நெருக்கடி கொடுத்துவந்த ரஷ்யா., ஜேர்மனிக்கு கைகொடுத்த ஐக்கிய அரபு அமீரகம்!
ஐக்கிய அரபு அமீரகம் ஜேர்மனிக்கு எரிவாயு மற்றும் டீசல் வழங்க ஒப்புக்கொண்டது.
ஜேர்மனி ரஷ்ய விநியோகங்களுக்கு பதிலாக புதிய மின் ஆதாரங்களைத் தேடிய நிலையில் அமீரகம் இந்த ஒப்பந்தத்தில் கையெழுத்திட்டுள்ளது.
ஐக்கிய அரபு அமீரகம் (UAE) ஞாயிற்றுக்கிழமை ஜேர்மனியுடன் "ஆற்றல் பாதுகாப்பு" உடன்படிக்கையில் திரவமாக்கப்பட்ட இயற்கை எரிவாயு மற்றும் டீசலை வழங்குவதற்கு ஒப்புக்கொண்டது.
அமீரகத்தின் தொழில்துறை அமைச்சர் சுல்தான் அஹ்மத் அல் ஜாபர், இந்த ஒப்பந்தத்தை "யுஏஇ மற்றும் ஜேர்மனி இடையே வேகமாக வளர்ந்து வரும் எரிசக்தி கூட்டாண்மையை வலுப்படுத்தும்" ஒரு "மைல்கல்லான புதிய ஒப்பந்தம்" என்று கூறினார்.
ஜேர்மன் சான்செலர் ஓலாஃப் ஸ்கோல்ஸ் வளைகுடா சுற்றுப்பயணத்தின் ஒரு பகுதியாக ஐக்கிய அரபு அமீரகத்திற்கு விஜயம் செய்தார். இந்த சுற்றுப்பயணத்தில் சவுதி அரேபியா மற்றும் கத்தார் ஆகிய நாடுகளும் அடங்கும்.
அவர் அமீரகத்தின் ஜனாதிபதி ஷேக் முகமது பின் சயீத் அல்-நஹ்யானை சந்தித்து பேசியதை அடுத்து இந்த ஒப்பந்தம் இறுதியானது.
ஒப்பந்தத்தின் ஒரு பகுதியாக, 2022-ஆம் ஆண்டின் பிற்பகுதியில் டெலிவரிக்காக ஒரு எல்என்ஜி சரக்குகளை UAE வழங்கும் என்று தெரிவிக்கப்பட்டுள்ளது.
ஐக்கிய அரபு அமீரகத்தின் அரசு எண்ணெய் நிறுவனமான ADNOC இந்த மாத தொடக்கத்தில் ஜேர்மனிக்கு தனது முதல் நேரடி டீசல் விநியோகத்தை முடித்தது, மேலும் 2023-ல் மாதத்திற்கு 250,000 டன்கள் வரை டீசலை வழங்கும் என்றும் தெரிவிக்கப்பட்டுள்ளது.
அதுமட்டுமின்றி, ADNOC, 2023-ஆம் ஆண்டில் ஜேர்மன் வாடிக்கையாளர்களுக்காக பிரத்தியேகமாக மேலும் பல LNG சரக்குகளை ஒதுக்கியுள்ளது.
இந்த சுற்றுப்பயணம், ரஷ்ய விநியோகங்களுக்கு பதிலாக புதிய எரிசக்தி ஒப்பந்தங்களை உறுதிசெய்யும் மற்றும் ரஷ்யாவின் உக்ரைன் படையெடுப்பின் விளைவாக ஏற்பட்ட எரிசக்தி நெருக்கடியைத் தணிக்கும் என்ற ஜேர்மன் சான்செலர் ஓலாஃப் ஸ்கோல்ஸின் நம்பிக்கை நிறைவேறியது.