சிட்னி தாக்குதல்: தாக்குதல்தாரி பெண்களைக் குறிவைத்து தாக்கியதன் பின்னணி

அவுஸ்திரேலியாவின் சிட்னியிலுள்ள மால் ஒன்றில், ஒருவர் தாக்குதல் நடத்திய விடயம் பெரும் பரபரப்பை உருவாக்கியுள்ள நிலையில், அவர் பெண்களை குறிவைத்து தாக்கியதற்கான காரணம் குறித்து அவரது பெற்றோர்கள் விளக்கியுள்ளார்கள்.

கத்திக்குத்து தாக்குதல்

சனிக்கிழமை மதியம், 3.45 மணியளவில், அவுஸ்திரேலியாவின் சிட்னி நகரில் அமைந்துள்ள மால் ஒன்றில் மர்ம நபர் ஒருவர் பொதுமக்களை சரமாரியாக கத்தியால் குத்தத் துவங்கியுள்ளார்.

ஒன்பது மாதக் குழந்தை ஒன்று முதல் பலரைக் கத்தியால் குத்திக்கொண்டே சென்ற ஜோயல் (Joel Cauchi, 40) என்னும் நபரைக் கண்ட பெண் பொலிசாரான ஏமி (Amy Scott), கத்தியை கீழே போடு என சத்தமிட, ஜோயல் அந்தப் பெண் பொலிசாரை நோக்கிப் பாய, ஏமி அவரை துப்பாக்கியால் சுட, சம்பவ இடத்திலேயே பலியானார் ஜோயல்.

பெண்களைக் குறிவைத்து தாக்கிய தாக்குதல்தாரி

ஜோயலால் தாக்கப்பட்டவர்கள் மற்றும் உயிரிழந்தவர்களில் பெரும்பான்மை பெண்கள் என்னும் விடயம் கவனத்திற்கு வந்தது. 17 பேர் ஜோயலால் தாக்கப்பட்ட நிலையில், அவர்களில் 14 பேர் பெண்கள், மூன்று பேர் ஆண்கள். கொல்லப்பட்டவர்களில் ஒரே ஆணான Faraz Tahir (30), அந்த மாலில் பாதுகாவலராக பணியாற்றியவர். அவர் ஜோயலைத் தடுக்க முயன்றபோது அவரால் கொல்லப்பட்டுள்ளார்.

இந்நிலையில், ஜோயல் பெண்களைக் குறிவைத்து தாக்குதல் நடத்தியது உண்மைதான் என்பது உறுதி செய்யப்பட்டுள்ளது.

ஜோயலுடைய தந்தையான ஆண்ட்ரூ தனது மகன் குறித்து கூறும்போது, அவர் நீண்டகாலமாக மன நலம் பாதிக்கப்பட்டிருந்ததாகவும், அதற்காக மருந்து சாப்பிடுவதை சமீபத்தில் நிறுத்திவிட்டதாகவும், அதற்குப் பிறகே இந்த மோசமான தாக்குதலை நிகழ்த்தியுள்ளதாகவும் தெரிவித்துள்ளார்.

அவர் ஏன் பெண்களைக் குறிவைத்துத் தாக்கினார் என ஆண்ட்ரூவிடம் கேட்டபோது, தனக்கு ஒரு காதலி வேண்டுமென அவன் விரும்பினான், ஆனால், அவனுக்கு வெளியாட்களிடம் பழகும் திறன் இல்லை, கத்திகள் மீது ஆர்வம் கொண்ட அவன் தனக்கொரு காதலி கிடைக்காத கோபத்தை பெண்கள் மீது வெளிப்படுத்தியுள்ளான் என்று கூறியுள்ளார் ஆண்ட்ரூ.

பெண்களுடன் பழகுவதில் அவனுக்கு பிரச்சினை இருந்தது என்று கூறிய ஆண்ட்ரூ, அவனால் ஒரு காதலியைக் கண்டுபிடிக்கமுடியவில்லை என்றும் கூறியுள்ளார்.