துள்ளார்.

ஷாஹித் கவே

மேலும், ஷாஹித் கவே என்ற அந்தப் பிரிவு IRGC அமைப்பின் மின்னணு மற்றும் இணைய மையத்துடன் தொடர்புடையவை என்றும் அவர் குறிப்பிட்டுள்ளார்.

ஷாஹித் கவே என்பது ஈரானிய அரசாங்கத்தால் நேரடியாகப் பணியமர்த்தப்பட்டதாகக் கருதப்படும் ஹேக்கர்களின் ஒரு குழுவிற்கு வழங்கப்பட்ட பெயராகும்.

அமெரிக்காவும் இஸ்ரேலும் இந்த ஆண்டின் தொடக்கத்தில் ஆரம்பித்த போரை மீண்டும் தொடங்கினால், ஈரான் தனது பதிலடியை மத்திய கிழக்குக்கு அப்பாலும் விரிவுபடுத்த வேண்டும் என்று சமீபத்திய வாரங்களில் அந்நாட்டின் பல ஊடகங்களும் அரசியல்வாதிகளும் வாதிட்டு வருகின்றனர்.

இந்த இணையத் தாக்குதல்களை IRGC நடத்தியிருந்தால், அவை ஈரானின் தடுப்பு உத்தியின் ஒரு பகுதியா என்பது இன்னும் உறுதி செய்யப்படவில்லை.

அக்டோபர் 11 அன்று, பிரான்சில் உள்ள பல சூப்பர் மார்க்கெட்டுகளில் பயன்படுத்தப்படும் குளிரூட்டும் அமைப்புகளின் வெப்பநிலையைக் கட்டுப்படுத்தும் மென்பொருளை ஹேக்கர்கள் தங்கள் கட்டுப்பாட்டுக்குள் கொண்டு வந்தனர்.

Coopérative U நிறுவனத்தின் 100-க்கும் மேற்பட்ட சூப்பர் மார்க்கெட்டுகளும், Intermarché மற்றும் அதன் Netto பிராண்டைச் சேர்ந்த 180 கடைகளும் பாதிக்கப்பட்டன. சில கடைகளில், குளிர்சாதனப் பெட்டிகளின் வெப்பநிலை ஒரே இரவில் 50 டிகிரி செல்சியஸ் வரை உயர்ந்ததாகத் தெரிவிக்கப்பட்டுள்ளது.

இந்த மாதத்தின் தொடக்கத்தில், ஐரோப்பா முழுவதும் 100-க்கும் மேற்பட்ட கடைகளை பாதிக்கும் வகையில், இரண்டாவது முறையாக சைபர் தாக்குதல் சம்பவங்கள் நிகழ்ந்தன.

பெல்ஜியம் மற்றும் லக்சம்பர்க் நாடுகளில் உள்ள பல்பொருள் அங்காடிகள் பாதிக்கப்பட்ட நிலையில், ஸ்வீடன், அயர்லாந்து, நெதர்லாந்து, எஸ்டோனியா மற்றும் பின்லாந்து உள்ளிட்ட நாடுகளில் குறைந்த எண்ணிக்கையிலான கடைகள் பாதிக்கப்பட்டன.

இந்த நிலையில், புதன்கிழமையன்று ரஷ்ய ஆதரவு கொண்ட ஹேக்டிவிஸ்ட் குழுக்கள் இரண்டு, தாங்களே இதற்குப் பொறுப்பு என்று உரிமை கோரிய போதிலும், அதை ஏற்க நிபுணர்கள் தரப்பு மறுத்து வருகின்றனர்.